کرونا دی دوجی لہر تے ذمہ داری

تحریر حمیداللہ بھٹی

وطن عزیز وچ کرونا توں متاثر ہون والیاں دی تعداد وچ اک پاسے متواتر وادھا ہوندا جا رہیا اے دوجے پاسے احتیاطی تدبیراں نوں یکسر پس پشت پا دتا گیا اے پاکستان ڈیمو کریٹک موومنٹ دے ناں اُتے بنن والا 11 جماعتاں دا اتحاد ملک دے طول وعرض وچ جلسے کرن وچ مصروف اے جد کہ جماعت اسلامی نے وی جماعتی اجتماعات تے احتجاجی ریلیاں شروع کر رکھیاں نیں۔ ایس توں علاوہ صاحبان اقتدار مخالفین نوں تے اجتماعات توں باز رہن دا مشورہ دیندے نیں پر آپ رابطہ مہم وچ کمی اُتے آمادہ نہیں عوام وچ وی احتیاطی تدبیراں اُتے سنجیدگی نال عمل نہیں ہو رہیا جس اُتے ہیلتھ پروفیشنلز پریشان نیں تے کرونا نال ہون والی موتاں وچ وادھے دا خدشہ ظاہر کر رہے نیں ہون والی موتاں دا ذمے وار کون ہوئے گا حکمران، اپوزیشن تے عوام ذمے داری قبول کرن اُتے آمادہ و تیار نہیں سب اک دوجے نوں ذمے دار قرار دے کے آپ بری الزمہ ہون دے چکر وچ نیں ایہہ کسے طور مناسب نہیں سیاسی سرگرمیاں کجھ عرصہ موقوف کرن وچ ای عافیت اے تے جے بوہت ضروری ہوئے تے احتیاطی تدبیراں اُتے عملدرآمد یقینی بنا کے اجتماعات کیتے جا سکدے نیں۔ بختاور بھٹو دی منگنی دی تقریب وچ جے کرونا ٹیسٹ دی منفی دی رپورٹ لیان والیاں نوں ای شرکت دی اجازت دتی جا سکدی اے تے انج دا طرز عمل دیگر سیاسی سرگرمیاں وچ کیونکر نہیں اپنایا جا سکدا۔
پی ڈی ایم دا موقف اے کہ حکمران آپ کرونا نیں اوہناں نے معیشت تباہ کر دتی ہن میدان جنگ توں پچھے ہٹنا گناہ کبیرہ اے جد کہ حکمراناں نے اپوزیشن اُتے الزامات دی بوچھاڑ کر رکھی اے کدی ملک دشمن کہیا جاندا اے تے کدی کرونا دے کیس ودھن اُتے مقدمے درج کر ن دی دھمکی دتی جاندی اے کوئی بندہ خدا پچھے جیہڑا اپوزیشن انتظامیہ نال جلسیاں دی اجازت لین دی روا دار نہیں اوہ مقدمیاں توں کیونکر خائف ہو سکدی اے؟ پر دشنام طرازی دے مقابلے وچ عوامی صحت نوں دائو اُتیلان نوں کسے طور سود مند نہیں کہہ سکدے۔ ایہہ ٹھیک اے کہ اپوزیشن دے جلسیاں نال حکمراناں دا اعتماد رخصت ہو چکیا اے تے اوہ دبائو دا شکار نیں۔ شیخ رشید تے گورنر سرور بظاہر تے اپوزیشن دی سرگرمیاں توں خوفزدہ نہ ہون دا دعویٰ کردے نیں پر سچ ایہہ اے کہ اپوزیشن دے عوام رابطے دے سلسلے توں حکومت نہ صرف پریشان اے بلکہ دفاعی پوزیشن اُتے کھڑی نظر آندی اے جس دا کارکردگی اُتے اثر ہویا اے پر حکومت ہوئے یا اپوزیشن دونواں نوں ایہہ بھُلنا نہیں چاہیدا کہ ملک وچ صحت عامہ دیاں سہولتاں پہلے ای تسلی بخش نہیں انج کرونا دے بے قابو ہون نال المیہ جنم لے سکدا اے جے دونویں ای اعتدال دا مظاہرہ کرن تے ذمے دارانہ طرز عمل اپنان تے عوام وچ نہ صرف ساکھ بہتر ہوئے گی بلکہ کرونا دا خطرہ وی گھٹ ہو سکدا اے۔
عالمی وبا کرونا دے ملک وچ پہلے مریض دی ایس مہینے 26 فروری نوں تشخیص ہوئی فیر ویکھدے ای ویکھدے وبا توں متاثر ہون والیاں دی تعداد وچ وادھا ہوندا گیا موتاں وچ وی تیزی غالب رہی پر جون دے بعد جولائی وچ صورت حال بہتر ہون لگی۔ جس دا حکمراناں نے کریڈٹ لین دی کوشش کیتی کجھ حکومتی اقدامات دی عالمی سطح اُتے پذیرائی وی ہوئی صورت حال بہتر ہون اُتے حکومت نے ایس اوپنر دی شرط دے تحت تعلیمی و کاروباری ادارے کھولی دتے پر مسلسل بے احتیاطی تے سرد موسم دی وجہ نال اک وار فیر کروبا بے قابو ہوندا نظر آن لگیا اے جے ہیلتھ پروفیشنلز دے پیشگی انتباہات نوں سنجیدہ لیا جاندا تے صورت حال اینی خراب نہ ہوندی پر ایہہ ملک دی بدقسمتی اے کہ جنہاں نے اصلاح احوال کرنی اے اوہ ای شتر بے مہار نیں۔ ایس توں پہلاں جدوں وی حکومت تے اپوزیشن وچ محاذ آرائی حد کراس کرن لگدی تے مداخلت دے ذریعے افہام و تفہیم دی راہ کڈ لئی جاندی۔ موجودہ کشیدگی دے ماحول وچ کسے ادارے دی مداخلت نال ٹھہرائو پیدا ہونا تے درکنار صورتحال ہور زیادہ خراب ہو سکدی اے کیوں جے اپوزیشن کسے دی مداخلت قبول کرن اُتے آمادہ نہیں ایس لئی مینوں نہیں لگدا کہ جلسے جلسوساں دا سلسلہ روکن وچ کوئی حربہ کارگر ہوئے۔ایس ویلے ملک وچ سیاسی استحکام لئی وسیع تر قومی مکالمے دی بوہت لوڑ اے نہیں تے کرونا دیاں تباہ کاریاں بے قابو ہو سکدیاں نیں لوڑ ایس امر دی اے کہ ذمے داران ذاتیات توں بالا تر ہو کے ملک دے مفاد تے قوم دی صحت دا تحفظ کرن ترقی یافتہ ملکاں وچ لاک ڈائون ہو رہیا اے۔ معیشتاں تباہی دے تہانے اُتے نیں انج بے احتیاطی نال آپ اپنے ہتھوں انسانی جاناں دائو اُتے لانا ناقابل فہم اے۔
کسے نوں خوفزدہ کرنا مقصود نہیں ایس ویلے ملک وچ فعال کیساں دی تعداد 36983 ہو چکی اے جنہاں وچوں 1653 دی حالت نازک اے تے اتوار نوں 59 پیر نوں 34 مریض جاں بحق ہوئے ملک وچ کرونا مثبت ٹیسٹاں دی شرح 7.4 تیکر اپڑ گئی اے پر لگدا اے ذمے دار ایہناں نوں تشویشناک صورتحال دا ادراک نہیں کھینچا تانی تے سر پٹھول وچ ای کامیابی دا راز سمجھ بیٹھے نیں جے طبی ماہرین دی ہدایات اُتے عمل کردے ہوئے عوامی مقامات اُتے ماسک دا استعمال یقینی بنایا جائے تے بہتری دا امکان اے پر نیشنل کمانڈاینڈ اپریشن سنٹر دی رپورٹ دے مطابق طلبا دی محض 10 توں 20 فیصد تعداد ای ماسک دا استعمال کر رہی اے ایہہ بے احتیاطی دی انتہا اے ۔ عالمی ماہرین دا کہنا بجا اے کہ ماسک دے سو فیصد استعمال نال ای کرونا دے پھیلائو اُتے قابو پایا جا سکدا اے۔ بے احتیاطی نال ناقابل تلافی نقصان ہو سکدا اے تاں بطور قوم سوچن وچ بھلائی اے کیوں جے پچھتاوے توں بحرحال احتیاط بہتر اے تھوڑی جہی احتیاط وڈے خطرے نوں گھٹ کر سکدی اے۔
کرونا ویکسین دا کامیابی نال ٹرائل ہو چکیا اے تے آئندہ سال ایہہ ویکسین مارکیٹ وچ دستیاب ہون دا قوی امکان اے۔ عالمی ادارہ صحت تے یونیسیف نے مل کے ترقی پذیر تے غریب ملکاں نوں ویکسین فراہم کر لئی لائحہ عمل مرتب کر لیا اے پر سانوں اپنے وسائل نوں نظر انداز نہیں کرنا چاہیدا حکومت دی ذمے داری اے کہ ساری توانائیاں اپوزیشن نال لڑن اُتے صرف کرن دی بجائے اصل تے فوری توجہ طلب مسائل ول دھیان دیوے تے وسائل دی روشنی وچ حتمی فیصلیاں وچ تاخیر نہ کرے اپوزیشن دا کم ای تنقید کرنا اے پر مسائل دے حل دی ذمے داری حکومت اُتے عائد ہوندی اے کرونا توں بچائو دی احتیاطی تدبیراں اُتے عملدرآمد نوں یقینی بنان دے نال ویکسین دی ویلے اُتے فراہمی وچ تساہل دی کوئی گنجائش نہیں۔