حمایت اسلام طبیہ کالج ترقی دی شاہراہ اُتے اک قدم اگے

تحریر پروفیسر حکیم شفیق کھوکھر

ہندوستان وچ انگریزاں دی آمد تے برصغیر وچ عنان اقتدار سنبھالن توں پہلاں ایتھے طب یونانی تے آیورویدک طریقہ علاج رائج سی۔ طب یونانی واحد طریقہ علاج اے جیہڑا ماضی تے حال وچ حکمراناں دی سرپرستی دے بغیر اطباء کرام دی محنت جانفشانی تے مہارت پاروں لوکاں دی خدمت کردا آیا اے تے مقامی جڑی بوٹیاں دے استعمال نال لوکاں نوں ایہناں دی دہلیز اُتے سستی تے مجرب دوائیاں دے ذریعے صحت دی سہولت فراہم کردے رہے نیں۔ انگریزاں نے ہندوستان اُتے قبضہ کرن دے بعد جتھے دوجے معاملیاں وچ مقامی علوم و فنون تے صنعتاں نوں جنہاں وچ ڈھاکہ دی ململ وی شامل اے نقصان اپڑان بلکہ صفحہ ہستی توں مٹان دی کوشش کیتی اوتھے اوہناں نے طب یونانی نوں وی نشانہ بنایا تے ایہنوں ختم کر کے ایلوپیتھک نوں رواج دین دی کوشش کیتی۔ طب یونانی دے موئثر ہون تے مالک دے نامور اطباء کرام وچ حکیم اجمل خاں نے دوجے اطباء دی مدد نال ایہناں کوششاں نوں ناکام بنان لئی اپنی جدوجہد دا آغاز کر دتا بعد وچ محسن الملک حکیم محمد حسن قرشی، حکیم عنایت اللہ نسیم سوہدروی، حکیم غلام جیلانی، حکیم عبدالرشید تلمیز جیلانی، حکیم فقیر محمد امرتسری ،حکیم محمد موسی امرتسری، حکیم آفتاب قرشی، حکیم محمد عبداللہ، حکیم محمد جمیل (رتی والے) دیاں کوششاں نال طب یونانی ہندوستان وچ قائم وی رہی تے ہن تیکر موجود اے۔ افسوس تے ایہہ اے کہ قیام پاکستان دے بعد حکومت پاکستان نے ایس دی اہمیت نوں نظر انداز کردے ہوئے ایس دی سرپرستی کرن دی بجائے ایلوپیتھک طریقہ علاج تے غیر ملکی ادویہ ساز کمپنیاں دی نہ صرف حوصلہ افزائی کیتی بلکہ عوام نوں ایہناں دے رحم و کرم اُتے چھڈ دتا۔ہن اوہ جس دوائی نوں چاہندے نیں مارکیٹ توں غائب کر دیندے نیں تے بعد وچ منہ منگے ریٹا اُتے ویچدے نیں۔ ایہناں دناں وی دوائیاں دیاں قیمتاں وچ ہوشربا وادھے نے عوام و خواص نوں پریشان کر کے رکھ دتا اے ایتھوں تیکر کہ حکومت وی سرکاری ہسپتالاں تے ڈسپنسریاں وچ مفت دوائیاں دی فراہمی دا سلسلہ بند کر کے صحت کارڈ دا اجراء کرن اُتے مجبور ہو گئی اے۔
جے حکومت قیام پاکستان دے بعد نہ سہی موجودہ دور وچ ای قومی زبان اردو تے طب یونانی دی اہمیت نوں محسوس کر لوے تے ایہناں دونواں دی سرپرستی کرے تے ملک وچ شرح خواندگی تے صحت دا مسئلہ حل ہو سکدا اے۔ ویکھنا ایہہ اے کہ 1865 وچ قائم ہون والا ایہہ ادارہ 1907 انجمن حمایت اسلام دی سرپرستی وچ آن توں بعد 1965 وچ طبی بورڈ دے قیام دے بعد ڈپلومہ کورس دی تدریس دی ذمہ داری ادا کر رہیا اے۔ محسن الملک حکیم محمد حسن قرشی، حکیم محمد ارشد فارانی تے حکیم چودھری محمد عمر توصیف جہے نامور اطباء کرام دی قیادت تے انجمن دی موجودہ انتظامیہ میاں محمد منیر جرنل سیکرٹری ، چیئر مین طبیہ کالج کمیٹی حکیم عزیزالرحمن جگرانوی ، سیکریٹری پروفیسر ریاض الحق تے پرنسپل چودھری محمد عمر توصیف دہول دی محنت تے جدوجہد دے نتیجے وچ اک تناور سایہ دار درخت دی حیثیت کر گیا اے۔ ایس وچ بوہت جلدی FTJ دے نال نال BEMS ڈگری کورس دی کلاسز دا اجراء ہون جا رہیا اے جیہڑا طبی حلقیاں لئی وی خوش آئند اے تے کالج انتظامیہ لئی وی عزت افزائی دا باعث اے۔
ایس سلسلے وچ وفاقی و صوبائی وزراء صحت گورنر پنجاب تے وزیراعلیٰ پنجاب نال گزارش اے کہ اوہ ایس کالج دے شاندار ماضی تے روشن مستقبل نوں مدنظر رکھدے ہوئے ایس دی سرپرستی کرے ایس نوں مناسب بلکہ معقول گرانٹ جاری کرے۔ ایس ادارے دے فارغ التحصیل طلبہ نوں سرکاری ہسپتالاں وچ ملازمت دے موقعے فراہم کرے تے وزارت صحت، ہائر ایجوکیشن کمیشن تے نیشنل کونسل فار طب نال گزارش اے کہ FTJ ڈپلومہ ہولڈر اطباء کرام نوں BEMS ڈگری کورس وچ داخلے دی اجازت دتی جائے جس طرح ٹیکنیکل ایجوکیشن دے ڈپلومہ ہولڈز نوں B.Tec. (بی۔ٹیک) وچ داخلہ لین دی اجازت اے۔
کالج دی ایس ترقی نے جتھے عوامی حلقیاں نوں کالج دی انتظامیہ خاص طور اُتے حکیم عزیز جگرانوی تے ایہناں دی ٹیم نوں خراج تحسین پیش کرن اُتے مجبور کیتا اے اوتھے ایہناں نوں ایہہ امید وی دلوائی اے کہ ہن ایہناں نوں بہتر سستے تے مزاج دے مطابق علاج دی سہولت میسر آئے۔
ویکھنا ایہہ اے کہ حکومت پاکستان تے حکومت پنجاب ترقی دے ایس عمل وچ کیہ کردار ادا کردی اے تے ایس قدر فنڈ فراہم کردی اے کہ ایس ادارے دے فارغ التحصیل طلبا ء طب دے بین الاقوامی معیارات دے مطابق تعلیم تے تحقیق دی سہولت حاصل کر سکن۔