’’ چلواک فیصلہ کر لیئے‘‘

دوائیاں دا بذریعہ ڈاک ارسال کرن دا کہیا تے جاندا اے پر ایہناں دا حصول وی اک معمہ بن گیا اے

لهكت:پروفیسر حکیم شفیق کھوکھر

ایس ویلے جد کہ ملک وچ کرونا دی وبا اک وار فیر سر چک رہی اے۔عوام کرونا دے پچھلے حملے دے اثرات ہجے تیکر بھگت رہے نیں۔ آٹے چینی ای نہیں دوجیاں شیواں دے نال نال دوائیاں دیاں قیمتاں اسمان نال گلاں کر رہیاں نیں۔ پنجاب انسٹیٹیوٹ آف کارڈیالوجی توں جنہاں مریضا ں نوں مفت دوائیاں فراہم کیتیاں جا رہیاں سن ہن ایہناں نوں وی انتظار کرن نوں کہیا جا رہیا اے۔ دوائیاں دا بذریعہ ڈاک ارسال کرن دا کہیا تے جاندا اے پر ایہناں دا حصول وی اک معمہ بن گیا اے۔ جدوں ادارہ دے حکام نال گل کیتی جائے تے اوہ ایہنوں محکمہ ڈاک دا قصور قرار دیندے نیں۔ میں حیران آں کہ جیہڑا پوسٹ مین میری ڈاک میرا ناں ویکھ کے ای مینوں اپڑا دیندا اے اوہ میری دوائیاں میرے تیکر اپڑان توں گریز کیوں کرے گا حالاں کے ایہنوں یقین اے کہ جے ایہنوں کوئی طبی مسئلہ ہوئے گا تے اوہ میرے نال مشورہ کر سکدا اے۔ ہن تیکر پورے پاکستان توں آن والی میری ڈاک میرے تیکر اپڑ رہی اے تے دوائیاں کیوں نہیں اپڑ رہیاں؟ ایسے طرح سرکاری سٹوراں تیکر اپڑن والیاں کھان پین والیاں شیواں ایسے طرح نجی دکاناں توں دستیاب نیں جویں ماضی وچ سیلاب دے بعد دوجے ملکاں توں آن والا امدادی سامان اوپن مارکیٹ توں آسانی نال دستیاب سی۔ ادیدھے آٹا، دالاں، چینی ، انڈے تے گوشت وغیرہ دیاں قیمتاں وی اسمان نال گلاں کردیاں نظر آندیاں نیں۔ حکومت ولوں تنخواہواں وچ وادھے توں گریز نے تنخواہ دار طبقے تے پنشنراں دی کمر مہنگائی دے بارگراں نال توڑ کے رکھ دتی اے۔ دوجے پاسے شیخ رشید سنے سب وفاق تے صوبائی وزراء اپنے محکمیاں دی کارکردگی نوں نظر انداز کر کے صرف اپوزیشن دے خلاف بیان بازی وچ مصروف نیں، گویا ایہناں نوں وفاقی تے صوبائی وزرائے اطلاعات دی کارکردگی اُتے بھروسہ نہیں۔ حکمت وی وزراء دی تبدیلی دے سوا کوئی مثبت کم کردی نظر نہیں آندی۔ اک ہور گل وزیراعظم نے جس طرح یوٹرن لئے نیں تے ایہناں نوں ٹھیک قرار دے کے لوکاں نوں ایہہ سوچن اُتے مجبور کر دتا اے کہ ایہناں نوں ہر گل مشکوک نظر آن لگی اے۔
ایدھے کجھ وفاقی تے صوبائی وزراء نے اپوزیشن دشمنی وچ شرافت دے اصول و ضوابط نوں جس طرح نظر انداز کیتا اے ایس نے اپوزیشن نوں فرنٹ فٹ اُتے کھیڈن تے مدافعانہ اقدامات کرن اُتے مجبور کر دتا اے۔ ایس وچ کوئی شک نہیں کہ موجودہ حکومت بے شمار چنگے کم کر رہی اے پر ایہہ گل وی پیش نظر رہے کہ جس طرح اک مچھلی پورے جل نوں گندہ کر دیندی اے ایسے طرح اک وزیر دی غلط بیانی تے بداخلاقی پوری کابینہ دی ساکھ اُتے اثر انداز ہوندی اے۔ ایہو وجہ اے کہ ایہناں دناں ملک وچ کرونا، ڈینگی تے دوجیاں بیماریاں دے خدشے دے باوجود لکھاں دی تعداد وچ لوک اپوزیشن دے احتجاجی جلسیاں وچ شرکت کر رہے نیں۔ ایہہ وکھری گل اے کہ سرکاری اداریاں نوں ایہناں دی تعداد دے تعین وچ اختلاف ہوئے۔ ہن ملتان تے لہور وچ ملک دی اہم اپوزیشن پارٹیاں پاکستان پیپلز پارٹی تے پاکستان مسلم لیگ ن دی رہنمائی وچ احتجاجی اجتماعات دیاں تیاریاں کر رہیاں نیں۔
حکومت تے اپوزیشن دے ایس تصادم نے ملک دے مخلص تے درد دل رکھن والے بندیاں نوں پریشان کر دتا اے کیوں جے اپوزیشن دی تیاریاں دی جھلک وچ آپ وی ویکھ چکیا واں۔ ہن جد کہ ملک دے ڈاکٹر کرونا دے دوجے حملے دی تباہ کاریاں توں پریشان نیں، کئی اک سینئر تے جونیئر ڈاکٹر ایس وبا دے ہتھوں اپنی زندگیاں توں محروم ہو چکے نیں۔ ملک دی اکثر آبادی کرونا دی تباہ کاریاں توں نظراں چرا کے ایہنوں حکومتی مہم قرار دے رہی اے۔ بازاراں تے تے دوجے مقامات اُتے ایس۔ او۔ پیز دی خلاف ورزی کیتی جا رہی اے۔ ویلے دا تقاضا اے کہ حکومت اپنی ذمے داری نوں محسوس کرے تے فوری طور اُتے اپوزیشن دے رہنمائواں توں مذاکرات کرے جنہاں وچ شفقت محمود تے شاہ محمود قریشی جہے وزراء تے ڈاکٹر آصف محمود جاء تے ڈاکٹر شعیب رندھاوا جہے غیر سیاسی بندیاں تے اپوزیشن توں قمر الزمان کائرہ، احسن اقبال تے خواجہ سعد رفیق جہے لیڈراں نوں شامل کیتا جائے تے ملک وچ ایس بحرانی دور دے خاتمے تیکر پورا زور ایس مرض توں نجات تے عوام نوں سہولتاں فراہم کرن اُتے دتا جائے، تاں جے لوک بھوک نال مرن اُتے کرونا نال مرن نوں ترجیح نہ دین لگن۔
ایدھے اپوزیشن نوں وی ایس صورت حال وچ اپنے فیصلے کردے ہوئے ملک دے غریب عوام دا فکر وی کرنا چاہیدا اے۔ جے دونویں فریق خلوص نیت نال کم لین گے تے ماعملہ وی حل ہو جائے گا تے لوک وی سکھ دا ساہ لے سکن گے جے اپوزیشن حالات دی سنگینی دے تحت اپنے احتجاجی جلسیاں نوں ملتوی کرے تے حکومت نوں وی ایس اُتے طعنہ زنی کرن تے ایہنوںاپنی فتح قرار دین دی بجائے اپوزیشن دی بجائے ایس دی فراغ دلی قرار دینا چاہیدا اے۔ یاد رہوے کہ یار زندہ صحبت باقی۔ ایس لئی ویلے دا تقاضا اے کہ حکومت تے اپوزیشن نوں فوری طور تے اک باعزت معاہدہ کر لینا چاہیدا اے۔ انج نہ ہوئے کہ
ایساء نہ ہو کہ بن جائے یہ درد لاء دوا
ایساء نہ ہو کہ تم بھی مداوا نہ کرسکو