“ناگاں نوں کون پچھے”

تحریر: عدنان چودھری

نبی پاک دی وفات توں بعد دوجے خلیفہ دا دور حکومت اے۔22 لاکھ مربع میل دا حکمران اپنے ضمیر دی عدالت وچ حاضر کہہ ریا اے۔اگر دریائے فرات دے کنڈے تے اک بکری وی مر گئی تے عمر توں رب نوں کی جواب دیویں گا؟
میرے سامنے اخباراں دے تراشے پے نیں۔ ایہہ تراشے کٹ تے 22 کروڑ عوام نوں ریاست مدینہ دے وکھاے گے خواباں دے ٹوٹے ودھ نظر آندے نے۔ریاست مدینہ ثانی دے جو خواب وکھائے گے اوہ کرچی کرچی میرے سامنے نے تے میں سوچی پیا آں ساڈی عوام آن آلے کسے وی لیڈر دے نظریے تے کیوں ایمان لیاوے گی؟ اخباری تراشیاں تے کیتے لیاقت علی خان دا قتل اے تے کیتے فاطمہ جناح دا قتل کیس۔کیتے بے نظیر تے بمب حملہ تے کیتے سانحہ ساہیوال۔اینہاں تراشیاں چے ہی اک جامعہ کراچی دے طالب علم حیات بلوچ وی اے۔تے اینہاں تراشیاں چے کل اک ہور وادھا ہویا۔اے بالڑی عمر دا اسامہ ستی اے جو 22 ورھیاں دی حیاتی وچ اپنے جثے تے 22 گولیاں کھا کے ساڈی ریاست مدینہ تے لعنت پا ریا اے۔
پچھلی رات 2 وجے “اے ٹی ایس نے اسلام آباد دے علاقے “G-10” بائیس سالہ طالب علم نوں گولیاں مار کے شہید کر دتا۔اسامہ ستی بارہویں کلاس دا طالب علم سی اپنی پڑھائی دے خرچے پورے کرن لئی گڈی دی ڈرائیوری کردا سی۔اسامہ شمس کالونی اپنے سجناں نوں چھڈ کے آریاسی جدوں اوس نوں نشانہ بنایا گیا۔پولس ولوں بیان آیا اے کہ اسامہ نوں ناکے تے گڈی روکن لئی آکھیا گیا تے اوس گڈی ناں روکی جس کر کے دہشت گرد ہون دے شک تے اسامہ تے گولی چلائی گئی۔جدوں کہ اسامہ دے والد ولوں میڈیا مہرے کیتی گئی گل بات وچ اک ہور گل سامنے آئی۔اونہاں دا کہنا سی کہ اسامہ دا اک دن پہلے پولس دے جواناں نال رپھڑا ہویا سی تے اسامہ نے مینوں اونہاں بارے دسیا وی سی۔ پولس نے اسامہ توں اس گل دا بدلہ لین لئی اے قتل کیتا اے۔پوسٹ مارٹم رپورٹ مطابق اسامہ نوں17 گولیاں لگیاں نے تے موقع قتل توں 21 گولیاں دے خول ملے نے۔
پولس دے موقف مطابق اگر اسامہ نے گڈی ناکے تے نہیں روکی سی تے اوس تے گولیاں چلان دی اے کوئی ٹھوس وجہ نہیں۔گڈی نہیں روکی سی تے پولس نوں اس دا پچھا کرنا چاہی دا سی یا اگلے ناکے تے ڈکن دا پربندھ کرنا چاہی دا سی تے اگر گولی مارنی ای سی تے گڈی دے ٹائراں تے ماردے ناں کے اوس نوں نشانہ بناندے۔پاکستان دے قانون مطابق گڈی نہ روکن تے اوس تے گولی چلان دا پولس نوں کوئی حق نہیں۔پولس صرف اس صورت وچ فائرنگ کر سکدی اگر کڈی آلا پہلے فائرنگ کرے پر اگر کوئی ناکے تے گڈی نہ روکے تے پولس کول اس تے فائرنگ کرن دا کوئی اختیار نہیں۔پولس نے گڈی دے ٹائراں نوں نشانہ بنان دی بجائے گڈی وچ بیٹھے بندے تے گولی چلانا ایہہ ثابت کردا اے پولس تے اسامہ وچ سچی کوئی رولہ سی جس کر پولس اپنا بدلہ لین لئی اسامہ نوں قتل کر دتا۔سوال ایہہ ہے کہ اگر ساڈے حفاظتی ادارے ای اپنیاں دشمنیاں مکاون لئی وردی دا سہارا ورتن گے۔ساڈے رکھوالے ای سانوں مارن گے تے ملک دے ماڑے دن دور نہیں۔تے ایہہ گل اس ملک دی تباہی نوں بلاوا دیوے گی۔جداں ارشاد سندھو صاحب لکھیا اے
جتھے ہون جہالتاں
بگلے لان عدالتاں
کاں پے کرن وکالتاں
سبھ نوں ملن ذلالتاں
دل دا شیشا صاف نہیں رہندا
اوتھے فر انصاف نہیں رہندا
ہمیشہ دی طرحاں وزیراعظم پاکستان نے نوٹس لیا۔ خیر تہانوں پتا ای اے کہ عمران خان جس کم دا نوٹس لین اوس دا کی کی حال ہوندا اے۔وزیر اعظم صاحب نوٹس تے تساں سانحہ ساہیوال دا وی لیا سی۔اس دا کی نتیجہ نکلیا کی تسی دسنا چاہو گے۔ ریاست مدینہ دی عوام اے جاننا چاہندی اے آیا ایتھے ریاست مدینہ وانگوں انصاف وی ہوندا اے یا فر اے ریاست مدینہ صرف ناں دی ای ریاست اے۔
آیا تسی وی رب سامنے جواب دہ ہون تے یقین رکھدے او یا نہیں۔اگر یقین رکھدے او تے فر تہانوں ریاست مدینہ والے فیصلے وی کرنے پین گے۔زلفی بخاری تے شہریار آفریدی نوں مقتول دے گھر تعزیت کرن لئی گئے۔ شیخ رشید وی اونہاں نال افسوس کیتا۔سب حکومتی نمائندیاں دا ایہی آکھنا سی کہ انصاف دے تقاضے پورے کیتے جان گے ۔پاکستان وچ انصاف دے تقاضے جس طرحاں پورے ہوندے نہے اوس توں تسی وی واقف او۔حالے تک بانی پاکستان ،وزیراعظم لیاقت علی خان تے قاتلانہ حملے دی رپورٹ نہیں مل سکی۔ قوم دی ماں فاطمہ جناح دے قتل دا مسئلا حل طلب اے۔بے نظیر دا قتل نہیں سلجھیا۔اسامہ ستی تے فر کسے ماڑے دا پتر اے اس نوں کس پوچھنا۔اے تے رولا وی پولس دا اے کچھ دناں لئی آوازاں آن دیا تے اوس توں بعد اس کیس دی فاعل وی ردی دی ٹوکری وچ ہوے گی۔عوام دے ہتھ کوئی ہور شوشا آجاوے گا تے میڈیا کسے ہور بریکنگ نیوز لبن ٹریا ہوے گا۔ساست داناں نوں اپنی سیاست چمکان لئی کسے ہور گٹھناں دی پال ہوے گی۔مقتول دے گھر والے وی رو دھو کے بہہ جان گے۔کسے ماڑے دا ناں نہیں لیناں۔گل آئی گئی ہو جاوے گی۔
سوال ایہہ ہے کہ کٹو کٹ ایہہ مسئلا حل کیتا جاوے گا یا فر اس نوں وی اسی کاغذی کارروائی ای سمجیے۔ایہناں ناگاں نوں جو ساڈے ٹیکس دیاں تنخواواں کھاندے نے ساڈے ای پیسے تے پلدے نے تے فر سانوں ای اکھاں کڈدے نے، اینہاں نوں وی کوئی پچھے گا ؟ کوئی اینہاں نوں لگام پاوے گا؟
سمجن والیاں لئی
,,,,ناگاں نوں کون پچھے،،،،
ناگاں نوں کون پچھے
ڈنگاں نوں تیز کر کے
گلیاں چ پئے نیں پِھردے
پھناں چ زہر بھرکے
رکھاں دے نال لمکے
لگراں نوں نیل پاندے
مڈھوں سویر پٹ کے
تھاں تھاں انھیر لبھدے
ساہواں نوں روز چب کے
روحاں ڈکار جاندے
راتاں دے ہونٹھ چِتھ کے
دِناں نوں پیڑ جاندے
جسے تریڑ دیندی
جِدھروں وی شوک لنگھے
کنڈیاں تے جیبھ ٹر کے
گاندی اے گیت کہڑے
تمیاں جہے بول اتے
تِڑکن سریر سہمے
ددھاں دی کوڑ کیتا
لہو دا سفید جسا
واواں دے سِر تے بہ کے
آوندی اے روز ہونی
زخماں توں چور پینڈے
کہندے نیں روز کِہنوں
کوئی نہ دور جاوے
کوئی نہ باہر نکلے
پھردے بارود لے کے
جنتاں دے ڈھیٹھ دعوے
گھڑدا اے روز ویلا
خورے قانون کِنج دے
چھاواں دے لال کھوہ کے
رتاں یتیم کرکے
بندے نیں موت ونڈ کے
قاتل شہید ایتھے
ناگاں نوں کون پچھے
(ارشاد سندھو)