جنہاں دی پوری زندگی تحفظ ختم نبوتؐ وچ لنگھی

لكهت:آصف بھلی

شورش کاشمیری جنہاں نوں غلامی رسول ؐ نے اسلام تے پاکستان دا نامور فرزند بنا دتا سی، مینوں کدی نہیں بھُلدے پر اج اوہ مینوں کجھ زیادہ ای یاد آئے۔ خادم حسین رضوی دی موت نال دل سوگوار ہویا تے مینوں خواجہ کونین ؐ دے عشق نال سرشار شورش کاشمیری دی یاداں نے گھیر لیا۔ شورش کاشمیری دی پوری زندگی جدوجہد آزادی تے ایس توں وی ودھ کے ناموس رسالت ؐ دی حفاظت لئی لنگھی۔ تحفظ ختم نبوت دے محاذ اُتے میں اج تیکر شورش کاشمیری دا بدل نہیں ویکھیا۔ شورش کاشمیری قادیانیت نوں ابلس دی تبلیس قرار دیندے سن۔ اوہ تے ایہناں دا قلم زندگی بھر قادیانیت دے تعاقب لئی وقف رہیا۔ جنہا عرصہ شورش کاشمیری ایس فانی دنیا وچ زندہ رہے ایہناں دی للکار نال قادیانی جماعت لرزہ براندام رہی۔ شورش کاشمیری دے دامن وچ سب توں قیمتی پونجی عشقِ رسول ؐ سی۔ اوہ فتنہ قادیانیت نوں توہین رسالت دا مسئلہ سمجھدے سن۔ ایس لئی ایہناں دا ایمان سی کہ قادیانیت دے محاسبے وچ معمولی کوتاہی وی جے ہوئی تے روز محشر اوہ حضور رسالت مآب ؐ دا سامنا نہیں کر سکن گے۔ شورش کاشمیری قادیانیت دے سیاسی عزائم توں بخوبی آگاہ سن۔ ایہناں دا درست طور اُتے ایہہ خیال سی جے قادیانیاں دی ڈھیل دتی گئی تے قادیانیت دے مذموم عزائم دا تعاقب نہ کیتا گیا تے قادیانی ٹولہ پاکستان وچ اک عجمی اسرائیل دی بنیاد رکھ سکدا اے۔
ساڈی نوجوان نسل نوں شاید ای ایہہ علم ہوئے کہ شورش کاشمیری دی زندگی دا اک لمبا عرصہ ساڈی آزادی دی خاطر انگریز سامراج دے دور وچ جیل دی سلاخاں دے پچھے لنگھیا ۔ قیام پاکستان دے بعد وی حکمراناں دے خلاف پورے ولولے تے دبدبے دے نال سچ بولن تے سچ لکھن دے جرم وچ شورش کاشمیری نوں قید و بند دی صعوبتاں توں لنگھنا پیا پر شورش کاشمیری نوں ہتکدے وچ اذان دین نال کوئی حکمران وی نہ روک سکا۔ سچی گل ایہہ اے کہ سید الکونین محمد عربی ؐ دے ایس فدا کار دی آواز تے ولولہ نوں دبانا کسے دے وس وچ ای نہیں سی۔ جس دے دل وچ محبتِ رسول ؐ دا ٹھاٹھاں ماردا ہویا سمندر ہوئے تے جس دے ہتھ وچ قرآن دا پرچم ہوئے ایس دا سر کدی کسی جابر حکمران دے سامنے جھُک ای نہیں سکدا۔ شورش کاشمیری دی پوری زندگی اک ای خواہش رہی کہ ایہناں دا سر احمد ِ مرسلؐ دی چوکھٹ اُتے قربان ہو جائے شورش کاشمیری دی ایہہ خواہش تے پوری نہیں ہوئی کہ ایہناں دی جان حضور نور مجسم ؐ اُتے قربان ہو جاندی پر ایس گل دی شہادت شورش کاشمیری دے بدترین دشمناں توں وی لئی جا سکدی اے کہ ایہناں نوں اک عاشقِ رسول ؐ دی موت نصیب ہوئی تے انج ہوندا وی کیوں نا۔ جدوں زندگی دی ہر ساعت وچ شورش کاشمیری دے قلم تے زبان نال محبتِ رسول ؐ دے پھُل کھلے ہون تے جدوں شورش کاشمیری دی زندگی دا اک اک پل شاہِ دو جہاں دی غلامی وچ بسر ہویا ہوئے تے فیر جدوں شورش کاشمیری دا لمحہ لمحہ حضور سرورِ کونین ؐ دے دشمناں دے تعاقب وچ لنگھیا ہوئے۔ تے فیر جس دے قلم دا حسنِ نگارش تے زبان دا زور بیاں حضور نبی اکرم ؐ دی سیرت بیان کرن لئی وقف رہیا ہوئے تے ناموسِ مصطفی ؐ دی نگہداری جس دا سب توں وڈا اثاثہ ہوئے تے جس دی زندگی دا افتخار تے امتیاز ای ایہہ ہوئے کہ اوہ سرکار ؐ دو عالم دا اک ادنیٰ ترین غلام اے ایس دی زندگی دا اختتام وی اک عاشق رسول ؐ دی موت اُتے ہوندا اے۔
مولانا کوثر نیازی نے شورش کاشمیری دی وفات اُتے اک مضمون لکھیا سی۔ ایس مضمون توں اک اقتباس میں ایتھے پیش کر رہیا واں۔
’’عشق رسول ؐ‘‘ شورش کاشمیری دی زندگی دا اک امتیازی عنوان سی۔ مینوں یاد اے کہ کئی وار حج اُتے جان لئی ایہناں نال گل ہوئی تے اوہ ایہو کہیا کردے سن کہ میں دربار مصطفیؐ اُتے حاضری دین دے قابل نہیں۔ شاید ایسے عشق دا نتیجہ سی کہ ایس وار حج دے موقعے اُتے منیٰ وچ حج دے اگلے دن میں شورش کاشمیری مرحوم نوں خواب وچ ویکھیا جدوں میں شیطان نوں کنکریاں مار کے واپس آ رہیا سی تے شورش کاشمیری رستے وچ مل گئے۔ میں پچھیا کہ کتھے دا ارادہ اے تے جواب وچ کہیا کہ ’’کنکریاں مارن جا رہیا واں‘‘ خواب دے بعد میں جاگیا تے میری طبیعت اُتے ایس خاب دا گہرا اثر سی۔ صاف معلوم ہوندا سی کہ انتقال دے بعد پہلے حج وچ شورش کاشمیری نوں عشقِ رسول ؐ دی بنا اُتے ای شریک کیتا گیا۔‘‘
میرا یقین کامل اے کہ تحریک ختم نبوت دے مجاہد اعظم تے عمر بھر ناموس رسالت ؐ دی جنگ لڑن والے غازی شورش کاشمیری نوں اللہ کریم جنت وچ اعلیٰ ترین مقام نال نوازن گے تے عشق رسول ؐ دی جیہڑی شمع شورش کاشمیری نے روشن کیتی سی۔ ایس دی روشنی وچ حال تے مستقبل وچ وی ناموس رسالت ؐ دے تحفظ دی خاطر تیغ بدست تے کفن بردوش مجاہد پیدا ہوندے رہن گے۔ خادم حسین رضوی وی اک انج دا ای مجاہد سی جیہڑا اپنا کردار کامیابی نال ادا کر کے اپنے رب ول ٹُر گیا اے۔