حافظ لیاقت علی ضیاء نہ صرف صحافی سن بلکہ اوہ انتہائی پر کشش تے اخلاص نال بھرپور شخصیت دے مالک سن
لكهت:اکرم عامر سرگودھا
پچھلے دناں سوشل میڈیا اُتیاک خبر جیہڑی انتہائی افسوسناک سی اُتے نظر پئی تے مینوں تقریبا ً 31 سال پہلاں جدوں راقم صحافت دی حرف ابجد توں شناسائی لئی تحریک کر رہیا سی دا منظر ساہمنے آ گیا، جیہڑا کجھ انج سی کہ راقم اپنے بھائی دا پاسپورٹ بنوان لئی نیو سیٹلائٹ ٹائون سرگودھا دفتر گیا تے ایہناں دناں سخت گرمی دا موسم تے حبس سی تے ایس ویلے سرگودھا ڈویژن دے اضلاع خوشاب، بھکر، سرگودھا ، میانوالی دے علاوہ منڈی بہاوالدین، جھنگ، لیہ یعنی 7 ضلعیاں دے رہن والیاں دے پاسپورٹ سرگودھا توں بن دے سن۔ایس وجہ نال آفس وچ انتہا دا رش سی تے راقم پاسپورٹ آفس دے انچارج دے کمرے وچ چلا گیا جتھے پہلے توں کجھ لوک بیٹھے سن تے چاہ دا دور چل رہیا سی، تے راقم نے متعلقہ افسر نوں اپنا تعارف بطور صحافی کرایا تے کمرے وچ پہلے توں موجود اک انتہائی خوش اخلاق بندے نے مینوں اپنے ول متوجہ کردے ہوئے کرسی اُتے بٹھایا تے پاسپورٹ دے فارم میرے ہتھ توں لے کے افسر موصوف نوں انتہائی دھیمے لہجے وچ کہیا کہ (نوجوان) یعنی میرا کم پہلے کرے تے افسر موصوف نے حکم دی تعمیل کردے ہوئے فوری فارم اُتے دستخط کر کے مینوں دتے تے کہیا کہ ایہہ ساہمنے کمرے وچ جمع کروا کے رسید حاصل کر لوئو میں فارم حاصل کر کے باہر نکلن لگیا تے متذکرہ بندہ جس نے افسر مجاز توں فارم دستخط کروا کے دتے سن وی اٹھ کے میرے نال باہر آ گیا تے میرے توں فارم پھڑ کے اوہ لمبی لین وچ لگن دی بجائے ایس کمرے وچ داخل ہو گیا جتھے فارم جمع ہو رہے سن میں باہر کھڑا ایہہ سوچ رہیا سی کہ متذرہ بندا شاید ایس دفتر دا ملازم تے مینوں صحافی ہون دی بنا اُتے پروٹوکول دے رہیا اے ، تھوڑی دیر بعد اوہ بندا واپس آیا تے مینوں رسید تھماندے ہوئے انتہائی شفیق لہجہ وچ کہیا کہ 15 دن بعد آ کے سامنے والے کمرے دی کھڑی توں پاسپورٹ حاصل کر لینا، نال ای موصوف نے اپنا تعارف کرواندے ہوئے کہیا کہ اوہ حافظ لیاقت علی ضیاء تے روزنامہ نوائے جمہور سرگودھا دا ایڈیٹر اے۔ ایہہ میری تے حافظ لیاقت علی ضیاء دی پہلی ملاقات سی جس، نے اینا اثر چھڈیا کہ میں ایہناں گرویدہ ہو گیا تے فیر ایہناں نال ملاقاتاں دا سلسلہ تا ویلے آسودہ خاک ہون تیکر جاری رہیا۔ حافظ لیاقت علی ضیاء نہ صرف صحافی سن بلکہ اوہ اتحاد بین المسلمین ، بین المذاہب ہم آہنگی دے علمبردار ہون دے نال انتہائی پر کشش تے اخلاص نال بھرپور شخصیت دے مالک سن۔ اوہ انٹرنیشنل کمیشن فارہیومن رائٹس دے بانی تے آخری وقت تیکر آرگنائزر رہے۔ ایہناں دی صلاحیتاں نال اہل سرگودھا ای نہیں پورے ملک دے لوکاں نے فائدہ چکیا، کیوں جے حافظ لیاقت علی ضیاء نے اتحاد بین المسلمین ، بین المذاہب ہم آہنگی، انٹر نیشنل کمیشن فارہیومن رائٹس دے پلیٹ فارم توں پورے ملک دے وڈے شہراں وچ سینکڑے مثالی پروگرام کرائے جنہاں وچ ملک دی جید شخصیات نے عوام نوں فرقہ واریت دے خاتمے ، لاقانونیت، دہشتگردی دے خاتمے، انسانی حقوق دے تحفظ دے نال بھائی چارے تے امن نال رہن دا سبق دتا۔ حافظ لیاقت علی ضیاء اپنے تئیں اک انجمن دا ناں سی جیہڑا ہر دور وچ سارے مکاتب فکر خاص طور تے ویلے دے حکمراناں وچ وسیع حلقہ احباب رکھدے سن تے دوستاں دے دکھ درد وچ شریک ہونا اپنا فرض سمجھدے سن جدوں پیر فضل حق جمعیت مشائخ پاکستان دے صدر سن ایس ویلے حافظ لیاقت علی ضیاء ایہناں دے نال مرکزی جنرل سیکرٹری دے عہدے اُتے کم کردے رہے۔ موصوف بیک وقت صحافی، انسانی حقوق تے مذہبی ہم آہنگی سنے دیگر شعبیاں وچ کم کرن والی متعدد تنظیماں نال وابستہ رہے، اوہ سچے عاشق رسول وی سن، ایہناں دی وفات توں ملک خاص طور تے اہل سرگودھا اک بندے توں محروم ہو گئے جس نے معاشرے نوں سدھارن تے نیک سمت چلان لئی پورے ملک وچ کم کر کے سرگودھا دا ناں روشن کیتا۔
