عطاء اللہ خان نوں سینٹ دا ٹکٹ دین وچ کیہ حرج اے؟

شکیل امجد صادق

اک دفعہ دا ذکر اے کہ اک بندہ سمندر چوں مچھی پھڑ کے لیایا تے اوہنوں اپنے گھر وچ موجود کھوہ وچ سٹ دتا۔ ایس کھوہ وچ ڈڈوئواں دی حکومت سی۔ ڈڈوئواں نے جدوں اک نویں چیز ویکھی تے پہلے تے اوہ ڈرے گھبرائے دور دور گھمن لگ پئے۔ آخر اک وڈے ڈڈو نے ہمت وکھائی تے مچھی دے تھوڑا نیڑے گیا تے پچھیا توں کون ایں؟ میں مچھی آں‘ مچھی نے جواب دتا۔ ڈڈو: توں کتھوں آئی ایں؟ مچھی: سمندر چوں‘ ڈڈو: اوہ کیہ ہوندا اے؟ مچھی: اوہ بہت وڈا ہوندا اے تے ایہدے وچ پانی ہوندا اے۔ ڈڈو نے آکھیا: کناں وڈا؟ مچھی: بہت وڈا۔ ایہ سن کے ڈڈو نے اپنے دوالے چھوٹا جیہا گول چکر کٹیا تے فیر مچھی توں پچھیا‘ کیہ ایناں وڈا ہوندا اے؟ مچھی مسکرائی تے بولی نہیں وڈا ہوندا اے۔ ڈڈو نے تھوڑا وڈا چکر کٹیا تے کہیا ایناں وڈا؟ مچھی نے کہیا نہیں وڈا ہوندا اے۔ ڈڈو ہن جوش وچ آ گیا تے اوہنے ادھے کھوہ دا چکر لا کے مچھی ول ویکھیا‘ جیویں پچھ رہیا ہووے کہ ہن؟ مچھی نے فیر کہیا اوں ہونہہ۔ ہن تے ڈڈو نے پوری رفتار نال پورے کھوہ دا چکر کٹیا تے مچھی نوں کہیا کہ ہن ایس توں وڈی تے کوئی چیز نہیں۔ مچھی مسکرائی تے ڈڈو نوں آکھیا: تیرا قصور نہیں کیوں جے تیری سوچ ای ایس کھوہ تک اے۔
ایسے طرح ساڈے معاشرے وچ کجھ لوک وی انج دے ہوندے نیں جہناں دی سوچ ایس کھوہ دے ڈڈو دے برابر ہوندی اے۔ اوہناں نوں لگدا اے کہ اوہو اپنے عقیدے تے نظریات وچ سچے تے کھرے نیں اجہے لوکاں نال لڑائی یاں بحث کرن دی تھاں اوہناں نوں اوہناں دے حال تے چھڈو تے اوہناں دی سوچ تے مسکرا کے اگے نکل جائو۔ خان صاحب! عطاء اللہ خان عیسیٰ خیلوی اینے وی گئے گزرے نہیں کہ جہناں دے بارے بدگمانی یاں دوجی کوئی رائے قائم کیتی جاوے۔ پھُلاں نال کنڈیاں دا ہونا اک فطری عمل اے۔ ایسے طرح عیسیٰ خیلوی دے پچھے وی کوئی مفاد پرست ٹولا ہووے گا جو ایہ بالکل نہیں چاہندا ہووے گا کہ عیسیٰ خیلوی سیاست دے میدان وچ اگے آوے تے اپنی فہم و فراست دے سر تے غریب لوکاں لئی کجھ کر گزرے۔ سیاست وچ موروثیت دا بالکل وی عمل دخل نہیں ایہ تے اوہ میدان اے کہ جو مرضی سیاسی پہلوان آوے تے اپنی فہم و فراست تے فکر و عقل دے جوہر وکھائے جد کہ خان صاحب عیسیٰ خیلوی نوں بڑے عرصے توں جان دے نیں تے اکثر اوہناں دیاں سیاسی کوششاں دا دم وی بھردے رہندے نیں جد کہ کسے وی عہدے دے سلسلے وچ خان صاحب نے عیسیٰ خیلوی دے نال بقول شاعر:
گل پھینکے ہیں اوروں کی طرف بلکہ ثمر بھی
کچھ تو اے خانہ بر اندازِ چمن ادھر بھی
جناب عالی! دنیا وچ بڑے گھٹ ملک‘ شہر یاں بستیاں اجہیاں ہون گئیاں جہناں دی وجہ شہرت صرف اک ای بندا بنیا ہووے گا فیر اوہ شہر‘ اوہ بستی‘ اوہ پنڈ ایسے اک ای بندے توں شہرت دیاں ساریاں حداں پار کر گیا۔ عیسیٰ خیل ورگی گمنام‘ ہر لحاظ نال پسماندہ تے دراڈی بستی جے فجی دے جزائر توں لے کے بحراوقیانوس تے پوری دنیا وچ پہچانی جاندی اے تے ایس پچھان دا سہرا فرزند میانوالی پرائیڈ آف پرفارمنس‘ ستارہ امتیاز عطاء اللہ خان عیسیٰ خیلوی دے سر جاندا اے۔ واضح رہوے کہ عیسیٰ خیلوی دنیا دا اوہ واحد گلوکار اے جو اپنے فن دا آپ ای موجد اے تے آپ ای خاتم اے۔ ایہ اوہ فنکار اے جنہے اپنے قبیلے‘ اپنی ذات تے خودی نال بغاوت کر کے ملک و قوم دا ناں روشن کیتا تے اجیہا روشن کیتا کہ رہندی دنیا تک دنیا ایہدے گیت گاوے گی تے لوک موسیقی نوں اجیہا دوام تے پائیداری بخشی کہ سرائیکی تے پنجابی زبان آپ ایہدے تے مان کرے جدوں گل آئی شوکت خانم کینسر ہسپتال لئی چندا اکٹھا کرن دی تے ایس بندے نے اندرون تے بیرون ملک اپنی خدمات عمران خان دے حوالے کر دتیاں۔ ایہ کہنا غلط نہیں ہووے گا کہ شوکت خانم کینسر ہسپتال دیاں بنیاداں وچ عطاء اللہ خان عیسیٰ خیلوی دی دن رات دی محنت شامل اے۔ شوکت خانم کینسر ہسپتال دی چندا مہم دی تریخ وچ عیسیٰ خیلوی دا ناں سنہرے حرفاں وچ لکھیا جاوے گا۔
ہن آئونے آں سیاست ول تے خاص طور تے پاکستان تحریک انصاف دی سیاسی مہم ول‘ عطاء اللہ عیسیٰ خیلوی اوہ سیاسی کارکن سی جنہے جناب دے نال دن رات اک کر دتا۔ بناں کسے صلے تے ستائش دے لالہ نے آپ دے ہر جلسے نوں کامیاب بنان دی پوری کوشش کیتی حالاں کہ کئی کمپین کیمپاں دی آپ سرپرستی کیتی۔ آپ نے دامے‘ درمے‘ سخنے پاکستان تحریک انصاف دی بھرویں خدمت کیتی فیر چشم فلک نے ویکھیا کہ عیسیٰ خیلوی دے اک ترانے نے لوکاں دے دلاں نوں گرما دتا تے ثابت کر دتا کہ واقعی عمران آئے گا تے عمران آ گیا۔ پاکستان تحریک انصاف نوں کامیابی ملی تے عمران خان صاحب دی حکومت بن گئی۔ عمران خان صاحب دی کامیابی وچ ایتھے پوری تحریک دا 50فیصد رہیا اوتھے اکلے عطاء اللہ خان عیسیٰ خیلوی دا پنجاہ فیصد حصہ اے ایس توں بالکل انکار ممکن نہیں پر ایہ درویش صفت تے عقاب ورگی خوبیاں دا مالک بندہ خودداری دی شال اوڑھ کے اپنی کٹیا وچ آ گیا تے سب مایا ہے سب مایا ہے دا راگ الاپن لگ پیا۔ اک اکھان اے کہ جنہوں بیٹھا نہیں دسدا اوہنوں کھلوتا وی نہیں دسدا۔ شاید عطاء اللہ خان عیسیٰ خیلوی دے ذہن وچ وی ایہ گل آ گئی ہووے ایہ گل صرف میری قیاس ارائی تے مبنی سی پر ویلے نے ایہ ثابت کر دتا کہ ایہ گل سچی ای سی۔
جناب وزیراعظم صاحب! تہاڈے اگے گزارش اے کہ فرزند میانوالی‘ دور اندیش سیاستدان‘ ایس درد دل رکھن والے انسان جہناں نوں دنیا عطاء اللہ خان عیسیٰ خیلوی دے ناں توں جان دی اے اوہناں نوں سینٹ دے الیکشن دا ٹکٹ عطا کیتا جاوے تے ایہدی سیاسی بصیرت توں بھرواں فائدہ چکیا جاوے کیوں جے عیسیٰ خیلوی صاحب اک جہاندیدہ انسان نیں۔ ایہناں نے دنیا ویکھی اے اوہناں دی سوچ سمندر دی وسعت نوں جان دی اے اوہ کھوہ ورگی محدود سوچ دے مالک نہیں ایس لئی اوہناں نوں سینٹ دا ٹکٹ دین وچ کوئی قباحت نہیں۔٭