ایمبولینس داہارن وجائون دی سزا
تحریر: اکرم عامر سرگودھا
پاکستان اوہ ملک اے جتھے جمہوریت ہوئے یا عسکری دور، ہر دور وچ ملک وچ افسر شاہی جنہوں بیورو کریسی کہندے نیں دا راج ہوندا اے جیہڑا ایس ملک وچ سیاہ و سفید دی مالک اے، بزرگ کہیا کردے سن کہ گھوڑے دی پچھاڑی تے افسر دی اگاڑی توں بچنا چاہیدا اے، کوئی پتہ نہیں گھوڑا عقب توں لت مار دیوے تے افسر کوئی انج دا حکم دے دیوے جیہڑا ساہمنے توں لنگھن والے لئی ہمیشہ لئی نقصان دہ ہو کے رہ جائے، پاکستان وچ بیورو کریسی اینی طاقتور اے کہ سیاستداناں نوں وی چکر دے کے رکھدی اے، افسر شاہی جو چاہے ایس ملک وچ حکمراناں توں منوا سکدی اے سچ تے ایہہ اے کہ ہر دور وچ حکومتاں بنان وچ افسر شاہی دا اہم کردار رہیا اے، 4 دسمبر دی گل اے کہ ایبٹ آباد پریس کلب دے نائب صدر نے سرگودھا دے صحافی شہزاد شیرازی نوں فون کیتا کہ ایبٹ آباد دا اک ایمبولینس ڈرائیور تہاڈے ضلعے وچ ڈیڈ باڈی لے کے گیا سی پلس نے ایہنوں تھانہ کینٹ وچ بغیر کسے مقدمے دے بند کر دتا اے، فون کرن والے صحافی ساتھی دا کہنا سی کہ ایمبولینس ڈرائیور دے گھر والیاں دے اینے وسائل نہیں کہ اوہ سرگودھا آ کے ڈرائیور نوں چھڑوا سکن، جس اُتے سرگودھا دے صحافی دوست نے ایس ایچ او کینٹ نوں فون کیتا تے موصوف نے ایہناں نوں دسیا کہ گڈی تھانہ ساجد شہید وچ بند اے، جس اُتے معلومات لئیاں گئیاں تے پتہ چلیا کہ ریجنل ٹرانسپورٹ اتھارٹی والیاں نے ایہہ ایمبولینس بند کروائی اے، ڈرائیور موصوف دا جرم ایہہ اے کہ خاتون کمشنر سرگودھا شاہپور دے دورہ اُتے سن کہ ایمبولینس دے ڈرائیور نے کمشنر سرگودھا دی گڈی نوں ہارن دے کے گڈی کراس کیتی، جس دا ڈویژنل کمشنر نے بُرا منایا تے ماتحت افسران نوں حکم دے کے گڈی تھانہ وچ بند کروا دتی، ڈرائیور دا ہارن وجا کے گڈی کراس کرنا اینا وڈا جرم سی کہ گڈی تے ڈرائیور تن دن توں تھانہ ساجد شہید وچ بند سن، جس اُتے صحافی موصوف نے سیکرٹری آر ٹی اے تے ٹریفک پولیس دے ذمے داران نال رابطہ کرن دی کوشش کیتی تے سیکرٹری آر ٹی اے دا فون مسلسل آف سی، جد کہ ڈی ایس پی ٹریفک نے کہیا کہ اوہ ودھ توں ودھ جرمانہ یا چالان کر سکدے نیں ایمبولینس ٹریفک پولیس نے بند نہیں کیتی، صحافی ساتھی نے ایہہ سوچ کے کہ ڈرائیور نوں تن دن ہو گئے نیں کہ اوہ حولات وچ بند اے، صحافی دوست نے خاتون کمشنر سرگودھا نال فون اُتے رابطہ کیتا تے فون کمشنر دی بجائے کسے مرد نے اٹنڈ کیتا جس اُتے صحافی دوست نے اپنا تعارف کرایا تے ایہناں نوں اک غریب دا مسئلہ بیان کرنا چاہیا تے فون اٹنڈ کرن والے نے ناگواری دا اظہار کیتا تے پچھیا ویکھو ٹائم کیہ ہویا اے جس اُتے صحافی دوست نے ایہناں نوں دسیا کہ ہجے رات دے 10 وجے نیں تے موصوف نے کہیا کہ ایہہ کیہڑا ویلا اے کمشنر نال گل کرن دا ؟
جس اُتے صحافی ساتھی نے ایہناں نوں کہیا کہ کمشنر تے 24 گھنٹے کمشنر ہوندا اے پر کسے غریب نوں ریلیف دین لئی تسیں ویلا پچھنا شروع کر دیندے او جس اُتے کمشنر سرگودھا دا فون اٹنڈ کرن والے بندے نے بیورو کریسی ورگا رویہ اپناندے ہوئے فون بند کر دتا جس اُتے صحافی ساتھی نے ایہناں نوں واٹس ایپ اُتے مسیج کیتا کہ کمشنر صاحبہ آپ پڑھ لین گیاں تے ایس غریب ڈرائیور نوں چھڈن دا حکم وی دے دین گیاں کیوں جے تن دن لنگھ چکے نیں تے کمشنر صاحبہ دا غصہ وی ٹھنڈا پئے گیا ہوئے گا۔ سویرے اٹھ کے صحافی ساتھی نے دوبارہ پتہ کیتا تے دوجے دن 10 وجے وی ڈرائیور حوالات وچ سی، جس اُتے افسوس ہویا کہ ڈرائیور نوں اک ہور رات حوالات وچ آ گئی اے جس اُتے سرگودھا دے صحافی ساتھی نے سیکرٹری آر ٹی اے نال رابطہ کیتا تے موصوف نے لاعلمی دا اظہار کیتا جد کہ دیگر ذرائع تے اداریاں نے ایس گل دی تصدیق کیتی کہ ایمبولینس تے ڈرائیور نوں کمشنر سرگودھا دے کہن اُتے تھانے وچ بند کیتا گیا اے، ایہہ خبر ٹی وی چینلز اُتے نشر ہوئی تے ایس غریب ڈرائیور دی جان بخشی ہو گئی، قابل توجہ امر ایہہ وے کہ بیورو کریسی وچ چنگی شہرت دے حامل سیکرٹری، ریجنل ٹرانسپورٹ اتھارٹی ولوں سرکاری طور اُتے تردید جاری کیتی گئی کہ ایبٹ آباد توں براستہ خوشاب سرگودھا آن والی ایمبولینس 1202-JF گڈی ہائی ایس 15 سیٹررجسٹرڈ سی، جنہوں ایمبولینس دے طور اُتے استعمال کر کے قانون شکنی کیتی گئی جس اُتے گڈی تھانہ وچ بند کیتی گئی، وضاحت وچ ایہہ وی کہیا گیا کہ پولیس تے ٹرانسپورٹ انتظامیہ نے ڈرائیور دے نال حسن سلوک کردے ہوئے ایہنوں معمولی جرمانہ کیتا اے، ایتھے سوال ایہہ پیدا ہوندا اے کہ سیکرٹری آر ٹی اے صاحب پہلے تے آپ نوں معاملے دا ای علم ای نہیں سی، سو ایہہ تہاڈی مجبوری ہوئے گی، جے واقعی انج سی تے ڈرائیور توں پہلے دن ای حسن سلوک برت کے ایہنوں معمولی جرمانہ کر کے چھڈ دتا جاندا، کیہ چار دن تیکر ڈرائیور نوں حوالات وچ حبس بے جا وچ رکھنا حسن سلوک اے تے خدارا آئندہ انج دا حسن سلوک کسے نال نہ کرو کیوں جے آپ صاحب اختیار نیں جے انج ای حسن سلوک کردے رہے تے آئندہ کوئی ایمبولینس ڈرائیور دوجے شہر توں کسے دی میت سرگودھا لے کے نہیں آئے گا؟
