’’ابھی عشق کے امتحاں اور بھی ہیں‘‘

حکومت ولوں کرونا دی نویں لہر دی تباہ کاریاں دے حوالے نال اپوزیشن نوں اپنی مہم نوں کجھ دیر لئی ملتوی کرن دا مشورہ دتا جا رہیا اے۔

لکھت:پروفیسرحکیم شفیق کھوکھر

حکومت دے خلاف اپوزیشن دی تحریک کراچی، کوئٹہ، گوجرانوالہ تے پشاور دے بعد ملتان دے بعد لہور تیکر اپڑن والی اے۔ ایس سلسلے وچ اپوزیشن دیاں تیاریاں وی جاری نیں تے دوجے پاسے حکومت ولوں کرونا دی نویں لہر دی تباہ کاریاں دے حوالے نال اپوزیشن نوں اپنی مہم نوں کجھ دیر لئی ملتوی کرن دا مشورہ دتا جا رہیا اے۔ لوک وی ایس صورت حال توں ایہہ سوچن اُتے مجبور نیں کہ جدوں کوئی حکومتی نمائندہ، وزیر یا مشیر کوئی جلسہ کردا اے، ریلی کڈدا اے یا کسے اجتماع وچ شرکت کردا اے۔ وزیراعظم کسے تقریب وچ شرکت کردے نیں تے ایس ویلے ملک نوں کرونا دے پھیلائو دا خطرہ کیوں درپیش نہیں ہوندا؟ ایسے طرح ملک وچ کرونا دے خطرے دے باوجود کجھ وڈے بلکہ بوہت وڈے اجتماع وی ہوئے نیں۔ اتوار بازاراں تے دوجے مقامات اُتے تے سرکاری اجتماعات وچ لوک ماسک دے بغیر شرکت وی کر رہے نیں تے اپوزیشن دے اجتماعات اُتے پابندی کیوں؟ دوجے پاسے ملک دے دوجے مقامات اُتے کرونا دے ایس خطرے تے حکومتی ارکان دے اپوزیشن دے خلاف مقدمے درج کیتے جان دے اعلان دے باوجود ہر قسم دے اجتماع دا سلسلہ جاری اے۔ ایتھوں تیکر کہ گلگت بلتستان دے انتخابات دا انعقاد وی ہویا اے، حالاں کہ پورے ملک وچ بلدیاتی انتخابات دے انعقاد دا التواء دے شکار نیں۔
ایہو وجہ اے کہ پاکستان مسلم لیگ ن نے موجودہ صورت حال نوں پس پشت پا کے لہور تے دوجے مقامات اُتے آئندہ 13 دسمبر دے احتجاجی جلسے دی تیاری لئی اپنی سرگرمیاں دا آغاز کر دتا اے۔ ایس سلسلے وچ ہر حلقہ، قومی و صوبائی اسمبلی دی سطح اُتے کوارڈینیٹر دا تقرر کر دتا گیا اے جنہاں نے اپنے اپنے حلقیاں دے کارکناں تے یونین کونسلاں دے ارکان تے ٹکٹ ہولڈراں نوں متحرک کرن دا آغاز کر دتا اے۔ ایس سلسلے دا اک اہم اجتماع پچھلے دن علامہ اقبال ٹائون لہور دی مون مارکیٹ وچ مسلم لیگ حلقہ 130 این۔ اے تے حلقہ 160 پی۔ پی۔ دے دفتر وچ اک وڈے جلسے دا اہتمام کیتا جس وچ لہور دے صدر پرویز ملک، کوارڈینیٹرملک احمد خان،سابق صوبائی وزیر اور ڈپٹی سپیکر صوبائی اسمبلی رانا مشہوداحمد تے امیدوار صوبائی حلقہ سید توصیف شاہ ،میاں شہباز غوث،میاں طارق تے امیدوارحلقہ قومی اسمبلی خواجہ احمد حسان نے خطاب کیتا۔مقررین نے ایس گل اُتے زور دتا کہ اوہ 13 دسمبر دے مقررہ جلسے دی تیاری شروع کر دین۔ اوہناں نے ایہہ وی کہیا کہ کارکناں نوں پلس توں ڈرن دی بجائے ہمت نال کم لینا چاہیدا اے تے اپنے عزیزاں تے دوستاں دی مدد نال اپنے آپ نوں بچان دا اہتمام کرنا ہوئے گا۔ مقررین نے موجودہ حکومت نوں ملک و قوم دے مفاد دے خلاف قرار دتا تے ایس دے مقابلے وچ مسلم لیگ دی حکومت نوں بہتر قرار دیندے ہوئے ایتھوں تیکر کہہ دتا کہ جے موجودہ حکومت ساڈے توں بہتر کارکردگی وکھاندی تے سانوں جیل جان اُتے کوئی اعتراض نہ ہوندا۔ مقررین نے میاں نواز شریف نوں نکے مقدمے وچ ملوث کر کے نااہل قرار دتا گیا اے۔ مقررین نے ایہہ وی کہیا کہ جے تسیں لوک ایہہ سمجھدے او کہ موجودہ دور حکومت ٹھیک نہیں تے 13 دسمبر نوں بھرپور انداز وچ دوستاں تے عزیزاں دے نال ایس جلسے وچ شرکت کرو۔
جلسے وچ میاں شہباز شریف تے میاں حمزہ شہباز دی گرفتاری تے ایہناں نوں پابند سلاسل کرن دی وی مذمت کیتی گئی تے کہیا گیا کہ ایہناں نوں بے قصور قید کیتا گیا اے۔ ایہناں دا قصور ایہہ اے کہ اوہناں نے لہور تے صوبے دی ترقی لئی بے حد کم کیتا اے۔
سوال ایہہ پیدا ہوندا اے کہ کیہ اسیں کدوں تیکر ملک نوں جلسیاں، ریلیاں تے لانگ مارچاں دی نذر کردے رہاں گے۔ بدقسمتی نال جدوں اسیں اپوزیشن وچ ہونے آں، سانوں ملک و قوم تے عوام دا بوہت احساس ہوندا اے اسیں ایس دے غم وچ ہلکان ہوندے نظر آں، وڈے وڈے جلسیاں وچ وڈے وڈے دعوے کیتے جاندے نیں۔ مخالفاں نوں سڑکاں اُتے دھریکن ایہناں دے ڈیڈھ پاڑ کے قومی دولت کڈن دیاں گلاں وی کیتیاں جاندیاں نیں جس طرح ماضی وچ موجودہ وزیراعظم نے وی کیتا سی۔ اوہناں نے کرپشن دے خاتمے تے کرپٹ عناصر نوں کیفر کردار تیکر اپڑان دا وی اعلان کیتا سی پر برسر اقتدار آندے ای ایہناں دے نظریات وی بدلے تے ایہناں دے یکے بعد دوجے یوٹرناں نے قوم نوں اک بے بسی تے محرومی دے سوا کیہ دتا؟جتھوں تیکر کرپشن دے خلاف مہم دا تعلق اے ایس دا زور ایسے طرح جاری اے۔ ہن تیکر پلس، ایل ڈی اے تے ایسے طرح دے دوجے محکمیاں توں کرپشن دا خاتمہ نہیں ہو سکیا بلکہ ایس وچ وادھا ہویا اے۔ کھان پین والیاں شیواں دیاں قیمتاں ہوش ربا وادھے نے تنخواہ دار طبقے تے پنشراں دے ہوش اڑا دتے نیں۔ پہلے جنہاں بندیاں نوں نااہلی دی بنا اُتے عہدیاں توں ہٹایا جاندااے ایہناں نوں دوبارہ کسے ہور عہدے اُتے فائز کر دتا جاندا اے۔
ایس نے عوام نوں ایس حد تیکر پریشان کر دتا اے کہ اوہ ہن نہ پائے رفتن تے نہ جائے ماندن جہی صورت حال دا شکار نیں۔ میڈیا اُتے لوکاں دی گل بات نال ایس گل دا صاف اندازہ ہوندا اے کہ حالات کس پاسے جا رہے نیں؟ حکومت دی مجبوریاں اوہ ای نیں جیہڑی ایس نال پہلی حکومتاں دی وی سن پر ایہناں اُتے تنقید دے نشتر برسان والیاں نے آپ ایہناں دے خاتمے دا کیہ اہتمام کیتا اے؟ ایہہ اوہ سوال اے جیہڑا ہر پاکستانی دے ہونٹاں اُتے اے۔ جے ایس دا جواب نہ ملیا تے لوک کرونا تے پلس دے ڈر نوں بھل کے اپوزیشن دے جلسیاں تے ریلیاں وچ شرکت کردے رہن گے۔ ویکھنا ایہہ اے کہ حکومت ایس سلسلے وچ کیہ اقدام کردی اے؟ کیہ اوہ وزرائے دے بیان، شیخ رشید دی پیشن گوئیاں تیکر ای محدود رہندی اے یا لوکاں دے اعتماد نوں بہال کر کے ایہناں دی مشکلاں دا ازالہ کردی اے یا چپ تماشائی بن کے حالات نوں ویکھدی اے۔
اسیں تے ایس سلسلے وچ رف ایہو عرض کر سکنے آں کہ موثر اقدامات نہ کیتے گئے تے ۔۔۔۔کیوں جے گل جلسیاں تیکر محدود نہ رہوے گی بلکہ بقول اقبال۔
’’۔ابھی عشق کے امتحاں اور بھی ہیں۔‘‘