پنجابی زبان دے لجپال لکھاری

ڈاکٹر محمد ریاض شاہد

پنجابی زبان آپ مہارے پھلاں وانگ پروان چڑھدی پئی اے۔ایس نوں ترقی دی راہ تے پاون والے اپنے شوق دے پاروں کم کردے وکھائی دیندے نیں۔کوئی اخبار شائع کر رہیا اے تے کوئی رسالہ چھاپ رہیا اے۔کجھ سجن بیلی مہینہ وار مشاعریاں دا آہر کر لیندے نیں۔ کجھ ایف ایم تے کجھ اپنے ذاتی چینل بنا کے پنجابی زبان تے ادب دی سیوا وچ رجھے ہوئے نیں۔ آئو ویکھیے کون کتھے بیٹھا پنجابی واسطے کیہ جتن رہیا اے۔
عارف محمود ملک شکرگڑھ وچ بیٹھ کے علامہ اقبال اوپن یونیورسٹی ولوں شعبہ پاکستانی زبانیں وچ پی ایچ ڈی کر رہیا اے۔ محمد اصغر بھٹی نارووال وچ پٹواری اے ۔سرکاری کار ویہار دے نال نال پنجابی زبان وچ نظم غزل تے قطعہ لکھ رہیا اے۔ محمد انور بسرا نارووال وی وسوں رہی اے ۔اج کل لاہور رہندا اے۔ایہناں کلاسیکی شاعراں د ے کلام نوں نویں سرے توں مرتب کر رہیا اے۔اپنی شاعری دیاں وکھریاں کتاباں وی چھاپ رہیا اے ۔ اے۔قصیدہ بردہ شریف دا پنجابی وچ ترجمہ وی کیتا اے۔ بسرا صاحب اکو وقت وچ کئی اک کم کررہیا اے۔
احسان باجوہ کلاسیکی داستاناں نظم کررہیا اے ۔ اپنا چینل وی بنا لیا اے،جتھے ,اوہ پنجابی ثقافت دے وکھ پکھاں بارے پروگرام پیش کردے نیں۔پروفیسر ثقلین شعیب پاتو آنہ تے پروفیسر بشارت وقار ہوراں گورنمنٹ کالج جھنگ وچ بی ایس آنرز پنجابی دی دوسری کلاس وچ 50 دے قریب طالب علم داخل کیتے نیں۔ ایہ اک بڑی پیش رفت اے ۔اک مثالی ادارہ ای مثالی کم کر سکدا اے ۔ادارے دے پرنسپل تے شعبہ پنجابی دے سارے استاد پنجابی دے ودھا واسطے متحرک نیں۔پروفیسر اکبر غازی ضلع سیالکوٹ دے پنجابی لکھاریاں دا تذکرہ لکھی بیٹھے نیں۔اوہ گورنمنٹ کالج ڈسکہ وچ پنجابی زبان دے آہری استاد نیں۔کلاس وی پڑھاندے نیں تے ادارے وچ پنجابی دیاں محفلاں وی برپا کردے نیں۔ جناب ناز اوکاڑوی لاہور بیٹھے نیں۔ شاعر نیں تے پنجابی دا رسالہ’’ سنیہا‘‘ وی شائع کردے نیں۔ایہ بہت بڑی خدمت اے۔ پروفیسر واصف لطیف گورنمنٹ کالج یونیورسٹی لاہور وچ شعبہ پنجابی نال وابستہ نیں۔ایس دے نال نال اک رسالہ پنجابی سیوک وی شائع کر رہے نیں تے فیر پنجابی لکھاریاں نوں رسالہ وی اعزازی گھلدے نیں۔ ڈاکٹر مشتاق عادل اک جہاں دیدہ شخصیت نیں۔اردو پڑھاندے نیں ۔دوہاں زباناں وچ کتاباں وی شائع کر رہے نیں۔ رسالہ مہکاں دی اشاعت دے نال نال ہفتہ وار اخبار پنجابی چانن دی دو سال توں اشاعت دیاں ذمہ داریاں نبھا رہے نیں۔صحافت دا ایہ کامیاب سفر تیسرے سال وچ داخل ہو گیا اے۔ممتاز بلوچ جھنگ شہروچ وسدے نیں۔حضرت سلطان باہوؒ بارے ایہناں دی تحقیق پکی پیڈی ہوندی اے۔ایس توں وکھ اوہ اک شاعر دے طور تے وی تے نویں لکھاریاں دی اصلاح وی کردے نیں۔
کاشف علی ارشد سمندری تحصیل وچ وسوں اے ۔ پنجابی شاعری کردے نیں۔دوسرے گوجرہ تے سمندری دے پنجابی لکھاریاں بارے تحقیق وچ معاون ثابت ہوندے نیں۔ میاں عتیق اختر روزانہ انگریزی زبان وچ اک پیج تیار کردے نیں ۔ ایس پیج تے وکھ وکھ زباناں دے لکھاریاں دیاں تصویراں تے کتاباں دے سرورق لگائے جاندے نیں۔جتھے دنیا بھر دے لکھاریاں بارے معلومات دتیاں جاندیاں نیں اوتھے پنجابی لکھاریاں بارے وی جانکاری شامل کیتی جاندی اے۔رفیق آزاد ساہیوال ضلع سرگودھا وچ رہندے نیں ۔اپنا کار ویہار کردے نیں۔پنجابی زبان دے اک آہم شاعر نیں ۔غزل لکھدے نیں ۔اپنے شہر وچ ادبی تقریبات کراندے نیں جتھے مقامی تے نزدیک دے شہراں قصبیاں توں ادبی ذوق شوق رکھن والے آ جاندے نیں۔ ایہ اوہ پنجابی پیارے نیں جیہڑے دلوں ہو کے پنجابی زبان دی سیوا پئے کردے نیں۔٭٭