استعفے تے لطیفے

تحریر حمیداللہ بھٹی

یکم جنوری دے نال نویں سال دا آغاز ہو چکیا اے۔ ویکسین دے باوجود ہجے تیکر کرونا دا پھیلائو جاری اے ایس لئی ماہرین کہندے نیں وبا اُتے جلدی قابو پا وی لیا گیا تے جنہی تباہی ہو چکی کئی دہائیاں تیکر اثرات محسوس ہوندے رہن گے۔ ایس ورہے ملکی مسائل دا خاتمہ ہو سکے گا؟ ایس سوال دا جواب دینا وی آسان نہیں کیوں جے ماضی وچ اشرافیہ نے عوامی مسائل دے حل وچ دلچسپی نہیں لئی بلکہ بے اعتنائی دا مظاہرہ کیتا اے عین ممکن اے معاشرتی رویے یکسر تبدیل ہو جان لنگھے ورہے حل طلب ملکی مسائل ختم نہیں ہو سکے بلکہ ریلوے، پی آئی اے، اسٹیل مل جہے اداریاں وچ موجود خرابیاں وچ وادھا ہویا اے ہن وی نویں سال دے آغاز اُتے بجلی، پٹرول تے ایل پی جی دے ریٹ ودھا کے خلوص ظاہر کیتا جا چکیا جانے مستقبل وچ ترکش دے کیہڑے تیر چلائے جان گے توقعات دی بجائے خدشات دامن گیر نیں۔
اقتدار مستحکم کرنا کسے دا دل پسند مشغلہ اے تے کوئی اقتدار وچ آن نوں بے چین اے ایہناں حالات وچ مسائل دے خاتمے دی توقع مناسب نہیں ملک وچ وسائل دی قلت یا ہنر منداں دا قحط نہیں بلکہ وسائل تے ہنر منداں توں استعفادے دی بجائے ق رض لین نوں ای نسخہ کیمیا سمجھ لیا گیا اے جس نال ملک اُتے قرضیاں دے انبار تے عوامی مسائل وچ ہوندا جا رہیا اے کسے نے اپنی عقل و دانش توں کم لے کے مسائل حل کرن دی کوشش ای نہیں کیتی لنگھے ورھے دے دوران مسائل دا خاتمہ تے نہیں ہو سکیا البتہ ملک توںدائیں تے بائیں بازو دی سیاست ضرور ختم ہو چکی اے اسلام پسند تے لبرل اج اک پلیٹ فارم اُتے اکٹھے نیں کاش سیاست لئی فکری جکڑ بندیاں ختم کرن وانگوں ملک وقوم دی بہتری لئی وی سارے اک ہو جان۔
آئی پی پیز نوں ادائیگیاں دا دبائو خطرناک حد تیکر ودھ چکیا، بجلی، گیس تے پٹرول دے ریٹاں وچ وادھے نوں معیشت دی بحالی نال تعبیر کیتا جا رہیا اے آٹے تے چینی دا بحران کمی و بیشی دے نال نہ صرف موجود اے بلکہ ماہرین تے سردیاں وچ بوہت گھٹ ملن والی گیس دے بحران وچ مزید وادھے دی نشاندہی کرن لگے نیں اک پاسے عوام دی سہولت لئی احساس پروگرام تے ہیلتھ کارڈ دا کریڈٹ لین دا شور تے نال ای ریلوے، تعلیمی اداریاں تے ہسپتالاں دی نجکاری اُتے کم جاری اے روزگار دے موقعے تے نہیں ودھے پر پی آئی اے تے اسٹیل مل دے ہزاراں ملازماں نوں کڈ دتا گیا اے تعمیراتی شعبے لئی بار بار پیکج دا اعلان کرن دے باوجود گروتھ نظر نہیں آ رہی بلکہ جمود دا تاثر اے کسے پاسے طائرانہ نگاہ پائو تے بہتری دے آثار مفقود نیں ایہناں حالات وچ معیشت دی بحالی دے دعوے اُتے یقین کرن نوں دل آمادہ نہیں جانے ملک دی قسمت وچ انج دے رہنما کیوں نیں جنہاں نوں تباہی وی خوشحالی نظر آندی اے۔
سیاسی سمندر وچ جنم لین والی جوار بھاٹے دی شدت وچ کجھ کمی ضرور آئی اے تے عمران خان توں استعفیٰ دے طلب گار آپ مستعفی ہون دے خواہش مند نیں پر 31 جنوری تیکر وزیراعظم توں استعفے دا مطالبہ کرن والے 31 دسمبر تیکر اپنی جماعتاں دے سارے ممبران توں وی استعفے نہیں لے سکے واقفانِ حال دا دعویٰ اے کہ اپوزیشن نال تعلق رکھن والے کئی اہم رہنما اپنی قیادت توں پچھلے کجھ ہفتیاں توں فاصلہ اختیار کر چکے نیں اوہ جذباتی فیصلے دی بجائے پارلیمانی سیاست کرنا چاہندے نیں ایسے بنا اُتے استعفیٰ تے لطیفے وچ کوئی فرق مٹ گیا اے ۔ مستعفی ہون والے صفائیاں پیش کردے پھردے نیں جاوید عباسی تے سجاد اعوان نے سیکرٹری قومی اسمبلی تے اسپیکر دے روبرو پیش ہو کے استعفیاں نوں جعلی کہہ کے تصدیق تو ں انکار کر دتا اے۔ حالانکہ ذرائع کہندے نیں دونواں نے جذبا ت وچ آ کے قیادت نوں گھلی جان والی استعفے دی اک کاپی قومی اسمبلی نوں وی ارسال کر دتی ۔ ہن جے قانونی پہلوئواں دی روشنی وچ اسپیکر فرانزک آڈٹ کراندے تے دستخط جعلی یا اصلی ہون دا ابہام دور ہو جاندا پر اسد قیصر نے ممبران دا موقف من کے سیاسی کشیدگی ودھان توں اجتناب کیتا جدوں سابق وزیراعظم شاہد خاقان عباسی تے نواز شریف دے داماد کیپٹن صفدر اعوان دے بھرا انج دا طرز عمل اپنان گے تے دوجے ممبران اسمبلی دی سنجیدگی دا اندازہ لانا کیہڑا مشکل کم اے۔
بادی النظر وچ استعفیاں دی دھمکی نال حکمراناں نوں ڈران دی کوشش نال اپوزیشن دی کمزوریاں بے نقاب ہون لگیاں نیں سیاسی استحکام لئی دونواں پاسے گل بات لئی تھوڑی جہی لچک وکھائی جائے تے مزاکرات نتیجہ خیز ہو سکدے نیں پر گل بات دی بجائے دبائو ودھایا جا رہیا اے۔ نواز شریف دے پاسپورٹ دی تجدید دی بجائے سولہ فروری نوں منسوخ کرن دا عندیہ دبائو ودھان دی کوشش اے پر ایس طرح دے فیصلیاں نال پرسکون سیاسی سمندر وچ طلاطم خیز موجاں دوبارہ جنم لے سکدیاں نیں ایہہ تے بھلا ہوئے پی پی دا جس نے استعفیاں دے فیصلے وچ رخںہ پایا تے پی ڈی ایم قیادت نوں ضمن تے سینٹ الیکشن وچ حصہ لین اُتے رضا مند کر لیا محمد علی درانی دی جیل وچ شہباز شریف نال ملاقات نال شروع ٹریک نو ڈپلومیسی دے اثر توں مُفر ممکن نہیں پر جدوں تیکر دونواں پاسے توں نرمی اختیار نہیں کیتی جاندی سیاسی حالات اتھل پتھل ہون دا امکان رد نہیں کیتا جا سکدا اٹ نال اٹ وجا دین والے بیان دا آصف زرداری کفارہ ادا کرن دی کوشش وچ نیں ایسے توں بظاہر حکومت اُتے دبائو گھٹ ہو رہیا اے تے پی پی وانگوں مسلم لیگ ن وی کسے نوعیت دے الیکشن دا بائیکاٹ کرن دی بجائے مقابلہ کرن اُتے رضا مند ہوئی اے جس نال ہور کجھ ہوئے نہ ہوئے سینٹ الیکشن توں پہلے بدمزگی دا گھٹ ای امکان اے۔
وزیراعظم نے بطور اپوزیشن رہنما دعویٰ کیتا سی کہ اوہ اقتدار وچ آ کے لٹی ہوئی دولت واپس لیا کے نہ صرف غیر ملکی قرض اتارن گے بلکہ ملک وچ خوشحالی لیان گے اوہناں نے تے مختلف شعبیاں وچ اصلاحات لیان دا وی وعدہ کیتا سی پر نصف مدت لنگھان دے باوجود ہجے تیکر انج کجھ نہیں کر سکے۔ آن لان سیمینار نال خطاب کردے ہوئے ایف بی آر دے سابق چیئر مین شبرزیدی نے اک ہوشربا انکشاف کیتا اے کہ پاکستانی تاجراں دے مالٹا جہے غیر ملکی بنکاں وچ 150 ارب ڈالر موجود نیں جنہاں دے نام و پتے وی معلوم نیں اک تاجر نال ملاقات دی رواداد وی سنائی۔ ایس توں علاوہ اپنی کتاب وچ تفصیل دسدے ہوئے رقماں اُتے تاجراں نوں اک یا دو فیصد معمولی منافع ملن دا انکشاف کیتا اے۔ ایہہ رقماں واپس لیا کے حکومت کارکردگی وکھا سکدی اے وعدے پورے کرن دا نادر موقع اے بدعنوان سیاستداناں توں تے سرمایہ نکلوا نہیں سکے جے تاجراں نوں ای قائل کر لوے تے قرضیاں توں دبائو دا شکار معیشت نوں نویں آکسیجن مل سکدی اے پر پہلے سرمایہ محفوظ ہون دا یقین دلانا ہوئے گا پکڑ دھکڑ دے ماحول نال سرمایہ دار بدظن ہوندے نیں ۔