عطاء اللہ خان نوں سینیٹ دا ٹکٹ دین وچ قباحت کیہ ؟
شوکت خانم کینسر ہسپتال دی بنیاداں وچ عطا اللہ عیسیٰ خیل خیلوی دی دن رات دی محنت شامل اے
لكهت:شکیل امجد صادق
اک دفعہ دا ذکر اے کہ اک بندا سمندر توں اک مچھی پھڑ کے لیایا تے ایہنوں اپنے گھر وچ موجود کھوہ وچ پا دتا۔
ایس کھوہ وچ مینڈکاں دی حکومت سی مینڈکاں نے جدوں اک نویں شے ویکھی تے پہلے تے اوہ ڈرے گھبرائے دور دور گھمن لگے آخر اک وڈے مینڈک نے ہمت وکھائی تے مچھی دے تھوڑا نیڑے گیا تے پچھیا : تو کون ایں؟
میں مچھی آں! مچھی نے جواب دتا، مینڈک : تو ایتھے کتھوں آئی ایں؟ مچھی: سمندر توں، میڈک: اوہ کیہ ہوندا اے؟مچھی: اوہ بوہت وڈا ہوندا اے تے ایس وچ پانی ہوندا اے۔ مینڈک نے کہیا: کنہا وڈا ؟ مچھی: بوہت وڈا، ایہہ سن کے مینڈک نے اپنے دوالے نکا جہیا گول چکر کٹیا تے فیر مچھی توں پچھیا: کیہ اینا وڈا ہوندا اے؟ مچھی ہسی تے بولی نہیں بوہت وڈا اے۔ مینڈک نے تھوڑا وڈا چکر لایا تے کہیا اینا وڈا؟ مچھی ہسی تے کہیا نہیں وڈا ہوندا اے۔ مینڈک ہن جوش وچ آ گیا تے ایس نے ادھے کنویں دا چکر لا کے مچھی ول ویکھیا، جویں پچھ رہیا ہوئے کہ ہن؟ مچھی نے فیر نفی وچ سر ہلایا۔ ہن تے مینڈک نے پوری رفتار نال پورے کھوہ دا چکر لایا تے مچھی نوں کہیا کہ ہن ایس توں وڈی تے کوئی شے نہیں۔ مچھی مسکرائی تے مینڈک نوں کہیا، تیرا قصور نہیں تہاڈی سوچ ای ایس کھوہ تیکر اے۔
ایسے طرح ساڈے معاشرے وچ کجھ لوک وی انج دے ہوندے نیں جنہاں دی سوچ ایس کھوہ دے مینڈک دے برابر ہوندی اے۔ ایہناں نوں لگدا اے کہ اوہ اپنے عقائد تے نظریات وچ سچے تے کھرے نیں۔ انج دے لوکاں نال لڑائی یا بحث کرن دے بجائے ایہناں نوں ایہناں دے حال اُتے چھڈ دیو تے ایہناں دی سوچ اُتے مسکرا کے اگے نکل جائو۔ خان صاحب ! عطا اللہ خان عیسی خیلوی ایس قدر وی انج دے بندے نہیں کہ جنہاں دے بارے وچ بدگمانی یا دوجی کوئی رائے قائم کیتی جائے۔ پھُلا ں دے نال کنڈے دا ہوندا اک فطری عمل اے۔ انج عیسی خیلوی دے در تے وی کوئی مفاد پرست ٹولہ ہوئے گا جیہڑا ایہہ قطعاً نہیں چاہندا ہوئے گا کہ عیسیٰ خیلوی سیاست دے میدان وچ اگے آن تے اپنی فہم و فراست دے بل بوتے اُتے غریب عوام لئی کجھ کرن۔ سیاست وچ موروثیت نوں قطعاً عمل دخل نہیں ایہہ تے اوہ میدان اے کہ جیہڑا مرضی سیاسی پہلوان آئے تے اپنی فہم و فراست تے فکر و عقل دے جوہر وکھائے جد کہ خان صاحب عیسیٰ خیلوی نوں عرصہ دراز توں جان دے نیں تے گاہے گاہے ایہناں دی سیاسی کوششاں دا دم وی بھردے رہندے نیں جد کہ کسے وی عہدے دے سلسلے وچ خان صاحب نے عیسیٰ خیلوی دے نال بقول شاعر :
گل پھینکے ہیں اوروں کی طرف بلکہ ثمر بھی
کچھ تو اے خانہ براانداز چمن ادھر بھی
جناب عالی! دنیا وچ بوہت گھٹ ملک، شہر یا بستیاں انج دیاں ہون گیاں جنہاں دی وجہ شہرت صرف اک ای بندا بیا ہوئے گا فیر اوہ شہر، اوہ بستی، اوہ پنڈ، ایسے اک ای بندے توں شہرت عام بقائے دوام دی ساری سرحداں پار کر گیا ۔ عیسیٰ خیل جہی گمنام، ہر لحاظ پسماندہ تے دور افتادہ بستی جے نجی دے جزائر توں لے کے بحر اوقیانوس تے پوری دنیا وچ پہنچانی جاندی اے تے ایس پہچان دا سہرا فرزند میانوالی پرائیڈ آف پرفارمنس ستارہ امتیاز، عطاء اللہ خان عیسیٰ خیلوی دے سر جاندا اے۔ واضح رہوے کہ عیسیٰ خیلوی دنیا دا اوہ واحد گلوکار اے جیہڑا اپنے فن دا آپ ای موجد اے تے آپ ای خاتم اے۔
ایہہ اوہ فنکار اے جس نے اپنے قبیلے، اپنی ذات تے خودی نال بغاوت کر کے ملک و قوم دا ناں روشن کیتا تے انج دا روشن کیتا کہ رہندی دنیا تیکر دنیا ایس دے گیت گائے گی تے لوک موسیقی نوں انج دا دوام تے پائیداری بخشی کہ سرائیکی تے پنجابی زبان آپ ایس اُتے فخر کرن لگی۔ جدوں گل آئی شوکت خانم کینسر ہسپتال لئی چندہ اکٹھا کرن دی تے ایس بندے نے اندرون تے بیرون ملک وچ اپنی خدمات عمران خان دے حوالے کر دتیاں ایہہ کہنا بے جا نہ ہوئے گا کہ شوکت خانم کینسر ہسپتال دی بنیاداں وچ عطا اللہ عیسیٰ خیل خیلوی دی دن رات دی محنت شامل اے۔ شوکت خانم کینسر ہسپتال دی چندہ اگاہن دی تاریخ وچ عیسیٰ خیلوی ہلاکم و کاست سنہری حروف نال لکھیا جائے گا۔ ہن آنے آں سیاست ول تے خاص طور تے پاکستان تحریک انصاف دی سیاسی مہم ول ، عطا اللہ عیسیٰ خیلوی اوہ سیاسی کارکن سی جس نے ’’جناب ‘‘ دے شانہ بشانہ دن رات اک کر دتا۔ بغیر کسے صلے تے ستائش دے لالا نے آپ دے ہر جلسے نوں کامیاب بنان دی حتی المقدور کوشش کیتی حتیٰ کہ کئی کمپین کیمپاں وچ آپ سرپرستی کیتی۔ آپ نے دامے، درمے، سخنے پاکستان تحریک انصاف دی بھرپور خدمت کیتی فیر چشم فلک نے ویکھیا کہ عیسیٰ خیلوی دے اک ترانے نے عوام دے دلاں نوں گرما دتا تے ثابت کر دتا کہ واقعی ای ’’عمران ‘‘ آئے گا تے ’’عمران ‘‘ آ گیا ۔ پاکستان تحریک انصاف نوں کامیابی ملی تے عمران خان صاحب دی حکومت بن گئی۔ عمران خان صاحب دی کامیابی وچ ایتھے پوری تحریک دا 50 فیصد رہیا اوتھے کلے تے تن تنہا عطا اللہ عیسیٰ خیلوی دا پجاہ فیصد حصہ اے۔
ایس امر توں بالکل انکار ممکن نہیں پر ایہہ درویش صفت تے عقاب جہی خوبیاں دا مالک بندا خود داری دی شامل اوڑھ کے اپنی کٹیا وچ آ گیا تے ’’سب مایا ہے سب مایا ہے ‘‘ دا راگ الاپن لگیا۔ پنجابی دا اک اکھان اے کہ ’’ جہنوں بیٹھا نئیں دسدا اوہنوں کھلوتا وی نئیں دسدا …‘‘ شاید عطا اللہ خان عیسیٰ خیلوی دے ذہن وچ وی ایہہ گل آ گئی ہوئے ۔ ایہہ گل محض میری قیاس آرائی اُتے مبنی سی پر ویلے نے ایہہ ثابت کر دتا کہ ایہہ گل سچ ای سی۔ جناب وزیراعظم صاحب تہاڈے نال گزارش کہ فرزند میانوالی، دور اندیش سیاستدان ، ایس درد دل رکھن والے انسان جنہاں نوں دنیا عطا ء اللہ خان عیسیٰ خیلوی دے ناں توں جان دی اے۔ ایہناں نوں ’’ سینیٹ ‘‘ دے الیکشن دا ٹکٹ عطا کیتا جائے تے ایس دی سیاسی بصیرت نال بھرپور فائدہ چکیا جائے کیوں جے عیسیٰ خیلوی صاحب اک جہاندیدہ انسان نیں۔ اوہناں نے دنیا ویکھ رکھی اے۔ ایہناں دی سوچ سمندر دی وسعتاں نوں جان دی یاے اوہ کھوہ جہی محدود سوچ دے مالک نہیں تاں ایہناں نوں سینیٹ دا ٹکٹ دین وچ کوئی قباحت نہیں۔
