“افسر شاہی”

تحریر: اکرم عامر

دنیا وچ کوئی ملک ایس ویلے تیکر ترقی نہیں کر سکدا جدوں تیکر ملک وچ انصاف نہ ہوئے؟ جد کہ معاشرہ مظلوم نوں انصاف فراہم کرن تے جرم کرن والے نوں منطقی انجام تیکر اپڑان وچ اہم کردار ادا کردا اے جنہاں ملکاں وچ معاشرہ اپنا فرض پورا کردا اے اوہ ترقی دی منزلاں طے کردا کردا ترقی یافتہ ملک بن جاندا اے، برسر اقتدار آن والے پہلاں موجودہ وزیراعظم عمران خان وی بڑے بڑے دعوے کردے سن کہ اوہ برسر اقتدار آ کے ملک وچ انصاف دا بول بالا کرن گے؟ ظالم نوں سزا تے مظلوم نوں انصاف دلوان گے؟جیہڑا جرم کرے گا اوہ ای سزا پائے گا؟ وڈے افسراں دے کردہ جرم دی سزا نکے عملے نوں دے کے مٹی پائو پالیسی نہیں اپنائی جائے گی؟ کپتان نے ایس طرح دے اینے دعوے کیتے کہ جے لکھنا شروع کریئے تے کئی مہینے لنگھ جان پر کپتان دے دعوے تے وعدے ختم نہ ہون، کپتان ایس ملک لئی کیہ کر رہے نیں ایہہ وی کسے توںلُکیا نہیں اوہ اپنے تئیں کوشش کر رہے نیں کہ اپنے دور اقتدار وچ کجھ انج کر جان کہ آن والیاں نسلاں ایہناں نوں (عمران خان) نوں یاد رکھن۔ پر ایہناں دے دوالے پرانے کھلاڑیاں دا وچھیا جال تے بیورو کریسی ایہناں دی راہ وچ رکاوٹ نظر آندی اے، بیورو کریسی چاہے تے حکومتاں کامیاب؟ بیورو کریسی نہ چاہے تے حکمران جنہی مرضی کوشش کر لین کدی کامیاب نہیں ہو سکدے۔ ایہہ وی بیورو کریسی دا خاصا اے کہ اوہ اپنے ہم پلہ افسراں دا ہر مقام اُتے دفاع کردے نیں تے افسر شاہی جو چاہے کرے ایس اُتے پردہ وی بیورو کریسی ای پاندی اے۔
ایس دی مثال اج کل ہر زبان زد عام خاتون کمشنر سرگودھا دا اک واقعہ اے، جنہاں نے ہارن وجا کے اپنی گڈی کراس کرن دی پاداش وچ تن دن تیکر ایبٹ آباد دے اک ایمبولینس ڈرائیور نوں گڈی سنے تھانے وچ بند کروائے رکھیا، معاملہ میڈیا وچ آیا تے ذرائع دے مطابق وزیراعلیٰ نے نوٹس لیا تے بجائے ایس دے کہ خاتون کمشنر دے خلاف کوئی کاروائی ہوندی، تھانہ ساجد شہید دے ایس ایچ او اسد اویس نوں معطل کر کے معاملے اُتے انکوائری کرن والیاں نے ہم پلہ خاتون کمشنر نوں صاف بچا لیا تے نزلہ تھانے دے ایس ایچ او اُتے پا دتا حالاں کے انج نہیں سی، ایس ایچ او تھانہ نے تے خاتون کمشنر تے سیکرٹری آر ٹی اے دے احکامات دی تعمیل کیتی سی جیہڑی ایس دی مجبوری سی۔عوام وی ایس فیصلے اُتے ششد رہیاں کہ کیتا دھریا تے خاتون کمشنر دا سی، پر سزا سب انسپکٹر /تھانہ دے ایس ایچ او نوں دے دتی گئی، ایس ایچ او نوں معطل کرن اُتے پنجاب پولیس خاص طور تے سرگودھا ڈویژن دے چارے ضلعیاں دی پولیس وچ اوی اضطراب پایا جا رہیا اے کہ آخر سب انسپکٹر نے انج دا کیہڑا جرم کیتا سی؟ کیہ افسراں دے حکم دی تعمیل کرنا جرم اے؟ ایہہ اوہ سوال اے جیہڑا محکمہ پولیس دے ہر اہلکار دی زبان اُتے اے؟
ایتھے ایہہ وی واضح کردا چلاں کہ معاشرے دی ترقی وچ انسانی و اخلاقی روایات دا کردار انتہائی اہم ہوندا اے معاشرے دی ترقی وچ پڑھے لکھے طبقے دا کردار وی انتہائی اہمیت دا حامل اے ایسے طرح حکومت وقت دا وی فرض بن دا اے کہ جس افسر نوں جس علاقے وچ تعینات کر رہے ہوندے نیں یا اختیارات دے رہے ہوندے نیں تے افسراں دے ذہنی، اخلاقی سوچ نوں وی جانچنا ضروری ہونا چاہیدا اے۔ ایتھے خاتون کمشنر سرگودھا دا اک ہور واقعہ یاد دلواندا چلا کہ عظیم صوفی بزرگ حضرت بابا فرید الدین مسعود گنج شکر ؒ دے سالانہ عرس مبارک وچ 776 سال توں کسے وی خاتون نے بہشتی دروازہ نہیں کھولیا تے نہ ای خاتون نوں مزار شریف دے اندر جان دی اجازت ہوندی اے پر انتہائی افسوس دے نال لکھنا پئے رہیا اے کہ دو ورھے پہلاں 2018 وچ سابقہ کمشنر ساہیوال موجودہ کمشنر سرگودھا میڈم فرح مسعود تے سابقہ ڈی پی او پاکپتن میڈم ماریہ محمود نے سالانہ 776 ویں عرس مبارک حضرت بابا فرید الدین مسعود گنج شکر ؒ دے موقعے اُتے ست محرم الحرام دی رات تیجے دن بہشتی دروازہ کھول کے 766 سالہ تاریخ توڑن دا موجب بنیاں، بہشتی دروازہ کھلدے ای بابا فرید الدین مسعود گنج شکر ؒ دے عقیدت منداں وچ تشویش دی لہر دوڑ گئی دربار شریف اُتے میڈم کمشنر فرح مسعود دے خلاف احتجاج شروع ہو گیا دربار شریف دی دیوان فیملی نے مداخلت کردے ہوئے بہشتی دروازے نوں دوبارہ احتجاجا بند کر کے تالے لا دتے تے کمشنر دے تبادلے دے مطابق اُتے بہشتی دروازہ کھولیا گیا جس اُتے پنجاب حکومت نے کمشنر ساہیوال میڈم فرح مسعود دا فوری تبادلہ کر دتا سی۔جناب کپتان سرگودھا ایمبولینس واقعہ نے اک وار فیر اپنی تاریخ نوں دہرایا اے جس نال عوام دے زخم تازہ ہو گئے نیں تسیں ریاست مدینہ دے دعوے دار حکمران او، عام شہری نوں انصاف دتے بغیر تہاڈا خواب شرمندہ تعمیر نہیں ہو سکدا؟ جناب وزیراعظم عمران خان صاحب تسیں تے برسر اقتدار آن توں پہلے بڑے بڑے دعوے کیتے سن تے کہیا سی کہ برسر اقتدار آ کے انصاف دا بول بالا کراں گا، جناب کپتان ایہہ سب کجھ تہاڈے دور اقتدار وچ ہو رہیا اے۔ خاتون کمشنر نوں بچان لئی اک ایس ایچ او نوں بھینٹ چڑھا کے معطل کر دتا گیا اے، جناب کپتان تہانوں ایس معاملے دا آپ نوٹس لینا چاہیدا اے کیوں جے جس خاتون کمشنر دے کہن اُتے ایمبولینس ڈرائیور تے گڈی تن دن تیکر بند رہی اوہ ایس ویلے وی اپنی سیٹ اُتے براجمان نیں تے نرکدہ گناہواں دی سزا وچ اک ایس ایچ او نوں معطل کر دتا گیا اے، تسیں ایس واقعے نوں مثال دے طور تے لینا ہوئے گا تے ایس دی غیر جانبدارانہ انکوائری کرا کے مثالی فیصلہ کرنا ہوئے گا؟ اودوں انصاف دا بول بالا ہوئے گا تے ملک ترقی کرے گا۔ نہیں تے ایسے طرح افسر شاہی اپنی من مانیاں کردی رہے گی تے ایس دی سزا ماتحت بھگتدے رہن گے؟ ایس واقعے دے رونما ہون اُتے افسوس ای کیتا جا سکدا اے باقی بدقسمتی نال وطن عزیز وچ جتھے جتھے وی خواتین وڈے عہدیاں اُتے فائز نیں اوتھے انج دے واقعے معمول دی گل نیں کیوں جے ایہہ محترم خواتین قانون، پالیسی، حالات، انصاف یا دماغ دی بجائے اپنے غصے تے جذبات نال کم لیندیاں نیں ایس اُتے وی نظر ثانی دی بوہت لوڑ اے؟
انسان خدا بننے کی کوشش میں ہے مصروف
لیکن یہ تماشا بھی خدا دیکھ رہا ہے