سردار عثمان بزدار دا لہور
لكهت:عتیق انور راجا
وزیراعلیٰ پنجاب سردار عثمان بزدار دا کہنا سی کہ بے شک میرا تعلق جنوبی پنجاب نال اے پر میں لہور دے مسائل توں نہ صرف پوری طرح واقف آں بلکہ اپنی ٹیم دے نال لہور دے مسائل نوں ترجیحی بنیاداں اُتے حل کرن لئی کوشاں وی آں۔جمعے دی سہ پہر اسیں سینئر لکھاریاں دے نال وزیراعلیٰ پنجاب سردار عثمان بزدار دی میڈیا بریفنگ وچ شرکت لئی 90 شاہراہ قائداعظم مال روڈ وزیراعلیٰ پنجاب دے خوبصورت ہال اپڑے تے ویکھیا تے فردوش عاشق اعوان ہر ہر ٹیبل اُتے جا جا کے مہماناں دے موہڈے تھپتھپاندے ہوئے ایہناں دا حال چال پچھ رہیاں سن۔ وزیراعلیٰ پنجاب عثمان بزدار ہال وچ تشریف لیائے تے روایتی مہمانوازی دے انداز وچ سب مہماناں دے کول ٹُر کے گئے تے سب توں ایہناں دی خیریت پچھن دے بعد اپنی نشست اُتے براجمان ہوئے فیر بوہت جلدی اوہ خاص طور اُتے لہور شہر دی ترقی لئی بنائے گئے منصوبیاں توں آگاہ کرن لئی ڈائس اُتے کھڑے ہو گئے۔ ایس گل بات وچ اوہناں نے لہور شہر لئی اک جامع ترقیاتی منصوبے دے بارے وچ آگاہ کیتا۔ اسیں سب جاننے آں کہ پچھلے کئی ورھے ہوئے کہ لہور وچ جناح ہسپتال دے بعد اک وی نواں جنرل ہسپتال نہیں بنایا گیا۔ ودھدی ہوئی آبادی دی وجہ نال شہر وچ موجود سارے سرکاری ہسپتالاں اُتے دبائو بوہت زیادہ ودھ چکیا اے۔ ایس لئی موجودہ حکومت نے فیصلہ کیتا اے کہ عوام دی آسانی لئی فیروز پور روڈ اُتے 9 ارب روپئے دی لاگت نال اک وڈا عوامی ہسپتال بنایا جائے گا ، اک انج دا ہسپتال کہ جس وچ 400 بیڈز جنرل، 400 کارڈیالوجی تے 200 بیڈز بلڈڈیزیز لئی مختص ہون گے۔ وزیراعلیٰ نے دسیا کہ بالاں دی بہتر صحت لئی گنگارام ہسپتال وچ مدر اینڈ چائلڈ کیئر ہسپتال نوں تقریباً 4 اارب روپئے دی لاگت نال مکمل کر لیا گیا اے۔ پچھلی میڈیا بریفنگ وچ وزیراعلیٰ دی توجہ بڑے شہراں وچ ٹریفک دے نظام ولوں دلوائی گئی سی ایس لئی ایس وار اوہناں نے خاص طور تے دسیا کہ شہر وچ ٹریفک لئی جتھے نویں سڑکاں تے فلائی اوور بنائے جان گے اوتھے ٹریفک پولیس نوں حکم دتا جائے گا کہ اوہ سڑکاں اُتے لائن سسٹم نوں فالو کران لئی تھوڑی سختی کرے جویں کہ پہلے کدی شہر دی سڑکاں اُتے موٹر سیکل تے وڈی گڈیاں سڑک دے انتہائی بائیں چلیا کردے سن۔ اوہناں نے دسیا کہ ایس ویلے لہور دی ساری سڑکاں اُتے ٹریفک جام معمول بن چکیا اے۔ ایس مسئلے نوں حل کرن تے ٹریفک دا بہائو بہتر بنان لئی شاہکام چوک تے کریم بلاک مارکیٹ چوک اُتے فلائی اوور جد کہ فیروز پور روڈ اُتے گلاب دیوی ہسپتال دے نیڑے تقریباً 1 ارب روپئے دی لاگت نال انڈر پاس بنایا جائے گا۔ وزیراعلیٰ نے دسیا کہ شمالی لہور جیہڑا کہ کدی اصل لہور ہویا کردا سی، ایس علاقے نوں جانے انجانے وچ اونج دیاں ترقیاتی سہولتاں نہیں دے گئی جویں کہ ایس علاقے دا حق سی۔ ایس علاقے وچ بوہت ای شاندار تے یادگار تاریخی عمارتاں نیں۔ جنہاں دی تعمیر و تزئین دی ذمے داری کامران لاشاری بوہت عمدگی نال ادا کر رہے نیں۔ ایہناں دی کارکردگی نوں ویکھدے ہوئے حکومت نے فیصلہ کیتا اے کہ کامران لاشاری سارے صوبے وچ موجود تاریخی عمارتاں دی بحالی دا فریضہ ادا کرن گے۔ وزیراعلیٰ دی توجہ تاریخی بادشاہی مسجد دی زبوں حالی ول دلوائی گئی جس دے جواب وچ وزیراعلیٰ نے یقین دلوایا کہ کجھ مشاورت دے بعد بادشاہی مسجد دی بحالی دی ذمے داری وی کامران لاشاری دے حوالے کر دتی جائے گی۔ وزیراعلیٰ نے دسیا کہ پرانے لہور وچ لاری اڈے توں سٹیشن تیکر ہر ویلے ٹریفک جام رہنا عام معمول اے۔ ایس لئی لہور ریلوے سٹیشن توں شیرانوالہ گیٹ تیکر ساڑھے 4 ارب روپئے نال اووڑ ہیڈ برج بنایا جائے گا۔ ایس منصوبے دی تکمیل نال جتھے لہور دے شہریاں نوں حقیقی معنیاں وچ ریلیف ملے گا اوتھے باہر توں آن والے سیاح وی آسانی نال پرانے لہور وچ سیرو تفریح کر سکن گے۔ پاکستانی تاریخ وچ بینکاں دے نال فنانس معاہدے دے بعد صرف 15 ہزار روپئے ماہانہ قسطاں اُتے ایل ڈی اے ہزاراں دی تعداد وچ فلیٹ بنا کے گھٹ آمدنی والے شہریاں نوں دیوے گی جنہاں دی ادائیگی 20 ورھیاں وچ کرنی ہوئے گی۔ آن والے ساون وچ بوٹ پا کے تصویراں بنوان توں بچن لئی اک پاسے لہور دی ورھیاں پرانی بوسیدہ سیوریج لائن نوں بتدریج بہتر کیتا جا رہیا اے تے دوجے پاسے نشینی علاقیاں نوں زیر آب آن توں بچان لئی تے بارش دا پانی ذخیرہ کرن لئی لہور وچ 10 انڈر گرائونڈ واٹر ٹینک بنائے جا رہے نیں۔ ایس منصوبے دی تکمیل نال بارش دا پانی سڑکاں اُتے کھڑا نہیں ہوئے گا بلکہ اوتھے زیر زمین بنے ٹینکرز وچ جمع ہو جایا کرے گا ایس جمع شدہ پانی نال بعد وچ لہور دے باغات تے پارکاں نوں سیراب کیتا جائے گا۔
