’’اپوزیشن لانگ مارچ تے سینٹ الیکشن‘‘

تحریر: اکرم عامر سرگودھا

اپوزیشن جماعتاں، جلسے، جلوس، احتجاج کر کے حکمران جماعت پی ٹی آئی خاص طور تے کپتان نوں للکار رہیاں نیں تے اپوزیشن نے حکومت نوں گھر جان لئی 31 جنوری تیکر دی ڈیڈ لائن دے رکھی اے۔ اپوزیشن دے سربراہ مولانا فضل الرحمان نے حکومت دے دتی گئی تاریخ تیکر مستعفی نہ ہون دی صورت وچ یکم فروری نوں اسلام آباد وچ لانگ مارچ دی تاریخ دا اعلان کرن دا کہہ رکھیا اے جد کہ ایس توں پہلاں پی ڈی ایم نے 24 دسمبر نوں بہاولپور وچ احتجاجی ریلی، 27 دسمبر نوں لاڑکانہ وچ جلسے، 28 دسمبر نوں سرگودھا سنے کئی شہراں وچ احتجاجی جلسے کرن دا شیڈول جاری کر دتا اے۔اپوزیشن دا ایہہ شور شرابہ تے احتجاج کپتان دی حکومت لئی آفٹر شاک جھٹکے ثابت ہو رہے سن کہ حکومت نے مارچ 2021 وچ ہون والے سینیٹ انتخابات ویلے توں پہلاں فروری وچ کران دا اعلان کر دتا اے تے نال ای ایہہ وی کہیا اے کہ سینیٹ الیکشن شو آف ہینڈ دے تحت ہون گے، ماضی وچ قومی، صوبائی، اسمبلیاں تے سینیٹ دے انتخابات چونکہ خفیہ ووٹنگ دے ذریعے ہوندے آئے نیں ایس لئی حکومت نے الیکشن کمیشن تے سپریم کورٹ توں رجوع کرن دا فیصلہ کیتا اے۔ شو آف ہینڈ دے ذریعے سینیٹ الیکشن کران دی وجہ حکومت ہارس ٹریڈنگ نوں روکنا دس رہی اے جیہڑی ماضی وچ اسمبلیاں تے سینیٹ انتخابات وچ خوب ہوندی آئی اے۔حکومت دے ایس اعلان اُتے اپوزیشن جماعتاں خاص طور تے مسلم لیگ ن تے پیپلز پارٹی نوں آفٹر شاک جھٹکے لگے نیں، کیوں جے اپوزیشن تے فروری وچ اسلام آباد وچ احتجاجی دنگل لان دا اعلان کر کے ایہنوں کامیاب بنان لئی آئے دن اجلاس کر کے حکمت عملی طے کرن لگی ہوئی اے۔ حکومت دا سینیٹ الیکشن تے اوہ وی فروری وچ کران دا فیصلہ اپوزیشن دے اسلام آباد لانگ مارچ نوں ثبوتاڑ کرن دا منصوبہ لگدا اے۔ جس اُتے اپوزیشن تلملا رہی اے کہ شو آف ہینڈ دے ذریعے سینیٹ الیکشن حکومت دھاندلی لئی کر رہی اے۔ ایہہ اسیں کسے صورت نہیں ہون دین گے۔ حالانکہ مسلم لیگ ن تے پیپلز پارٹی نے پچھلے انتخابات تے چیئر مین سینیٹ دے خلاف عدم اعتماد دی ناکامی اُتے واویلہ کیتا سی کہ دھاندلی روکن لئی الیکشن شو آف ہینڈ تے دیگر طریقہ اُتے غور کیتا جائے، سو ہن حکومت سینیٹ الیکشن شو آف ہینڈ دے تحت کران جا رہی اے تے اپوزیشن ایس اُتے راضی نہیں تے سینیٹ دی ووٹنگ مارچ تے خفیہ طریقے نال کران دا مطالبہ کر رہی اے۔
قابل ذکر امر ایہہ وی اے کہ مسلم لیگ ن نوں سینیٹ وچ قانونی پیچیدگیاں دا وی ساہمنا کرنا پئے گا کیوں جے مسلم لیگ ن میاں نواز شریف دے ناں توں الیکشن کمیشن وچ رجسٹرڈ اے تے ہن میاں نواز شریف نااہل تے عدالت توں سزا یافتہ نیں۔ ایس صورت وچ مسلم لیگ ن سینیٹ وچ اپنے امیدواراں نوں ٹکٹ جاری نہیں کر سکے گی؟ ایس لئی مسلم لیگ ن چاہندی اے کہ سینیٹ الیکشن نہ ہون۔ بصورت دیگر سینیٹ الیکشن ہون اُتے مسلم لیگ ن دے امیدوار کسے ہور جماعت دے ٹکٹ اُتے الیکشن وچ حصہ لین گے جیہڑا مسلم لیگ ن دی قیادت لئی تکلیف دہ ہوئے گا۔ کیوں جے اوہ ہن وی ملک دی دوجی وڈی سیاسی جماعت ہون دی دعویدار اے۔
سیاسی ذرائع سینیٹ انتخاب نوں ویلے توں پہلاں تے شو آف ہینڈ دے ذریعے کران بارے کہندے نیں کہ ایس توں حکومت نوں تے کوئی فرق نہیں پئے گا پر اپوزیشن جیہڑا حکومت نوں ڈیگن تے کپتان نوں گھر بھجوان لئی احتجاج نوں شدت دینا چاہندی اے نوں احتجاج نوں تقویت دین دی منصوبہ بندی تے عوامی رابطہ مہم دے علاوہ حکومت دے نال قانونی جنگ وی لڑنی پئے گی۔ تے سینیٹ الیکشن مارچ وچ کران دے نال شو آف ہینڈ دی بجائے خفیہ ووٹنگ دے ذریعے کران لئی ایڑی چوٹی دا زور لانا ہوئے گا؟ ایہہ سارا بوجھ مسلم لیگ ن اُتے ہوئے گا؟ کیوں جے حالات عدنیہ دے رہے نیں کہ پیپلز پارٹی سینیٹ الیکشن توں پہلاں حکمت عملی تبدیلی کرے گی تے اسمبلیاں توں استعفیٰ نہیں دیوے گی؟ جس دی اک دلیل آصف علی زرداری دا سٹیج اُتے اعلان دے باوجود لہور جلسے نال خطاب نہ کرنا وی اے۔سیاسی پنڈت تے ایتھوں تیکر کہندے نیں کہ پیپلز پارٹی سینیٹ الیکشن خوب لڑے گی تے سرمایہ داراں نوں ٹکٹ دیوے گی؟ ایس طرح اپوزیشن وچ شامل 11 وچوں اٹھ جماعتاں (جنہاں وچ مولانا فضل الرحمان دی جماعت شامل نہیں) سینیٹ الیکشن وچ امیدوار کھڑے کرن دی پوزیشن وچ نہیں، کیوں جے ایہناں دی ایواناں وچ نشستاں گھٹ نیں، تے ایہناں دی سینیٹ الیکشن وچ دلچسپی وی ایسے حساب نال ہوئے گی۔
بہرحال 2021 دے سرد موسم دا ماہ فروری دا سیاسی ماحول گرما گرم ہوئے گا اپوزیشن احتجاج لئی زور لان دے نال سینیٹ وچ اپنی بقا دی جنگ لڑے گی تے حکومت اپوزیشن دے احتجاج نوں تلپٹ کرن دے نال سینیٹ وچ ودھ توں ودھ تعداد وچ اپنے سینیٹرز جتوان لئی ہر حربہ استعمال کرے گی؟
دوجے پاسے وزیراعلیٰ سندھ مراد علی شاہ اپنا استعفیٰ پی پی پی دے قائد دے حوالے کر کے بیرون ملک جا چکے نیں۔جس بارے تاثر دتا جا رہیا اے کہ سندھ اسمبلی سینیٹ الیکشن توں پہلاں ٹٹ سکدی اے۔ ذرائع کہندے نیں کہ انج کجھ نہیں ہون جا رہیا نہ سندھ اسمبلی ٹٹے گی تے نہ پیپلز پارٹی استعفیٰ دیوے گی؟ کیوں جے آصف علی زرداری ماضی وچ ہمیشہ مفاہمت دی سیاست تے جمہوریت دی بقا لئی متحرک رہے نیں۔موصوف نے 2013ء توں 2018ء تیکر (ن) لیگ دے دور وچ حکومت دے خلاف بھرپور اپوزیشن تے شور شرابا وی کیتا تے ایہنوں ن لیگ نوں اقتدار دی مدت وی پوری کرن دتی، سو جے ایس طرح ہو گیا تے اپوزیشن دے غبارے توں ہوا نکل جائے گی؟ جس دا ریلیف پیپلز پارٹی دی قیادت حاصل کرے گی۔ ذرائع کہندے نیں کہ سینیٹ الیکشن تے پیچیدگیاں پاروں شاید حکومت شو آف ہینڈ دے تحت کران وچ کامیاب نہ ہو سکے، کیوں جے سینیٹ وچ ہر ووٹر نے اک توں ودھ امیدواراں نوں ووٹ کاسٹ کرنا ہوندا اے۔ایس طرح شو آف ہینڈ دے ذریعے ووٹنگ کرانا مشکل ای نہیں ناممکن اے جس دا اٹارنی جنرل آف پاکستان برملہ اظہار وی کر چکے نیں تاں حکومت ایس دے متبادل کیہ طریقہ کار اپناندی اے ایہہ کہنا ویلے توں پہلاں اے کہ سیاست وچ کوئی گل حرف آخر نہیں ہوندی، سیاست مفادات دی جنگ دا ناں اے، جس وچ حریف سیاسی حالات ویکھ کے حلیف بن دے رہندے نیں تے ویلے دے نال ملک دا سیاسی منظر بدلدا رہندا اے تے غیر متوقع سیاسی اتحاد بن دے رہندے نیں۔
ایس لئی سیاست وچ کسے وی سیاسی جماعت توں کجھ وی بعید نہیں۔
گہ کتھوں کتھے نکل گئی گل ہو رہی سی اپوزیشن دے احتجاج تے حکومت دے جواب دی ، تے فروری وچ حکومت تے اپوزیشن وچ خوب میدان لگن جا رہیا اے، ویکھنا ایہہ اے کہ اپوزیشن حکومت نوں ٹاک آئوٹ کردی اے، یا حکومت اپوزیشن نوں؟ ایس بارے حکومت تے اپوزیشن کیہ لائحہ عمل اختیار کردی اے ایہہ آئندہ کجھ دن وچ واضح ہو جائے گا؟