پی ڈی ایم دا بیانیہ تے اچکزئی داشور

تحریر حمیداللہ بھٹی

پی ڈی ایم وچ شامل جماعتاں ووٹ کو عزت دو دا نعرہ بلند کر رہیاں نیں تے ایس کوشش وچ نیں کہ کسے طرح عوام دی غالب اکثریت نوں نال ملا کے حکومت نوں رخصت کر دتا جائے پر پی ڈی ایم دے سارے کیتے کرائے نوں لسانی تے علاقائی تعصب دا شکار لوک ناکامی نال دو چار کرن اُتے تلے بیٹھے نیں جنہاں نوں درست روش اُتے لیائے بنا گل نہیں بن سکدی ملک دی اکائیاں وچ کجھ اک انج دے چہرے نیں جنہاں نوں وطن عزیز دی بجائے اغیار دے مفادات دی فکر ہوندی اے جنہاں توں قوم آگاہ پر پی ڈی ایم شاید ایس لئی نظر انداز کرن اُتے مجبور اے مبادا نال نہ چھڈ جان پر نادان دوست دی رفاقت نفع بخش نہیں ہو سکدی پورس دے ہاتھی دا کردار ادا کرن والیاں توں دامن چھڑا لینا ای عقلمندی اے ایس وچ کوئی دورائے نہین کہ پی ڈی ایم دے بیانیے نال رائے عامہ نوں محمود اچکزئی دا شور متنفر کر سکدا اے کراچی وچ اردو اُتے تنقید تے ہن مینار پاکستان دے سائے تھلے لہوریاں نوں سامراج دا حمایتی کہنا ثابت کردا اے کہ نادان دوست راجہ پورس دے ہاتھی ثابت ہو رہے نیں جے اوہ پی ڈی ایم دے بیانیے نال مخلص ہوندے تے لہور جہے مسلم لیگ ن دے مرکز وچ انگریزاں، ہ ندوواں تے سکھاں دا ساتھ دین دے خلاف حقائق گل نہ کردے فیر وی پی ڈی ایم نال رکھن اُتے ای مصر رہندا اے تے ذہن وچ بٹھا لوے نقصان چکے گا۔
پنجاب وچ رتی برابر لسانی تعصب نہیں انفرادی نہیں اجتماعی سوچ نوں غلبہ حاصل اے، سندھ وچ سندھی رائج اے، بلوچ بلوچی وچ فخریہ گل کردے نیں جد کہ پختون وی گل بات دے دوران مادری زبان استعمال کردے نیں لکھائی پڑھائی وچ وی مقامی زباناں استعمال کیتیاں جاندیاں نیں پر پنجاب واحد صوبہ اے جتھے ذرائع ابلاغ وچ وی قومی زبان اردو رائج اے ایس لئی تسلیم کرنا پئے گا کہ پنجابیاں دا دل وی وڈا اے تے اوہ کردار وچ وی انج دا وڈا بھرا اے جیہڑا سب دی کڑوی کسیلی سن کے برداشت کردا اے۔ پنجاب وچ لکھاں افغان مہاجرین نوں بھرا بنا رکھیا اے ایہناں نوں کاروباری موقعے دے نال احترام وی حاصل اے جدوں اچکزئی جہے تاریخ توں نابلد سامراج دا ساتھ دین دے الزامات لا کے لسانی تعصب دی آبیاری کردے نیں تے ہمرکاب شخصیات نوں سرزنش کرنی چاہیدی اے۔
لہوریاں نوں طعنے دے کے محمود اچکزئی نے اصل وچ پنجاب نوں نیچا وکھان دی کوشش کیتی اے حالاں کے انگریزاں لئی ملک وچ سب توں زیادہ نفرت دا مرکز پنجاب دا دارالحکومت لہور ثابت ہویا جتھے مظاہرے تے جلسے ہوندے ذرائع ابلاغ نے وی غیر ملکیاں دے خلاف بولیا تے لکھیا صرف بولن تے لکھن دے نال باقاعدہ لڑائی وی کیتی جس دی رائے احمد خان کھرل روشن مثال اے جے رفیقان پی ڈی ایم درستگی وچ تامل نال کم لیندے ہوئے چپ رہندے نیں تے یاد رکھو پنجاب جیہڑی آبادی دے لحاظ نال ملک دا سب توں وڈا صوبہ تے وطن عزیز دا اناج گھر وی اے ایہنوں تنقید دا نشانہ بنا کے تحریک دی کامیابی دشوار اے اونج وی پی ڈی ایم دا بیانیہ تے اچکزئی دا شور متضاد نیں تے کیہ ایہہ مناسب نہیں کہ کشتی ڈبون دی بجائے بھارتی پتھر توں چھٹکارہ حاصل کر لیا جائے۔
انگریزاں، ہندوواں تے سکھاں دی حمایت دا لہوریاں اُتے الزام لان والے اچکزئی کیہ ایس حقیقت نوں جھٹلا سکدے نیں کہ ایہناں دا اپنا پنڈ وی انگریز دے قبضے وچ رہیا ایس دوران مقامی طور اُتے کسے نے مزاحمت نہیں کیتی ایسے طرح سریاب اُتے ہون والی سب توں پہلی یلغار 23 مارچ 1939وچ برطانیہ دی بنگال رجمنٹ نے کیتی جس وچ اک وی پنجابی شامل نہیں سی پر بنگالیاں نال تے اچکزئی نوں گلہ نہیں پر لہوریاں نوں طعنے دیندے پھردے نیں یا شاید ایہناں نوں بلوچستان دی بجائے افغانستان نال ای الفت اے انگریزاں نوں مزید فتوحات لئی بلوچ کاکڑ قبیلے نے افرادی قوت مہیا کیتی کچلاک فتح کرن والی برطانوی فوج وچ وی بنگالیاں، پشتوناں دے نال مہاراشڑ دے فوجی شامل سن ایہہ قبضہ 7 اپریل 1839 نوں ہویا۔ ایسے مہینے دی 12 تاریخ نوں قلعہ عبداللہ دے نال گلستان فتح کیتا گیا ساری لڑائیاں وچ کوئی لہوری فرد تے کیہ اک پنجابی تیکر نہیں سی اچکزئی قبیلے نے کیپٹن بوسن کوئٹ ولوں فوجی بھرتی دے اعلان اُتے لبیک کہندے ہوئے ملازمتاں حاصل کیتیاں تے افغانستان اُتے حملے لئی رستے بنان دی مہم وچ حصہ لیا خوجک پہاڑی کٹن وچ مقامی پشتون سب توں اگے تے نمایاں رہے اک وار نہیں برطانوی فوج نے افغانستان اُتے کئی حملے کیتے جنہاں وچ پشتون کاکڑ تے اچکزئی قبیلیاں دی نفری فرنٹ اُتے لائن لڑدی رہی مسلسل شکستاں اُتے انگریزاں دے پیر اُکھڑن لگے تے سردار غفور خان پانیزئی کاکڑ نے اگے ودھ کے حملہ آور استعمار نوں قبضہ برقرار رکھن دی راہ ہموار دی غفور خان دا لہور یا پنجاب نال کوئی تعلق نہیں سی۔
برصغیر اُتے حملہ آور افغانستان توں آندے رہے جنہاں نوں ہم مذہب جان کے پنجابیاں نے ساتھ دتا جے اہل پنجاب ساتھ نہ دیندے تے فتوحات دا سلسلہ دراز ہونا ممکن نہیں سی رنجیت سنگھ دے دور وچ البتہ پنجابی فوج پشاور تیکر گئی پر افغانستان تیکر نہ اپڑ سکی استعماری انگریز فوج دی مزاحمت کردے ہوئے پنجاب اُتے قبضے دی لمبے عرصے راہ روکے رکھی تاں ای ہندوستان نوں فتح کرن دے بعد پنجاب سب توں آخر اُتے برطانوی عملدرآمدی وچ آیا تاریخ وچ لہور دے اک انگریز دوست قزلباش خاندان دا وی تذکرہ ملدا اے۔ جس نے انگریزاں نوں افغانستان اُتے حملے لئی دو سو گھڑ سوار دتے تے انعام وچ لہور دے نواحی علاقے ٹھوکر نیاز بیگ دے کول وڈی جاگیر حاصل کیتی قزلباش خاندان وی پنجابی یا لہوری نہیں پختون سی ایس بارے کوئی مدلل جواب اے تے شور مچان دی بجائے اچکزئی آگاہ کرن، پختون، سندھی یا بلوچ دی کدی پنجاب وچ مخالفت نہیں ہوئی بلکہ افغانستان توں آن والے حملہ آوراں نے خوشحال پنجابیاں نوں لٹن دے نال تہہ تیغ کیتا فیر وی لہوریاں دا دل اینا وڈا اے کہ کدی کسے نوں طعنے نہیں دتے۔
محمود اچکزئی دے والد عبدالصمد اچکزئی نے ہمیشہ مسلم لیگ دی مخالفت کیتی تے کانگرس دا نال دتا تے تحریک پاکستان دی راہ کھوٹی کرن دی کوشش کیتی ایسے وجہ نال اکثر انتخابی میدان وچ ناکامیاں مقدر بن دیاں رہیاں محمود اچکزئی وی 1993 وچ نواز شریف دی حمایت نال قومی اسمبلی دے ممبر منتخب ہوئے فیر ایہناں نوں مینار پاکستان دے میدان وچ کھڑے ہو کے لہوریاں نوں کوسن دی ہمت کنج ہوئی ؟ بزرگ وی اغیار دے طرفدار تے ہن اولاد وی غیراں اُتے فدا، انج دے اپنیاں اُتے تہمت لا کے غیراں توں داد لین والیاں نوں پی ڈی ایم توں کڈ باہر کرنا ای دانشمندی اے نہیں تے پی ڈی ایم دے بیانیے نوں حاصل عوامی پذیرائی ضعف دا شکار ہو سکدی اے۔