’’جلسہ مینار پاکستان‘‘

تحریر: اکرم عامر سرگودھا

آخر کار مینار پاکستان اُتے پی ڈیم ایم دا جلسہ ہو گیا، جس دے بارے وچ قبل ازیں اپوزیشن جماعتاں دی قیادت کہندی سی کہ لہور دا ایہہ جلسہ پی ٹی آئی دی سلیکٹڈ حکومت نوں بہا کے لے جائے گا پر انج تے کجھ نہیں ہویا، حکومت وی اپنی تھاں موجود اے تے حکمران وی سردست اوہ ای نیں، اپوزیشن جماعتاں دے قائدین وی پاکستانی طرز سیاست وانگوں برسر اقتدار حکومت تے حکمراناں نوں آڑے ہتھ لے رہی اے تے اپوزیشن کارکناں نوں لانگ مارچ دی بھرپور تیاری دا کہہ رہی اے اپوزیشن مینار پاکستان دے جلسے نوں تاریخی جلسہ قرار دے رہی اے تے حکمران جماعت دے ذمہ دار کہندے نیں کہ اپوزیشن دی 11 جماعتاں مل کے وی مینار پاکستان بھرن وچ ناکام ٹھہری اے۔ سو ایہہ جلسہ کامیاب سی یا ناکام ایہہ اپوزیشن تے حکمراناں دا درد سر اے سیاست توں بیزار عوام دی اکثریت نوں ایس نال کوئی سروکار نہیں کیوں جے ملک وچ وسن والی غریب عوام دی اکثریت نوں تے ڈیڈھ بھرن لئی دو ویلے دی روٹی دے لالے پئے ہوئے نیں، غربت، بیروزگاری تے مہنگائی، مفلسی نے حالات ایس نہج اُتے اپڑا دتے نیں کہ پہلے تے اکا دکا خودکشیاں ہوندیاں سن ہن پورے پورے کنبے دی خودکشیاں دیاں خبراں آ رہیاں نیں۔
تے گل ہو رہی سی لہور جلسے دی، جس دے سٹیج دے نمایاں مقررین وچ مولانا فضل الرحمان، مریم نواز، بلاول بھٹو زرداری، محمود اچکزئی قمر زمان کائرہ، شاہ نورانی،جاوید ہاشمی، ساجد میر، آفتاب شیر پائو شامل نیں جد کہ (ن) لیگ دے سزا یافتہ سابق وزیراعظم میاں نواز شریف نے بیرون ملک توں جلسہ نال ویڈیو لنک دے ذریعے دھواں دار خطاب کیتا، یاد رہوے ایس طرح قبل ازیں لندن بہہ کے الطاف حسین ایم کیو ایم دے جلسیاں تے اجلاساں نال خطاب کردے سن، جنہاں نوں پاکستان مخالف بیانات اُتے غدار قرار دتا جا چکیا اے۔
سیاسی تاریخ کہندی اے کہ متذکرہ ایہہ سارے سیاست دان ماضی وچ اک دوجے دے حریف رہے نیں جیہڑے کپتان دے برسر اقتدار آن اُتے پی ڈی ایم دے ا تحاد دی صورت وچ آپس وچ حلیف بنے، ماضی وچ ایہہ سب سیاستدان اک دوجے نوںسخت تنقید دا نشانہ بناندے رہے۔ پی ڈی ایم دے موجودہ سربراہ مولانا فضل الرحما ن نے عورت (محترمہ بے نظیر بھٹو ) دی حکومت نوں غیر شرعی قرار دتا سی ، صدر آصف علی زرداری نے کہیا سی کہ ایس وار اسیں میاں (نواز شریف ) نوں چھڈ دتا تے شاید اللہ وی سانوں معاف نہ کرے، کیوں جے ایہہ قوم تے ہاریاں دا چو ر اے، اسیں انج دے درندے نوں برداشت نہیں کر سکدے، جد کہ موصوف نے ایہہ وی کہیا سی کہ تسیں (نواز شریف ) نے ہمیشہ ساڈی پیٹھ وچ چھرا ماریا اے، ایس وار اسیں تہاڈے بہکاوے وچ نہیں آواں گے نہ اسیںتہاڈے نال جاواں گے، بلاول بھٹو وی اپنے والد وانگوں میاں برادران نوں آڑے ہتھاں لیندے رہے نیں تے کہندے سن کہ میاں شہباز شریف نے سانحہ ماڈل ٹائون، ملتان تے آشیانہ سکیم کرپشن دا جواب دینا اے۔ اسیں سب مل کے تخت رائے ونڈ دی آمریت نوں ڈیگن گے، بلاول بھٹو نے ایہہ وی کہیا سی کہ میاں صاحب نے کشمیریاں لئی اک ’’ٹکہ ‘‘ دا کم نہیں کیتا، میں (نواز شریف ) نوں مودی دا یار نہ کہواں تے کیہ کہواں جد کہ نواز شریف کہندے سن کہ زرداری صاحب 6 کروڑ ڈالر تسیں کتھوں لے کے آئے نیں۔ اسیں ایس ویلے تیکر چین نال نہیں بیٹھن گے جدوں تیکر 6 کروڑ ڈالر پاکستان واپس نہیں لے آندے، ایہہ قوم دا پیسہ تے قوم دے خون پسینے دی کمائی اے، لٹیرے زرداری نے پاکستان دی دولت لٹ کے سرے محل خرید لیا اے۔ میرا ناں وی نواز شریف نہیں کہ سرے محل نوں نیلام کر کے ساری رقم قوم دے پیراں وچ نچھاور نہ کراں، 2018ء وچ اک جلسہ نال خطاب وچ میاں نواز شریف نے ایس گل نوں دوہراندے ہوئے آصف علی زرداری دے بارے وچ کہیا کہ سویٹزر لینڈ وچ کس دا 6 سو کروڑ روپیہ اے، جے ایہہ رقم جلسہ دے شرکاء وچ تقسیم کیتی جائے تے جلسے وچ موجود ہر بندے دے حصے وچ 10 لکھ آئے گا۔ جد کہ شہباز شریف نے جواب وچ بلاول دے بارے وچ کہیا سی کہ پتر (بلاول بھٹو) اک کرپشن دا کیس تے ساہمنے آ گیا تے تسیں فیر والد دے نال لندن جا ن گے جد کہ شہباز شریف ببانگ دہل کہندے سن کہ انتخابات دے بعد زرداری نوں لاڑکانہ کراچی، پشاور، لہور دی سڑکاں اُتے نہ گھسیٹیا تے میرا ناں شہباز شریف نہیں۔ شہباز شریف نے اک وار آصف علی زرداری وانگوں اشارہ کردے ہوئے ایہہ وی کہیا سی کہ پیسے ساڈے حوالے کر دیو نہیں تے سانوں تے تہاڈے لٹیرے ساتھیاں نوں نہیں چھڈاں گے۔ وزیراعظم عمران خان دی حکومت تے ساتھیاں وچ وی انج دے لوکاں دی بہتات اے جنہاں اُتے کپتان وزیراعظم بنن توں پہلے تنقید کردے رہے جس دا ماضی دے حریف موجودہ حلیف، کپتان نوں خوب جواب دیندے رہے ایہناں ای وچ ایم کیو ایم تے عوامی مسلم لیگ دے سربراہ شیخ رشید وی شا مل نیں جنہاں اُتے کپتان نے تنقید کیتی سی۔ ہن ایم کیو ایم پی ٹی آئی دی حکومت دی اتحادی تے شیخ رشید وزیر داخلہ (جیہڑا عہدہ سیکنڈ وزیراعظم تصور کیتا جاندا اے) دے منصب اُتے فائز نیں۔
تاں گل کتھوں کتھے نکل گئی، پاکستانی سیاست بڑی عجب، گھمبیر تے بے رحم اے جس وچ سیاست دان جمہوریت لئی گھٹ تے اپنے مفادات تے اقتدار دی کرسی تیکر اپڑن لئی زیادہ جنگ لڑدے نیں جس دی مثال حکومت تے اپوزیشن دا موجودہ منظر نامہ اے تے دونواں جماعتاں دے وچکار جاری موجودہ رسہ کشی سیاستدان اپنے اپنے مفاد لئی کر رہے نیں۔ لہور جلسہ وچ جتھے مولانا فضل الرحمان، مریم نواز ، بلاول بھٹو، ، آصف علی زرداری، نواز شریف، محمود اچکزئی تے دیگر مقررین نے دھواں دار تے ولولہ انگیز تقریراں دا تانتا بنھیا جنہاں دا لب لباب ایہہ سی کہ حکومت دے دن گنے جا چکے نیں، عوام لانگ مارچ دی تیاری کریئے جیہڑا جنوری دے اخریا فروری دے شروع وچ اسلام آباد وچ ہوئے گا، جیہڑا موجودہ حکومت دے خاتمے دا باعث بنے گا، ایس لانگ مارچ دھرنے وچ اپوزیشن جماعتاں دے ارکان اسمبلی استعفیٰ پیش کرن گے تے تبدیلی موجودہ حکومت نہیں اسیں (پی ڈی ایم) لے کے آئے گی۔ ایتھے واضح کردا چلاں کہ سیاسی ذرائع کہندے نیں اپوزیشن لانگ مارچ توں پہلاں 21 دسمبر نوں کوئٹہ، 23 دسمبر نوں مردان، 26 دسمبر نوں بہاوالپور، 28 دسمبر نوں سرگودھا، 2 جنوری نوں خضدار، 4 جنوری نوں کراچی، 6 جنوری نوں بنوں، 9 جنوری نوں گجرانوالہ، 13 جنوری نوں لورالائی وچ ڈویژنل سطح دے احتجاجی کنونشن منعقد کرن جا رہی اے، جس لئی پی ڈیم ایم دی قیادت نے متذکرہ اضلاع دے عہدیداران نوں ذمہ داریاں سونپ دتی اے۔
لہور جلسہ وچ محمود اچکزئی دے خطاب دا ذکر نہ کرنا وی اہل لہور نال زیادتی ہوئے گی۔ کیوں جے محمود اچکزئی نے اپنے خطاب وچ لہور دے باسیاں نوں انگریز سامراج دا حصہ قرار دتا، تے کہیا کہ دکھ اے کہ لہور والیاں نے ہندوواں تے سکھاں نال مل کے انگریز دا ساتھ دتا، محمود اچکزئی دے ایس بیان دا لہوریاں نے چنگا تاثر نہیں لیا، جس دا خمیازہ آن والے انتخابات یا سیاسی ماحول وچ خاص کر مسلم لیگ (ن) نوں بھگتنا پئے گا، کیوں جے محمود اچکزئی یا ایہناں دی جماعت دا کوئی لیڈر لہور توں انتخاب نہیں لڑنا، محمود اچکزئی دے ایس بیان اُتے لہوریاں وچ خوب لے دے ہو رہی اے تے اوہ اچکزئی نوں کوس رہے نیں؟
لہور جلسہ دی توجہ طلب گل ایہہ وی اے کہ مریم نواز نے اپنے خطاب وچ کہیا سی کہ جلسے نال میاں نواز شریف تے آصف زرداری ویڈیو لنک خطاب کرن گے پر اک حکمت عملی دے تحت بلاول بھٹو نے تے جلسہ نال خطاب وچ حکمران جماعت نوں خوب رگیدہ تے اپوزیشن لیڈراں تے جلسہ دے شرکاء نوں باور کرایا کہ حکومت گئی کہ گئی؟ سیاسی ذرائع کہندے نیں کہ آصف علی زرداری نے اپنی سیاسی سوچ دے تحت لہور جلسے نال خطاب نہیں کیتا؟ جیہڑا ایس گل دا عندیہ دیندا اے کہ اپوزیشن جماعتاں وچ دراڑ پئے چکی اے، جیہڑی ختم ہوندی نظر نہیں آ رہی، کیوں جے جلسہ دی سکیورٹی ولوں نامناسب سلوک کیتے جان اُتے بلوچستان دے سابق وزیر اعلیٰ عبدالمالک پی ڈی ایم دی قیادت توں نراض نیں۔مزید ایہہ کہ آصف زرداری جنہاں دے بارے وچ مشہور اے کہ اوہ مفاہمت دی سیاست تے ہر دور وچ جمہوریت نوں پروان چڑھان لئی کوشاں رہے، موصوف نے 2013 توں 2018 تیکر مسلم لیگ ن دی حکومت دے خلاف خوب اپوزیشن کیتی، آئے دن پیپلز پارٹی دے ارکان اسمبلی دے استعفیاں دی دھمکی دے کے ن لیگ دی حکومت دے نک وچ دم کیتے رکھیا پر ن لیگ دی حکومت نوں اپنی مدت پوری کر دتی، موجودہ سیاسی حالات ایس گل دا عندیہ دے رہے نیں کہ پیپلز پارٹی اپنے ارکان اسمبلی دے استعفیٰ نہیں دیوے گی، تے پی ٹی آئی توں بیک ڈور رابطے نال حکومت نوں اقتدار دی مدت پوری کرن وچ ماضی وانگوں مدت دیوے گی؟ جد کہ ن لیگ وچ فارورڈ بلاک بن چکیا اے، ایس طرح آن والے ویلے وچ ملکی سیاست دا منظر تبدیل ہوندا نظر آ رہیا اے۔