‘‘ٹُٹدااپوزیشن اتحاد ’’

اپوزیشن اتحاد وچ شامل دو وڈی سیاسی جماعتاں مسلم لیگ ن تے پیپلز پارٹی نال ناراض وکھائی دے رہے نیں

تحریر: اکرم عامر سرگودھا

ملکی سیاست اک وار فیر پلٹا کھاندی وکھائی دے رہی اے تے پی ڈی ایم دے سربراہ مولانا فضل الرحمان آئے دن آفٹرشاک جھٹکیاں دا شکار ہو رہے نیں تے اوہ (مولانا فضل الرحمان ) اپوزیشن اتحاد وچ شامل دو وڈی سیاسی جماعتاں مسلم لیگ ن تے پیپلز پارٹی جیہڑی قومی وصوبائی ایواناں وچ مولانا فضل الرحمان دی جماعت توں بوہت زیادہ ارکان اسمبلی رکھدی اے توں نالاں وکھائی دے رہے نیں، پہلے ایہناں دے دست بازو مولانا شیرانی نے درجناں دیرینہ ساتھیاں جیہڑے پارٹی وچ نمایاں مقام رکھدے سن دے نال جمعیت علماء اسلام پاکستان نوں جے یو آئی توں وکھرا کر لیا اے تے اوہناں نے مولانا فضل الرحمان توں نہ صرف لمبی سیاسی رفاقت توڑ دتی اے بلکہ ایہناں دے بارے ایس قدر جارحانہ رویہ اپنایا اے جویں اوہ اک دوجے دے عرصے توں حریف ہون۔ ایس توں مولانا فضل الرحمان نوں نہ صرف ذہنی صدمہ اپڑیا اے بلکہ اپوزیشن اتحاد وچ وی اوہ کمزور ہو گئے نیں ، پیپلز پارٹی دے قائد آصف علی زرداری نے اپنی پارٹی دے ارکان اسمبلی دے استعفیاں نوں میاں نواز شریف دی وطن واپسی توں مشروط کر کے اگ وانگوں حکومت اُتے وسدی اپوزیشن نوں برف وچ لا دتا اے تے پیپلز پارٹی نے ضمنی تے سینیٹ الیکشن پراسیس وچ شمولیت دا اعلان کر کے مسلم لیگ ن دی قیادت نں وی اپنی جماعت دا اکٹھ کر کے سوچن اُتے مجبور کر دتا اے۔
ن لیگ دے ذرائع کہندے نیں کہ مسلم لیگ ن وی پیپلز پارٹی دی تقلید کردے ہوئے ضمنی تے سینیٹ الیکشن وچ حصہ لین دا فیصلہ کر چکی اے چونکہ مسلم لیگ ن دی قیادت دے ارکان اسمبلی دی اکثریت نے قومی و صوبائی اسمبلی دے ایواناں توں استعفیٰ دین دی مخالفت کیتی تے اوہناں نے پارٹی قیادت نوں وی ایس بارے واضح پیغام دے دتا اے کہ اوہ استعفے نہیں دین گے، جس اُتے مسلم لیگ ن دی قیادت نے نہ چاہندے ہوئے وی فیصلہ کیتا اے کہ قومی و صوبائی اسمبلی دے ایواناں نوں کھلا نہ چھڈیا جائے تے ضمنی و سینیٹ الیکشن وچ حصہ لیا جائے جس دا مسلم لیگ ن جلدی اعلان وی کر دیوے گی جس دی اک وجہ شاید ایہہ وی اے کہ پی ٹی آئی دے کپتان تے ایس دی کابینہ نے قومی و صوبائی اسمبلیز دے سپیکرز نوں واضح کہہ دتا اے کہ اپوزیشن دے جنہاں ارکان اسمبلی دے استعفے موصول ہون اوہ قبول کر لئے جان، کپتان نے تے بڑے اعتماد نال ایتھوں تیکر کہہ دتا کہ اپوزیشن دی اکثریت فارورڈ بلاک بنا رہی اے تے اپوزیشن دے ارکان اسمبلی استعفے دین گے ایہناں سیٹاں اُتے ضمنی الیکشن کروا دتا جائے گا تے ملکی سیاسی تاریخ دسدی اے کہ ضمنی انتخابات وچ ہمیشہ اکثریت برسر اقتدار پارٹی دے امیدوار کامیاب ہوندے نیں تے ایس صورت وچ ن لیگ تے پیپلز پارٹی مولانا فضل الرحمان دی جماعت جس دے ایواناں وچ ارکان اسمبلی پہلے ای محدود نیں تے رہی سہی کسر مولانا شیرانی نے ایہناں توں بغاوت کر کے کڈ دتی اے کہ پچھے لگ کے گھاٹے دا سودا نہیں کرن گے ایس طرح مولانا فضل الرحمان مستقبل قریب دی سیاست وچ کوئی امتحاناں توں لنگھن گے۔ گو مولانا فضل الرحمان دی سیاست 40 ورھے دے عرصے اُتے محیط اے اوہ پنج وار ملک دے بڑے ایوان (قومی اسمبلی) دے رکن منتخب ہوئے تے اوہناں نے اپنی سیاست دا زیادہ وقت برسر اقتدار جماعت دا اتحادی بن کے لنگھیا تے ملکی سیاست وچ کئی معرکے وی انجام دتے۔ پیپلز پارٹی ، ن لیگ تے مولانا شیرانی دے رویے نے مولانا فضل الرحمان نوں سوچ وچ پا دتا اے تاں مولانا فضل الرحمان پرانے کھلاڑی نیں، اوہ ایس بحران توں نکلن لئی آخری حد تیکر جدوجہد کرن گے۔ ذرائع ایہہ وی کہندے نیں کہ مولانا فضل الرحمان دی جماعت نے وی ضمنی انتخابات وچ حصہ لین دا فیصلہ کر لیا اے تے ایس گل داوی قوی امکان اے کہ ایہناں دی جماعت سینیٹ انتخابات وچ وی مسلم لیگ ن تے پیپلز پارٹی دی تقلید کردے ہوئے حصہ لوے گی تے سینیٹ دے ایوان وچ اپنے تن ارکان ممبر بنوان لئی بھرپور جدوجد کرے گی۔
دوجے پاسے مسلم لیگ ن دے تاحیات پارٹی قائد میاں نواز شریف جیہڑے کہ پہلے ای سزا یافتہ نیں لئی وی آئندہ مہینے پریشانی وچ وادھا ہون والا اے کیوں جے ایہناں دا پاسپورٹ 16 فروری نوں ختم ہو رہیا اے۔ پاسپورٹ ختم ہون دی صورت وچ ایہناں دا پاکستان توں بیرون ملک جان لئی لایا جان والا ویزہ وی ختم ہو جائے گا تے اوہ بیرون ملک دے ای ہو کے رہ جان گے، ایہناں دی پاکستانی شہریت اُتے وی نشان لگ جائے گا تے اوہ کسے دیگر ملک سفر کرن دی سہولت توں وی محروم ہو جان گے؟ بصورت دیگر ایہناں نوں پاسپورٹ تجدید کرانا ہوئے گا جس لئی ایہناں نوں وطن آنا پئے گا پر اوہ تے عدالت تے اداریاں نوں کیسز تے ریفرنسز وچ مطلوب نیں، وطن واپس آن دی صورت وچ ایہناں دا واپس جانا مشکل نہیں ناممکن ہوئے گا۔ ایہناں حالات وچ مسلم لیگ ن دے میاں نواز شریف مستقبل قریب وچ شدید دبائو دا شکار ہون گے۔ ایس طرح احتجاج احتجاج دا راگ الاپدی اپوزیشن دے سربراہ مولانا فضل الرحمان تے پی ڈی ایم دی بڑی اتحاد جماعت مسلم لیگ ن دے میاں نواز شریف لئی مستقبل قریب وچ مزید پریشانیاں ودھن گیاں پیپلز پارٹی دی قیادت چونکہ اپوزیشن اتحاد توں اپنی راہواں جدا کرن دا عندیہ دے چکی اے اوہ آن والے ویلے دے سیاسی ماحول نوں خوب انجوائے کرے گی۔ تے ماضی وانگوں حالات دا خوب فائدہ چکے گی۔ تاں سیاست وچ کوئی گل حرف آخر نہیں ہوندی ، ہو سکدا اے کہ مولانا رُسیاں نوں منا لین تے حکومت دے خلاف لانگ مارچ کرن وچ کامیاب ہو جان پر ایہہ گل طے شدہ اے کہ مسلم لیگ ن تے پیپلز پارٹی دے قیادت ضمنی تے سینیٹ الیکشن وچ حصہ لین دی صورت وچ حکومت دی رٹ نوں تسلیم کر لین گے کیوں جے اوہ ایس حکومت دے دور وچ الیکشن وچ حصہ لین گے جنہوں اوہ سلیکٹڈ تے دھاندلی زدہ کہندی رہیاں نیں۔ ایس طرح اگے اگے ویکھو ہوندا اے کیہ؟ کیہڑا سیاست دان اڑ کے کس منڈیر اُتے بیٹھ دا اے ایہہ وی آئندہ کجھ دن وچ واضح ہو جائے گا۔