پاکستان دی دھی، ارفع کریم رندھاوا
کم عمر ترین مائیکروسافٹ سرٹیفائیڈ پروفیشنل دی سند حاصل کرن والی،فخرِ پاکستان تے فخرِ پنجاب
اختر سردار چودھری
ارفع کریم فیصل آباد دے اک نزدیکی پنڈ رام دیوالی وچ 2 فروری 1995ء نوں پید اہوئیاں۔ آپ دے والد امجد کریم رندھاوا اک (ر) آرمی افسر نیں۔ ارفع کریم صرف تن ورہے دی عمر وچ ای سکول وچ جان لگی۔ نو ورھے دی عمر وچ 2004 وچ مائیکرو سافٹ سرٹیفائیڈ پروفیشنل دا امتحان پاس کر کے انفارمیشن ٹیکنالوجی وچ اک تہلکہ مچا دتا۔ ارفع کریم رندھاوا پاکستان دی کم عمر ترین مائیکرو سافٹ سرٹیفائیڈ پروفیشنل ہون دا اعزاز وی حاصل کیتا۔ ایس نال پوری دنیا وچ پاکستان دا ناں روشن ہویا جس نال دنیا وچ ایہہ پیغام گیا کہ پاکستان وچ ٹیلنٹ دی کمی نہیں۔
دوجے پاسے ارفع کریم نے ایہہ پیغام دتا کہ تعلیم وچ اگے ودھ کے دنیا دے ساہمنے پاکستان دا اصل چہرہ ویکھایا جا سکدا اے۔ ارفع کریم جدوں بل گیٹس نال ملیاں تے ایس دے بارے وچ کہیا گیا کہ پاکستان دا دوجا رخ اے۔ ارفع کریم نوں پاکستان دے دوجے چہرے، اک روشن چہرے دا ناں دتا گیا۔ ارفع کریم رندھاوا مائیکرو سافٹ کارپوریشن دی دعوت اُتے جولائی 2005ء وچ اپنے والد دے نال امریکہ گئیاں جتھے ایہناں نوں دنیا دی کم عمر ترین مائیکرو سافٹ سرٹیفائیڈ پروفیشنل دی سند دتی گئی۔ کمپیوٹر دا ناں لئے تے ساڈے دماغ وچ بل گیٹس دا ناں وی آندا اے۔ بل گیٹس دا ایہہ کارنامہ اے کہ اوہناں نے کمپیوٹر ٹیکنالوجی نوں وسعت دتی، آسان بنایا، عام بندیاں تیکر ایس دی رسائی ممکن ہوئی۔ بل گیٹس دنیا دے امیر ترین بندیاں وچوں اک نیں۔ اک عظیم ہستی جس دی زندگی بوہت مصروف اے۔ بل گیٹس نے ارفع کریم نال 10 منٹ ملاقات کیتی۔ ارفع کریم دی حوصلہ افزائی وی کیتی۔ کہیا جاندا اے کہ ارفع کریم توں زیادہ بل گیٹس ایس توں متاثر ہوئے۔
ایس ملاقات وچ بل گیٹس نے ارفع کریم نوں دنیا دی کم عمر ترین مائیکرو سافٹ سرٹیفائیڈ اپلی کیشن دی سند وی پیش کیتی سی۔
ایہہ نہ صرف ارفع، ایس دے والدین، بلکہ پورے پاکستان لئی اک فخر دی گل سی۔ ایس ملاقات وچ بل گیٹس نے ارفع کریم نوں کہیا، اوہ تے ایہہ وی پاکستان دا اک چہرہ اے کہ تہاڈی جہی کُڑیاں وی اوتھے نیں؟ نہیں تے میں تے ایہو سمجھدا سی کہ اوتھے کُڑیاں نوں پڑھن نہیں دتا جاندا، ارفع نے بڑے اعتماد نال بل گیٹس نوں کہیا، پاکستان دا بس ایہو چہرہ اے۔ ایہہ سی ا رفع کریم پاکستان دا چہرہ۔ ایہہ اک بوہت وڈا اعزاز سی۔ ارفع کریم نے بل گیٹس دے نا ناشتہ وی کیتا سی۔ ایس دے علاوہ دبئی وچ انفارمیشن ٹیکنالوجی ماہرین ولوں دو ہفتیاں لئی ایہناں نوں مدعو کیتا گیا، جتھے ایہناں نوں مختلف تمغہ جات تے اعزازت وی دتے گئے۔
ارفع کریم نے دبئی دے فلائینگ کلب وچ صرف 10 سال دی عمر وچ اک طیارہ اڑایا تے طیارہ اڑان دا سرٹیفکیٹ وی حاصل کیتا۔ ارفع کریم نوں 2005ء وچ ایس دی صلاحیتاں دے اعتراف وچ ’’صدارتی ایوارڈ‘‘ ،مادر ملت جناح طلائی تمغے، تے ’’ سلام پاکستان یوتھ ایوارڈ‘‘ نال وی نوازیا گیا۔ صرف 10 سال دی عمر وچ اوہناں نے ’’پرائیڈ آف پرفارمنس ‘‘ وی حاصل کیتا جس نوں حاصل کرن لئی عمر لگ جاندی اے۔ مائیکرو سافٹ نے بارسلونا وچ منعقدہ سن 2006ء دی تکنیکی ڈیولپرز کانفرنس وچ پاکستان بھر وچوں صرف ارفع کریم نوں مدعو کیتا سی۔ پوری دنیا توں پنج ہزار توں ودھ مندوبین وچوںپاکستان دا روشن چہرہ صرف ارفع کریم سی۔ ایہہ پاکستان لئی اک بوہت وڈا اعزاز سی۔ ملک و قوم دا فخر سی۔
پاکستان دی دھی، پرسراریت دے پردیاں وچ لُکی ہوئی پری پر سرار طور اُتے ایس دنیا توں کوچ کر گئی۔ ایس نے 16 ورہے دی عمر وچ اوہ سب حاصل کر لیا جو کرنا سی۔ پوری دنیا وچ اپنا سکہ منوایا تے پوری دنیا دے سامنے ملک و قوم دا خوب ناں روشن کیتا، پاکستان تے اہل پاکستان دا سر فخر نال اُچا کر دتا۔ کہیا جاندا اے۔ ارفع کریم اپنی بیماری توں پہلے ناسا دے کسے پراجیکٹ اُتے کم کر رہی سی۔ 22 دسمبر 2011ء نوں ارفع کریم گھر اُتے ای موجود سن، جدوں مرگی دا دورہ پیا، ایہناں نوں فوری طور اُتے سی ایم ایچ ہسپتال اپڑایا گیا، اوتھے ایہناں نوں دل دی تکیلف وی شروع ہو گئی، جس دی شدت نال اوہ کومے وچ چلیاں گئیاں۔
2 جنوری نوں بل گیٹس نے ارفع کریم دے والدین نال رابطہ کیتا تے ایس خواہش دا اظہار کیتا کہ ارفع دا علان اپنی زیر نگرانی امریکہ وچ کروانا چاہندے نیں۔ بل گیٹس دے ای کہن اُتے امریکی ڈاکٹر دا پینل بنیا، جیہڑا ویڈیو کانفرنسز دے ذریعے پاکستانی ڈاکٹر دی رہنمائی تے معاونت کردے رہے۔
9 جنوری نوں ارفع دی طبیعت کجھ سنبھلی پر عارضی طور اُتے۔ ڈاکٹرز دی رپورٹ دے مطابق ایس دے دماغ نوں شدید نقصان اپڑیا سی۔ اوہ 2012ء وچ 26 دن کومے وچ رہن توں بعد 14 جنوری بروز ہفتہ لہور دے سی ایم ایچ ہسپتال وچ اللہ نوں پیاری ہو گئیاں۔ 14 جنوری 10 بجے رات پاکستان دے چینل اُتے ایہناں دی افسوسناک خبر نشر ہوئی۔ پورا پاکستان صدمے نال نڈھال ہو گیا۔
کجھ لوک مر کے وی امر ہو جاندے نیں، ارفع ایہناں وچوں اک سی۔مائیکر و سافٹ ٹیکنالوجی وچ جو ارفع کریم رندھاوا نوں دسترس سی، ایس نوں خراج تحسین، خراج عقیدت پیش کردے ہوئے حکومت نے بعد از مرگ لہور دے اک پارک تے کراچی دا آئی ٹی سینٹر ارفع کریم دے ناں توں منسوب کر دتا۔ ایس توں علاوہ ایس دے پنڈ نوں وی ارفع کریم دا ناں دے دتا گیا۔ امجد کریم رندھاوا ، ارفع کریم دے والد جہناں دا کم ملک دا دفاع کرنا اے جیہڑا کہ اک آرمی افسر رہے سن، اوہناں نے پاکستان نوں اک راہ وکھایا کہ پاکستان دا نظریاتی سرحداں اُتے دفاع ارفع کریم جہی دھیاں نیں، جنہاں نال دنیا دے ساہمنے پاکستان دا روشن چہرہ واضح ہوندا اے۔
آئی ٹی میڈیا سٹی پروجیکٹ نوں دنیا دی کم عمر ترین مائیکرو سافٹ سرٹیفائیڈ پروفیشنل دے ناں اُتے، ارفع کریم آئی ٹی میڈیا سٹی پروجیکٹ، دے ناں نال منسوب کر دتا گیا۔ارفع کریم دی والدہ ثمینہ کریم نے ارفع کریم نو ں خراج تحسین پیش کرن لئی منعقد اک تقریب نال خطاب کردے ہوئے کہیا سی کہ انفارمیشن ٹیکنالوجی دے ذریعے تعلیم دے شعبے وچ انقلاب تے پنڈ دے علاقیاں وچ تعلیم دی روشنی پھیلانا۔ ارفع کریم دا خاب سی کہ بذریعہ انفارمیشن ٹیکنالوجی دے پاکستان وچ تعلیم نوں عام کرنا۔ ارفع کرین دے ایس خواب نوں پورا کرن لئی ایس نال محبت کرن والیاں نے ارفع کریم فائونڈیشن بنائی اے۔
جس دا مشن ارفع کریم دے خوا ب کمپیوٹر انفارمیشن ٹیکنالوجی دے ذریعے تعلیم دا انقلاب پورا کرنااے۔ ارفع کریم دا اک کارنامہ اپنے پنڈ دے سکول وچ کمپیوٹر لیب دا قائم کرنا وی اے ۔ ارفع کریم رندھاوا نوں اپنے ایس کارنامے اُتے فخر سی۔ سانوں ارفع کریم اُتے وے، اسیں تے صرف ایہناں دی یاد وچ موم بتیاں بال سکنے آں، اک دو آرٹیکل لکھ سکنے آں، ایس نوں ساڈے توں وچھڑے ہوئے 9 ورہے ہو گئے نیں۔ ایس دا خواب ہجے تیکر پورا نہیں ہویا۔ ہونا تے ایہہ چاہیدا سی کہ حکومت پاکستان وچ ٹیکنالوجی دی تعلیم عام کر کے اک ارفع کریم دے کھو جان اُتے ایس دے خواب نوں پورا کردی تے ہزاراں ارفع کریم جہی پاکستان دیاں دھیاں دی تعلیم و تربیت دا انتظام کیتا جاندا۔ ایہہ اک حقیقت اے کہ پاکستان وچ ٹیلنٹ دی کمی نہیں، غربت، حکومت دی عدم دلچسپی دی وجہ نال پاکستان پچھے اے۔ جے اسیں تعلیم نوں ملک وچ عام کریئے تے بوہت سارے مسئلے دا حل اے۔؎
انٹرنیٹ اُتے ارفع کریم دی اواز وچ ، انوکھا لاڈلا کھیلن کو مانگے چاند، جیہڑا کہ ایس نے آخری گانا گایا سی تے اکھاں، چھم چھم وسیاں س کے تے میری اکھ بھر آئی۔ میری اوہ کجھ نہیں لگدی، میں ایس نال تے کیہ ایس دے والدین نال وی نہیں ملیا، میں تے ایس نوں جان دا وی نہیں سی، پہلی وار جدوں اوہ ہسپتال وچ سی تے کسے چینل اُتے خبر سنی سی، جدوں اللہ دے کول ٹُر گئی تے ایس دے بارے وچ جانیا، ساڈے کول اونج وی ایہہ رواج اے کہ اسیں زنداں نوں مرن لئی چھڈ دینے آں تے جیہڑے مر جان تے ایس دا سوگ منایا جاندا اے۔ ایہناں سوگ منان والیاں وچ، میں وی شامل ہو گیا۔
ارفع کریم دی نویں برسی دے موقعے اُتے گل بات پبلیکیشنزنے پہلی وار ارفع کریم رندھاوا دی زندگی اُتے مستند ترین اک کتاب شائع کیتی اے، ایس کتاب نوں ایس دے والد امد کریم والدہ ثمینہ امجد تے اعجاز مہاروی نے لکھیا اے، ارفع کریم دی زندگی وچ بے شمار مشکلاں تے رکاوٹاں آئیاں جنہاں دا ایس نے حوصلہ مندی نال ڈٹ کے مقابلہ کیتا تے کدی شکوہ ظلمت شب نہیں کیتا۔ 17 ورہے دی عمر وچ اوہ ستاریاں توں اگے دے جہاناں وچ منتقل ہو گئی پر ایس جہان وچ اپنے عزم؛ و جنون دے گہرے نقوش چھڈ گئی جیہڑے آن والے ویلے وچ ہر ایس نوجوان لئی مشعل راہ ثابت ہون گے جیہڑے اُچے خواب ویکھدے نیں۔ صفحات 344، نایاب رنگین تصویراں دے نال، پورے پاکستان وچ دستیاب اے۔
14 جنوری 2021 ارفع کریم دی نویں برسی آئی اے تے انج لگیا جویں اوہ میری کوئی اپنی سی۔ ایس نوں ساڈے توں وچھڑے ہوئے نو ورہے ہو گئے نیں پر ایہہ ہجے کل دی ای گل لگدی اے، انج لگدا اے، ہجے اوہ آ جائے گی تے اکھاں چھم چھم وسیاں سنا کے رلا دیوے گی، میری دھی، پاکستان دی دھی، پاکستان دا اصل چہرہ، گوہر نایاب ہن دور کدھرے جا بسی اے تے کدھرے دور توں ایس دی اواز آ رہی اے اکھاں چھم چھم وسیاں تے میری اکھاں وچ اتھرو نیں۔ دلاں دیاں گلاں دل وچ رہ گیاں،نکی جہی جندڑی نوں روگ کِناں لا لیا،، نا توں سنیاں ناں دسیاں۔اکھاں چھم چھم وسیاں ۔
