’’احتجاج۔احتجاج دی عادی قوم‘‘

تحریر: اکرم عامر سرگودھا

ملک وچ جس پاسے وی نظر مارو ہر پاسے غربت، لاقانونیت توں گھبرئای مایوسیاں دا شکار قوم دے مختلف طبقات تہانوں اپنے حقوق دے تحفظ، ظلم، جبر تے زیادتیاں دے خلاف احتجاج، احتجاج کردی وکھائی دے رہی اے۔ اک پاسے اپوزیشن دی 11 جماعتاں کپتان دی حکومت ڈیگن لئی سراپا احتجاج نیں تے اپوزیشن نے تے دسمبر توں فروری تیکر ملک دے وڈے شہراں وچ ڈویژن سطح اُتے احتجاج کرن دا اعلان وی کر دتا اے۔ ایسے دے نال پی ڈی ایم دے قائد مولانا فضل الرحمان نے کپتا ن دی حکومت نوں ڈیڈ لائن دے رکھی اے کہ 31جنوری تیکر حکومت چھڈ کے گھر چلے جائو نہیں تے اپوزیشن اسلام آباد ول لانگ مارچ کرے گی تے اپوزیشن جماعتاں دے ارکان قومی و صوبائی اسمبلیاں توں استعفیٰ دے دین گے، دوجے پاسے پورے ملک دے سرکاری محکمہ جات دا کلیئریکل سٹاف اپنے مطالبات دے حق وچ احتجاج کردے ہوئے ایہناں نوں مراعات، الائونسز دین تے تنخواہواں وچ وادھے دا مطالبہ کر رہیا اے، سندھ، پنجاب، بلوچستان، بشمول گلگت بلتستان نال تعلق رکھن والی محکمہ بہبود آبادی دی ہزاراں لیڈی ہیلتھ ورکرز سپروائزرز جو کہ لمبئے عرصے توں کنٹریکٹ اُتے کم کر رہیاں نیں۔ احتجاج کردے ہوئے حکومت وقت نال مطالبہ کر رہیاں نیں کہ ایہنہاں نوں نوکریاں اُتے مستقل کردے ہوئے تعیناتی توں ہن تیکر مراعات دتیاں جان؟ ایسے طرح پورے پنجاب وچ کنٹریکٹ اُتے کم کرن والے اساتذہ، پروفیسرز، محکمہ صحت، ایجوکیشن، محکمہ مال سنے دیگر سرکاری اداریاں دے ملازمین آئے دن احتجاج کردے وکھائی دیندے تے مطالبہ کردے نظر آندے نیں کہ ایہناں نوں وی ملازمتاں اُتے ریگولر کر کے مستقل ملازمین وانگوں مراعات تے سہولتاں دتیاں جان، پورے ملک دے 32 ریڈیو اسٹیشنز توں کڈے گئے 1020 کنٹریکٹ ملازمین اپنی بحالی لئی آئے دن اسلام آباد وچ احتجاج تے دھرنا دین وچ مصروف اے۔ جنہاں دا مطالبہ اے کہ ایہناں نوں نوکریاں اُتے بحال کیتا جائے۔ ایسے طرح پنجاب ہوئے یا سندھ، بلوچستان ہوئے یا کے پی کے ، گلگت بلتستان دے عوام نوں نکا موٹا مسئلہ در پیش آ جائے جیہڑا حل ہوندا نظر نہ آئے تے ایہو عوام جتھیاں دی صورت وچ احتجاج دا راہ اپناندے ہوئے سڑکاں اُتے ویکھدے جاندے نیں، سو ایہہ سارے احتجاج ہر کوئی اپنے مطالبے، مفاد تے مقصد لئی کردے نیں۔
پاکستان دے سارے صوبیاں خاص طور تے پنجاب دے ینگ ڈاکٹر وی احتجاج وچ کسے توں لُکے نہیں، آئے دن ہسپتالاں وچ ہڑتال، تالہ بندی کرنا ینگ ڈاکٹرز دا معمول اے۔ ، ایسے بنا اُتے عوام وچ ایہناں (ینگ ڈاکٹرز ) دے بارے تاثر اے کہ ایہہ ہر گل اُتے جارحانہ رویہ اپنا ندے نیں، پر تسیں ایہہ سن کے حیران تے ششدرہ جاواں گے کہ ینگ ڈاکٹرز ایسوسی ایشن پنجاب دے عہدیداراں دی ڈی ایچ کیو ہسپتال سرگودھا وچ پریس کانفرنس جس وچ راقم وی موجود سی وائی ڈی اے پنجاب دے صدر سلیمان حسیب، اسامہ بن سعید تے دیگر نے ڈاکٹرز دے مطالبات دے نال عوام لئی وی اواز بلند کیتی، تے پنجاب بھر دے ہسپتالاں وچ علاج معالجہ دی فراہمی وچ سستی کاہلی اُتے حکومت پنجاب نوں آڑے ہتھاں لیا تے کہیا کہ حکومت پنجاب ولوں عوام نوں طبی سہولتاں دی فراہمی لئی اوہ انتظامات نہیں کیتے جا رہے جیہڑے ہونے چاہیدے سن۔ جد کہ ڈی ایچ کیو سرگودھا، خوشاب، بھکر، میانوالی سنے پنجاب بھر دے ہسپتالاں وچ بیڈز دی کمی تے طبی سہولتاں تے دوائیاں دا فقدان اے،اکثر ڈسٹرکٹ سطح تے ٹیچنگ ہسپتالاں وچ سرجری ، گیسٹرولوجی، سائیکاٹری، سپیشلائزڈ آئی سرجری، برن یونٹ تیکر نہیں؟ غریب مریضاں دی سرکاری سطح اُتے علاج معالجہ دی سہولتاں ناپید ہون پاروں موتاں وچ وادھا ہو رہیا اے۔ کرونا دے مریضاں لئی وی سرکاری ہسپتالاں وچ سہولتاں نہ ہون دے برابر نیں، ایس دی وجہ ایہہ وی اے کہ سرگودھا سنے پنجاب دے اکثر سرکاری ہسپتالاں وچ ایڈمنسٹریشن، انتظامی امور تے مالی معاملات انج دے عناصر دے ہتھاں وچ نیں جیہڑے نہ تے ڈاکٹر نیں تے نہ ای ایہناں نوں شعبہ طب دی کوئی سوجھ بوجھ اے، ینگ ڈاکٹرز نے عوام دے نال ڈاکٹراں نوں پیش آئے مسئلیاں اُتے وی سیر حاصل گل بات کیتی، وائی ڈی اے دے ایہناں رہنمائواں دا ڈاکٹرز دے نال عوام دے حقوق لئی گل کرنا خوش آئند نظر آیا، دیگر احتجاجی طبقات نوں وی چاہیدا اے کہ اوہ اپنے مطالبات دے نال عوام نوں پیش آئے مسلیاں لئی وی اواز بلند کرن تے نا صرف مسئلے حل ہون گے بلکہ عوام خوشحال تے ملک ترقی یافتہ بن جائے گا؟پر نفسانفسی دے ایس دوروچ انج کون کرے گا، ایتھے تے سب اپنی اپنی بقاء، مفاد تے مقصد دی جنگ لڑ رہے نیں،سو گل کتھوں کتھے نکل گئی گل ہو رہی سی احتجاج دی تے قوم دا اکثریتی طبقہ لمبے عرصے توں حکومت دے ہر دور وچ احتجاج کردا نظر آ رہیا اے تے ہر حکومت نے احتجاج کرن والیاں نوں ایہناں دے مسائل حل کرن لئی کوئی نہ کوئی لالی پاپ دے کے ایہناں نوں چپ کروایا، یا ایہناں دے مطالبے نوں التوا وچ پایا اے۔ موجودہ حکمران وی ایسے پالیسی اُتے عمل پیرا نیں تے احتجاج کرن والے ہر طبقے نوں ایہناں دے مطالبات دے حل لئی طریقہ کار طے کرن لئی کمیٹی بنا کے یا مذاکرات دا جھانسہ دے کے ڈنگ ٹپا رہے نیں تے اپوزیشن نوں احتساب تے مقدمات توں ڈرا کے چپ رکھن دی پالیسی اُتے عمل پیرا نیں۔
پر کپتان جی انج کدوں تیکر چلے گا؟ تسیں تے آپ تبدیلی دا نعرہ لا کے اک لمبی احتجاجی تحریک چلا کے اقتدار وچ آئے نیں۔ آپ اپوزیشن دے نال مذاکرات جیہڑی لمبی ہون دا راہ اپنائو، تاں جے آپ دی حکومت اپنی آئینی مدت پوری کر لوے؟ پر احتجاج کرن والے انج دے طبقات جنہاں دے مطالبات جائز نیں نوں ایہناں نوں حق دین لئی کمیٹی، مذاکراتی ٹیماں بنان دی بجائے عملی اقدامات چکو کیوں جے تہاڈے اقتدار دا ادھا ویلا لنگھ چکیا اے تے ادھا لنگھن دے بعد تسیں فیر دوبارہ ووٹ حاصل کرن لئی عوامی عدالت وچ پیش ہونا اے ، ویلا لنگھدے کوئی دیر نہیں لگدی، کپتان جی جے کجھ کر نہ پائے تے تہاڈی داستان وی نہیں رہوے گی داستاناں وچ۔