’’موجودہ سیاسی منظر نامہ‘‘

لکھت:اکرم عامر

گڑھی خدا بخش وچ بے نظیر بھٹو شہید دی 13 ویں برسی جیہڑی ایس لحاظ نال پہلی برسی سی کہ ایس وچ پی ڈی ایم بشمول مسلم لیگ ن دی قیادت نے بھرپور شرکت کیتی۔ ایس موقعے اُتے بلاول بھٹو زرداری تے مریم نواز شریف نے ولولہ انگیز تقریراں کیتیاں، بلاول بھٹو زرداری نے ایہہ عہد دہرایا کہ ایہناں دی پارٹی دے ارکان اسمبلی دے استعفے پی ڈی ایم دے پلیٹ فارم توں دتے جان گے،بلاول نے جیالیاں توں عہد لیا کہ اوہ اسلام آباد لانگ مارچ وچ بھرپور شرکت کرن گے، ہر صورت کپتان نوں گھر بھجوان گے پر پیپلز پارٹی ہر الیکشن پراسیس وچ شمولیت اختیار کرے گی یعنی کہ بلاول نے پی ڈی ایم دا واضح کر دتا کہ پیپلز پارٹی ضمنی الیکشن تے سینیٹ الیکشن وچ حصہ لین جا رہی اے۔ مریم نواز شریف نے بلاول نوں بھرا کہہ کے ایس عزم دا اظہار کیتا کہ اوہ سب مل کے کپتان دی حکومت نوں ڈیگن گے مریم تے بلاول دے خطاب نال ایہہ تاثر ابھریا کہ پیپلز پارٹی تے مسلم لیگ ن مستقبل دی سیاست وچ لازم و ملزوم ہوئے گی جد کہ بلاول تے مریم دے بیانیہ دے بعد ماسوائے پیپلزپارٹی دے دیگر جماعتاں دے قائدین تے کارکن ایہہ کہہ رہے سن کہ اپوزیشن دا اتحاد مضبوط اے تے پی ٹی آئی دی حکومت نوں ڈیگن لئی اپوزیشن یک نکاتی ایجنڈے اُتے متفق اے تے اپوزیشن کپتان دی حکومت نوں ٹف ٹائم دیوے گی، ایس امر نوں ہجے 48 گھنٹے وی نہ لنگھا پائے سن کہ خوش فہمی وچ مبتلا اپوزیشن دی قیادت تے کارکناں دی امیدا ں ایس ویلے دم توڑ گئیاں جدوں پیپلز پارٹی دے قائد آصف علی زرداری دے حوالے نال خبر آئی جس وچ پیپلز پارٹی دے ارکان اسمبلی دے استعفے میاں نواز شریف دی وطن واپسی توں مشروط کر دتے گئے تے نال ایہہ وی کہیا گا کہ میاں نواز شریف وطن واپس آ کے احتجاجی تحریک دے قائدین وی شامل ہون۔ یعنی
’’نہ نو من تیل ہو۔۔۔ نہ رادھا ناچے‘‘
گو کہ مسلم لیگ ن دے میاں نواز شریف عدالت توں سزا یافتہ تے بیرون ملک مقیم نیں اوہ (میاں نواز شریف ) تے اپنی والدہ دے جنازے وچ شرکت لئی وی وطن واپس نہیں آئے سن تے ایہناں نوں آنا وی نہیں چاہیدا سی کیوں جے اوہ زیر عتاب نیں ایہناں دے کیس عدالتاں وچ زیر سماعت نیں تے اوہ قانون نافذ کرن والے اداریاں نوں بطور مجرم تے ملزم مطلوب نیں۔ ایس صورت حال وچ ایہناں دی وطن واپسی لئی ماحول ساز گار نہیں، میاں نواز شریف دی کپتان دی حکومت دے دور وچ واپسی دا وی کوئی امکان نظر نہیں آندا ایس طرح سیاست دے کھلاڑی آصف علی زرداری نے اوہ کھیڈ کھیڈیا کہ ’’سانپ بھی مر جائے۔۔ اور لاٹھی بھی بچ جائے‘‘۔ پیپلز پارٹی دے قائد دا ایہہ بیان ایس گل دی واضح دلیل اے کہ ایہناں دی جماعت دے ارکان اسمبلی اپنے استعفے نہیں دین گے تے ایہناں دی جماعت ضمنی الیکشن تے سینیٹ الیکشن وچ بھرپور حصہ لین جا رہی اے۔
آصف علی زرداری سیاست دے پرانے کھلاڑی نیں تے اوہ اپوزیشن دا کھیڈ وی خوب کھیڈدے نیں تے برسر اقتدار حکومت نوں اپنی آئینی مدت وی پوری کرن دیندے نیں جس دی مثال پاکستان مسلم لیگ ن دا سابقہ دور حکومت اے، ایس ویلے پیپلز پارٹی وڈی اپوزیشن جماعت سی تے پیپلز پارٹی نے نواز شریف توں شاہد خاقان عباسی تیکر دی حکومت دے خلاف خوب اپوزیشن کیتی، پر مشکل ویلے وچ مسلم لیگ ن دی ڈگدی ہوئی حکومت نوں قائم رکھن لئی پیپلز پارٹی ای ن لیگ دا سہارا بنی۔ سیاسی حالات دس رہے نیں کہ پیپلز پارٹی پی ٹی آئی دی حکومت نوں ڈیگن دے حق وچ نہیں، شاید ایہہ پی ٹی آئی دے کپتان نوں وزارت عظمیٰ دے منصب توں اتارن لئی پی ڈی ایم وچ شامل ہوئی سی۔
پیپلز پارٹی دی قیادت تے جیالے الیکشن لڑنا خوب جان دے نیں جس دا عملی مظاہرہ گلگت بلتستان دے الیکشن وچ ویکھن نوں ملیا جتھے بلاول بھٹو زرداری اپنی جماعت دے امیدواراں دی آخری دن تیکر انتخابی مہم وچ آپ شامل رہے، دھواں دار پاور شو کیتے، گلگت بلتستان دے الیکشن وچ مسلم لیگ ن ، پی ٹی آئی، جمعیت علمائے اسلام، پیپلز پارٹی، مسلم لیگ ق تے دیگر جماعتاں نے اپنے سیاسی اتحاد توں وکھرا ہو کے الیکشن لڑے، پی پی پی وانگوں مسلم لیگ ن دی قیادت نے وی گلگت بلتستان الیکشن وچ خوب حصہ لیا، مریم نواز شریف، احسن اقبال سنے دیگر قیادت پولنگ دے بعد تیکر اپنے متوالیاں دے حوصلے بلند کرن لئی گلگت بلتستان وچ ڈیرے پائے ، ہرن والی جماعتاں نے حسب سابق حکومت اُتے دھاندلی دا الزام لایا ایہہ اوہ ای الزام اے جیہڑا انتخابات وچ ہر ہرن والی سیاسی جماعت لاندی اے۔
پی ڈی ایم دے اتحاد وچ شامل اپوزیشن جماعتاں دی قیادت ازمائش دا شکار اے نے 31 جنوری تیکر کپتان نوں حکومت چھڈن دی ڈیڈ لائن دے رکھی اے، بصورت دیگر یکم فروری نوں اسلام آباد ول لانگ مارچ دا اعلان ہوئے گا، لانگ مارچ کس دن، کدوں تے کس مقام اُتے ہوئے گا ایس دا تعین تے ہجے نہیں ہو سکیا تاں ایہہ گل طے شدہ اے کہ سردی پاروں لانگ مارچ فروری دے آخر یا مارچ دے شروع وچ ہوئے گا۔
ایتھے قابل توجہ امر ایہہ اے کہ سینیٹ وی فروری دے آخر یا مارچ دے شروع وچ ہون جا رہے نیں، بقول بلاول بھٹو زرداری ایہناں دی جماعت کسے الیکشن پراسیس توں باہر نہیں رہ سکدی تے ایس دے مطابق پیپلز پارٹی ضمنی، سینیٹ ، بلدیاتی، سنے ہر الیکشن وچ حصہ لوے گی پر عجیب منطق اے کہ پی ڈی ایم نے وی الیکشن وچ حصہ لین یا نہ لین بارے کوئی فیصلہ نہیں کیتا تے اوہ موجودہ حکومت دے دور وچ ہر الیکشن نوں فراڈ قرار دے رہی اے ایس دے باوجود پیپلز پارٹی دی قیادت نے انتخابات بابت اپنا فیصلہ وی سنا دتا تے پی ڈی ایم دے نال موہڈے نال موہڈا ملائے وی کھڑی نظر آ رہی اے پر سیاسی ذرائع واضح کہہ رہے نیں کہ آصف علی زرداری تے بلاول بھٹو دے بیانیہ توں بعد ایہہ گل واضح ہو گئی اے کہ پی ڈی ایم وچ شامل جماعتاں وچ ہم آہنگی نہیں تے پیپلز پارٹی مولانا فضل الرحمان توں بے نظیر بھٹو دی حکومت نوں غیر شرعی
قرار دین دا بدلہ چکائے گی تے بقول آصف علی زرداری کہ میاں نواز شریف نے پیپلز پارٹی دی قیادت دی کمر وچ کئی وار چھرا کھوبیا اے دا مسلم لیگ ن دے میاں نواز شریف تے دیگر قیادت توں حساب لوے گی، سیاسی ذرائع دے مطابق پیپلز پارٹی قومی و صوبائی اسمبلیاں توں استعفیٰ نہیں دیوے گی تے لانگ مارچ توں پہلاں پی ڈی ایم تے پیپلز پارٹی دیاں راہواں جدا ہوندیاں نظر آ رہیاں نیں تاں سیاست شطرنج وانگوں دا اک کھیڈ اے جس وچ حریف حلیف بن دے رہندے نیں، لانگ مارچ توں پہلاں ملک دا سیاسی منظر نامہ بدلدا نظر آ رہیا اے آن والے ویلے وچ کون پی ڈی ایم نوں چھڈ کے اقتدار دی کشتی وچ شامل ہوئے گا؟ تے کون حکومتی جماعت توں کنارہ کشی کر کے اپوزیش نال جا ملے گا ایس بابت کجھ کہنا قبل از وقت اے۔