طنزو مزاح

اک پاسے کرونا دا دوجا حملہ ہو چکیا اے، دوجے پاسے ڈینگی تے دوجی وبائی بیماریاں دا خدشہ اے

لكهت:حکیم فیق کھوکھر

ساڈی بے احتیاطیاں تے ایہناں دے نتیجے علامہ اقبال ؒ نے کیا خوب کہا ہے کہ
؎ ہے دل کے لئے موت مشینوں کی حکومت
احسا س مروت کو کچل دیتے ہیں آلات
پوری دنیا وچ جدوں صنعتی ترقی دا آغاز ہویا اے انسانیت دے اعلیٰ معیارات وچ گراوٹ ہوندی جا رہی اے۔ اک زمانہ سی جدوں اسیں دوجے نوں نقصان اپڑان دی بجائے ایس دی مشکلات نوں گھٹ کرن اُتے توجہ دیندے سن۔ ساڈے حکمران اپنی اپنی سطح اُتے لوکاں دے مسائل حل کرن دا اہتمام کردے سن۔ حضرت عمرؓ اپنے دور خلافت وچ رات نوں بھیس بدل کے شہر دا چکر لاندے تے جدوں وی کسے نوں مشکل وچ ویکھدے تے ایس دی مشکل دا فوری ازالہ فرماندے۔بعد وچ بوہت سارے حکمراناں نے ایہہ سلسلہ جاری رکھیا ایہناں وچ ظہیر الدین بابر دا مست ہاتھی دا مقابلہ کر کے اک بچے نوں ایس دی زد توں بچان دا واقعہ وی تاریخ دا حصہ اے۔پر انگریزاں دے ۃندوستان اُتے قبضہ کرن تے اپنے انداز نال حکومت کرن دے بعد ایہناں ذریں روایات نوں نظر انداز کر دتا گیا۔ ہن حکمران ایہہ نہیں کہندے کہ
؎ تڑپے کوئی جہاں میں روتے ہیں ہم امیرؔ
بلکہ کہندے نیں ۔
؎ اپنی بلا سے باد صباء اب کبھی چلے۔
ایس بے حسی دا نتیجہ اے کہ لوک ڈرائیونگ دے دوران وچ موبائل دا بے دریغ استعمال کردے نیں۔ بازار توں شیواں خریددے نیں تے سر عام کھا کے کچرا اوتھے سڑک اُتے سٹ دیندے نیں تے اپنے آپ نوں بوہت مذہب تصور کردے نیں۔تعلیمی اداریاں وچ جانور بنھ دے نیں، یا ایہناں دے باہر کچرا سٹ کے یا سر عام گندگی سٹ تے گندگی نوں نذر آتش کر کے (ایس دی اک مثال، گورنمنٹ کالج آف کامرس برائے خواتین گجرات دے ساہمنے گندگی دے انبار دی موجودگی وی اے ) مارکیٹاں وچ کچرا پھینک تے سرعام گندگی ودھا کے ایہہ تصور کردے نیں کہ اسیں کوئی بوہت وڈا کارنامہ انجام دتا اے۔ پر ایہہ نہیں ویکھدے کہ کدھرے انج نہ ہوئے کہ ساڈی ایس حرکت پاروں کسے دی جان جا سکدی اے۔ کسے دے مستقل طور اُتے اپاہیج ہون دا خطرہ اے۔ کسے دا سہاگ اجڑن تے کسے دے سر توں مان یا پیو دا سایہ اٹھن دا ڈر اے۔
ایہو حال ساڈے سیاستداناں دا اے اک زمانے وچ اسمبلی دی زبان اک محترم تے مدبرزبان تصور ہوندی سی تے کسے دی بدزبانی نوں ایہہ کہہ کے روک دتا جاندا سی کہ تسیں غیر پارلیمانی زبان استعمال نہ کرن پر ہن اسمبلی وچ بولی جان والی زبان … (اسیں ارکان اسمبلی اُتے اعتراز کرن والے کون نیں؟)
ساڈے ایہناں رویاں نے سانوں بیماریاں دا شکار بنا دتا اے۔ اسیں کھرباں روپئے ایہناں بیماریاں دے علاج اُتے تے خرچ کر دینے آں تے غیر ملکی مہنگی دوائیاں دی درآمد اُتے وی مجبور نیں ، پر اپنے انداز نوں بدلن اُتے تیار نہیں۔ تیار تے اسیں اپنی قومی زبان اردو نوں ملک دی دفتر تے تدریسی زبان بنان اُتے وی نہیں۔ نکے نکے بالاں دی کمراں نوں غیر ملکی مہنگی تے موٹی کتاباں دے بوجھ پاروں بچپن وچ ای دوہری کرنا برداشت اے پر ایہناں نوں مادری تے قومی زبان وچ تعلیم دینا برداشت نہیں حالانکہ ہر بچے نے بیرون ملک جا کے کم نہیں کرنا پر اسیں ایس اُتے کدی غور ای نہیں کیتا۔ نہ ای اسیں فاطمہ قمر دے گلاں اُتے توجہ دتی اے نہ ای مدثر اقبال بٹ دی گلاں اُتے توجہ دینا شروع کیتا اے فیر وی اسیں اپنے آپ نوں مہذب اکھواندے نیں۔
دور کیوں جائیے لہور دی اہم مارکیٹاں جنہاں وچ مون مارکیٹ علامہ اقبال ٹائون وی شامل اے صحت و صفائی دا نظام انتہائی ابتر اے۔ اک پاسے کرونا دا دوجا حملہ ہو چکیا اے، دوجے پاسے ڈینگی تے دوجی وبائی بیماریاں دا خدشہ اے۔ بلدیاتی ادارے مفلوج تے مارکیٹ کمیٹیاں غیر فعال صفائی دی ذمے داری کس اُتے پائی جائے؟ عوام پریشان نیں جان تے کتھے جان ؟
ایہناں نوں پریشان سوچاں نے روزنامہ آزادی لہور دے ایڈیٹر سید سرمد جعفری نوں کئی مہینے لئی بستر علالت اُتے لٹا دتا اے۔ ہویا انج کہ اوہ ملکی حالات دی سوچاں وچ گھٹ اپنے دفتر دی سیڑھیاں توں اتر رہے سن ، کہ کسے نامعلوم بندے ولوں سٹے ہوئے شیشے دے ٹکڑیاں پاروں پیر پھسلن دی وجہ نال ایس طرح ڈگے کہ نہ صرف پیراں دی ہڈیاں ٹُٹیاں بلکہ ایہناں اُتے شدید زخم وی آئے۔ انج اک چلدا پھردا انسان اک شخصی غلطی نال بسر علالت اُتے جا اپڑیا۔
ہاں اک گل قابل غور تے باعث تسلی اے کہ علاقے دے معززین جنہاں وچ سید توصیف شاہ تے طارق صدیق ،سید فاطر ولیدتے دوسرے احباب وی شامل نیں ایہناں د خبر گیری تے عیادت دی ذمے داری نبھائی اے۔ سوال ایہہ پیدا ہوندا اے کہ اسیں انج دے حادثات توں کدوں سبق سکھاں گے تے صحت و صفائی دا خیال رکھن توں کدوں تیکر گریز کراں گے؟ تسیں وی ایس اُتے غور کرو اسیں وی کرنے آں اللہ سانوں درست فیصلے کرن دی توفیق عطا فرمائے تے سید سرمد شاہ نوں جلدی توں جلدی صحت کاملہ عطا فرمائے۔ آمین