پاکستان طبی کانفرنس پنجاب دی مجلس عاملہ دااجلاس

پاکستان طبی کانفرنس دے پلیٹ فارم توں طب تے طبیب دی خدمت دا سفر جاری رہوے گا: ڈاکٹر زاہد اشر ف

پروفیسر حکیم سید عمران فیاض

مت سہل جانو پھرتا ھے فلک برسوں
تب خاک کے پردے سے انسان نکلتے ہیں
پاکستان طبی کانفرنس پورے صوبے دی مجلس عاملہ دا اک خصوصی اجلاس زیر صدارت پروفیسر حکیم حافظ محمد یونس صدر پاکستان طبی کانفرنس پنجاب جامعہ طبیہ اسلامیہ فیصل آباد دے کانفرنس ہال وچ منعقد ہویا۔ جس وچ مہمانان خصوصی مرکزی سینئر نائب صدر پاکستان طبی کانفرنس ڈاکٹر و حکیم محمد زاہد اشرف ستارہ امتیاز، مرکزی سیکرٹری جنرل پاکستان طبی کانفرنس پروفیسر حکیم منصور العزیز ،ڈاکٹر ضابطہ خان شنواری سابق صدر نیشنل کونسل فار طب تےسالار طب پروفیسر حکیم محمد احمد سلیمی جنرل سیکرٹری پاکستان طبی کانفرنس پنجاب و سابق چیئرمین امتحانی کمیٹی نیشنل کونسل فارطب سن ۔
پاکستان طبی کانفرنس پنجاب دی مجلس عاملہ دے اجلاس وچ نیشنل کونسل فار طب دی سابقہ کارکردگی دے حوالے نال گل بات دے نال نال آئندہ 2021 وچ منعقد الیکشن دے حوالے نال خصوصی ڈسکشن وی کیتی گئی۔اجلاس وچ آمد اُتے سارے مہماناں دا بڑے پرتپاک انداز وچ استقبال کیتا گیا سارے مہماناں نوں فرداً فرداً گلاب دے پھلاں دے ہار پوائے گئے بعد وچ سارے اراکین مجلس عاملہ نے مہمانان خصوصی دے اُتے پھُلاں دیاں پتیاں نچھاور کیتیاں تے ایہناں نوں گلاب دے پھُلاں دے ہاراں نال لد دتا۔ ایس موقعے اُتے خطاب کردے ہوئے جناب ڈاکٹر زاہد اشرف مرکزی سیئنئر نائب صدر پاکستان طبی کانفرنس و ستارہ امتیاز نے کہیا کہ اسیں اپنے اکابرین دے دسے ہوئے راہواں اُتے چلدے ہوئے طب و اطبا لئی مصروف عمل آں۔ شفا الملک حکیم محمد حسن قرشی نے شعبہ طب و طبیب لئی اپنا تن من دھن تیکر نچھاور کرن وچ کدی کوئی دقیقہ و گذاشت نہ رکھیا تے اج اسیں سارے جیہڑی ایہہ آزادی دی فضا وچ ساہ لے رہے آں ایہہ سارے اسلاف دی انتھک محنت و قربانیاں دا ثمر اے۔ انشاء اللہ آئندہ آن والا الیکشن کسے وی قسم دے اتحاد توں پاک ہوئے گا تے ایہہ الیکشن پاکستان طبی کانفرنس اپنے زور بازو نال لڑے گی۔

درد مندوں کو نوید سر خوشی تجھ سے ملی
غم کے ماروں کو دوائے زندگی تجھ سے ملی
جب تلک موجود ہے شام و سحر کا یہ نظام
جاوداں تاریخ حکمت میں رہے گاتیرا نام
مرکزی سیکرٹری جنرل جناب پروفیسر حکیم منصور العزیز نے کہیا کہ اسیں پچھلے الیکشناں توں بوہت سبق سکھے آں۔ انشاء اللہ ہن انج نہیں ہوئے گا۔ ہن اطبا پاکستان جاگ چکے نیں۔ ایہناں نوں صحیح تے غلط دا علم ہو چکیا اے انشاء اللہ ایس وار پاکستان طبی کانفرنس کلین سویپ کرے گی۔ نیشنل کونسل فار طب دے سابق صدر جناب ڈاکٹر ضابطہ خان شنواری نے کہیا کہ اسیں اپنے دور وچ اطباء لئی جس قدر اقدامات کیتے اوہ روز روشن وانگوں عیاں اے۔ ساڈے دور وچ ہون والے طب دوست دے کم سارے محب الوطن اطبا دے اگے نیں۔ جدوں اسیں اقدار وچ آئے تے ایس ویلے کونسل دی حالت اک بانجھ عورت وانگوں سی۔ کونسل دے اکائونٹ وچ کوئی رقم نہیں سی۔ ایس اُتے مختلف قسم دے بوجھاں دا انبار لگیا ہویا سی پر اج کونسل اللہ تعالیٰ دے فضل و کرم نال خود مختار ہو گئی اے سارے اطبا پاکستان نال اپیل اے کہ اوہ نیشنل کونسل فار طب دی بنن والی ایس بلڈنگ وچ اپنے ناں دی اٹ لان تاں جے تہاڈی آئندہ آن والی نسل دا مستقبل تابناک ہو سکے۔
پلٹنا جھپٹنا جھپٹ کر پلٹنا
لہو گرم رکھنے کا ھے اک بہانہ
پر اللہ تعالیٰ دے فضل و کرم نال جدوں اسیں اپنے دور وچ ایہناں ساریاں مشکلاں نوں احسن طریقے نال حل کیتا تے اج کونسل دی اپنی تھاں اے جس دی چار دیواری و گیٹ لگ چکیا اے ایہہ کامیابی عظیم کامیابی اے۔ جیہڑی ساڈے ساریاں دی کامیابی اے۔ الحمداللہ اج نیشنل کونسل فار طب خود کفیل اے۔ ساڈے اُتے کوئی وی کرپشن دا اک روپیہ وی ثابت نہیں کر سکدا۔ پاکستان طبی کانفرنس پنجاب دے صدر پروفیسر حکیم محمد حافظ یونس نے کہیا کہ سابقہ الیکشناں وچ سانوں بوہت تلخ حقائق نال واسطہ پیا اے۔ جس بندے نوں وی ساڈی جماعت نے عزت دتی ایسے نے ساڈے رستے وچ کنڈے سٹے پر ہن دی وار مخالفین نوں ساڈی جت لوہے دا چنا ثابت ہوئے گی۔

نہیں تیرا نشیمن قصر سلطانی کے گبند پر
توشاھین ھے بسیرا کر پہاڑوں کی چٹانوں پر
پروفیسر حکیم محمد احمد سلیمی نے کہیا کہ ہن اتحاد دیاں گلاں ہوا ہوئیاں جنہے تلخ تجربات سانوں ہن تیکر ہوئے نیں ایس دے بعد تے کسے دے نال وی اتحاد دا سوال ای پیدا نہیں ہوندا۔ اسیں انشاء اللہ اپنے اسلاف دے دسے ہوئے راہواں اُتے چلدے ہوئے درمے سخنے قدمے طب و طبیب دی فلاح و بہبود لئی مصروف عمل رہاں گے۔ ایس موقعے اُتے اوہناں نے پاکستان طبی کانفرنس پنجاب دی مجلس عاملہ وچ نو منتخب اراکین حکیم ذوالفقار علی زاہد سابق ممبر نیشنل کونسل فار طب، حکیم مفتی محمد یوسف نقشبندی ،پروفیسر حکیم سید عمران فیاض تےحکیم راجہ سلیم نو خوش آمدید کہیا۔ حکیم ذوالفقار علی زاھد کو ایڈیشنل سیکرٹری تے پروفیسر حکیم سید عمران فیاض نوں ڈپٹی رابطہ سیکرٹری منتخب کیتا گیا۔ اوہناں نے کہیا کہ سارے ممبران مجلس عاملہ نوں اسیں الیکشن کوآرڈینیٹرز نامزد کرنے آں۔ مزید ایہہ کہ آئندہ آن والے الیکشناں وچ ڈویژن دی سطح اُتے وی کوارڈینیٹرز نامزد کر دتے نیں تے ایہناں نوں ہدایت کیتی گئی اے کہ اوہ اپنی ڈویژن توں 3 امیدواراں دے ناں بجھوان تاں جے آئندہ انتخابات وچ امیدوار دا انتخاب باہمی رضا مندی نال ہو سکے۔ ایس موقعے اُتے خطاب کردے ہوئے پروفیسر حکیم ذوالحسنین بخاری، حکیم اختیار نوید، حکیم عبدالخالق چوہدری نے کہیا کہ پاکستان طبی کانفرنس جمہور اطبا دی واحد نمائندہ جماعت اے۔ ایس دے سارے اراکین محب الوطن تے طب دوست صلاحیتاں دے مالک بندے نیں جیہڑے اپنے اندر درد دل و محبت دا جذبہ رکھدے نیں۔ انشا اللہ اسیں تے ساڈے سارے ساتھی پاکستان طبی کانفرنس دے نال نیں تے ایس سلسلے وچ کوئی دقیقہ فزوگذاشت نہ رکھن گے ۔

حکیم قیصر نوید گھمن، حکیم شاہد محمود ناز، حکیم شفقت عمران نذر نے کہیا کہ اتحاد دیاں گلاں کرن والے پہلے اپنی سابقہ راہ اُتے نظر مارن۔ بھروسہ توڑن والیاں اُتے بار بار بھروسہ کرنا کسے وڈے نقصان دا باعث بن سکدا اے ایسے لئی ساڈی قائدین نال اپیل اے کہ اوہ ہن دوبارہ کسے دے نال وی اتحاد نہ کرن۔ کیوں جے ساڈی جماعت دے پلیٹ فارم تے ووٹ بینک نوں استعمال کر کے جتن والے بعد وچ ساڈی ای جڑاں نوں کٹن لگ جاندے نیں۔ہن ایہناں نوں اپنی اصل حیثیت دا اندازہ ہو جائے گا۔ پاکستان طبی کانفرنس دے مدمقابل کھڑے ہونا ہن ایہناں دے وس دی گل نہیں حکیم جاوید رسول نے کہیا کہ سانوں فخر اے کہ اسیں پاکستان طبی کانفرنس دے کارکن آں۔ انشاء اللہ مخالفین نوں ایس وار عبرتناک شکست دا ساہمنا کرنا پئے گا۔ آئندہ آن والے الیکشن وچ ساڈے امیدوار ای کلین سویپ کرن گے۔ ایس موقعے اُتے حکیم عبدالمجید شامی، حکیم جمیل عارف ، حکیم محمد اسماعیل ، حکیم حبیب الرحمن ، حکیم عطا ٕالرحمن صدیقی ، حکیم مدثر ثواتی ، حکیم خالد راجپوت ، حکیم محسن ضیا ، ڈاکٹر سکندر حیات ذاھد ، حکیم افضل بٹ نے کہیا کہ ساڈا ہر کارکن انشا اللہ آئندہ الیکشن وچ کنکریٹ دی دیوار بن کے کھڑا ہوئے گا۔ تے مخالفین لئی لوہے دا چنا ثابت ہوئے گا۔ ایس وار اللہ دے فضل و کرم نال جماعت دے نامزد لوک ای کلین سویپ کرن گے۔ حکیم شہزاد جاوید ، حکیم ریاض شاھد ، حکیم رانا ارسلان ، حکیم حافظ فرید یونس نے کہیا کہ اسیں اپنے قائدین دے حکم اُتے اپنا تن من دھن نچھاور کرن وچ کوئی عار محسوس نہ کراں گے۔ ساڈے قائدین و اراکین ساڈا قیمتی سرمایہ نیں۔ حکیم شیر افگن ، حکیم ایم اےنعیم ، حکیم انوار قریشی ، حکیم امیر احمد ، حکیم محمد سعید ، حکیم شاھد رفیق ، حکیم جوادالرحمن نے کہیا کہ اسیں جماعت دے فیصلیاں دی مکمل تائید کرنے آں تے ایس دے نال اپنی انوٹ محبت دا ثبوت دینے آں ۔ ایہناں سنے ممبران مجلس عاملہ دی کثیر تعداد نے شرکت کیتی تے پاکستان طبی کانفرنس دے نال اپنی یکجہتی و دلی وابستگی دا عہد کیتا۔