دل دریا پاکستان ولوں نواز رائس ملز ورپال چٹھہ گجرانوالا وچ پنجابی مشاعرہ کیچ لائن
پورے پنجاب توں آدر جوگ شاعراں رَلت کیتی تے کلام سُنا کے خوب داد وصولی
رپورٹ: محمد اویس باسل
پورے پنجاب وچ پنجابی زبان، ادب تے ثقافت دے ودھا لئی کم کرن والی تنظیم دل دریا پاکستان دی چھتر چھاویں نواز رائس ملز ورپال چٹھہ گجرانوالا وچ پنجابی مشاعرے دا پربندھ کیتا۔ پروگرام دا آغازنعیم الدین فاروقی ہوراں قرآنی آیات دی تلاوت نال کیتاتے اسد عباس راز ہوراں آقاؐ دے حضور نعتیہ اشعار دی مالا پیش کرن دی سعادت حاصل کیتی۔
مہان پنجابی سیوک اُچ کوٹی پنجابی شاعر عاقب ستیانوی (جھنگ) ہوراں مشاعرے دی پردھانی کیتی۔علی احمد گجراتی ہوراں پروگرام دی نقابت کیتی،نال پنجاب تے پنجابی زبان دا مقدمہ پیش کیتا۔عامر نواز چٹھہ تے امتیاز قیس چھٹہ ہوراں اکٹھ دی مجمانی کیتی۔اچیچے پروہنیاں وچ میجرشہزاد نیّر، حنیف ساقی، اختر ڈار، رائے محمد خاں ناصر،عاصم پڑھیار تے صابر ناز ہوراں دے ناں شامل سن۔آدری پروہیناں وچ ریاض ارمان، سیف اللہ باجوہ، قیصر عباس قیصر، بشیر کمال، مقصودیاور، ارشد مخلص،عادل بادشاہ، زین جٹ،یونس تحسین سعید بھٹی تے طارق مغل ہوراں دے ناں شامل سن۔اس توں وکھ مان جوگ شاعراں وچ اسد عباس راز،عصمت اللہ سیکھو،ناصر مان،امتیاز قیس چٹھہ،مرزا سیف اللہ ساجد، رمضان تائب، ناصر شائق، شہباز احمد طور، آفتاب تابی،نعیم الدین فاروقی، خبیب احمد،مزمل حسین ناز، رضوان بھٹی تے طارق ملک ہوراں رلت کرکے مان ودھایا۔ سنن والیاں دی اک وڈی گنتی موجود سی.جنہاں نے شعراء دے کلام تے دل کھول کے داد دتی۔آن والے سبھناں پروہیناں دی ضیافت لئی بڑے اچیچ نال مچھی پیش کیتی گئی۔مشاعرے توں بعد موسیقی دا دور چلیا۔ جس وچ مہان گلوکار اسد عباس راز ہوراں اپنے فن دا بھرواں وکھالا کیتا۔ تے سنن والیاں دے دل موہ لئے۔پروگرام دے مجمان چودھری عامر نواز چٹھہ ہوراں آن والے سبھناں پروہیناں دا شکریہ ادا کیتا۔
