اوس مسجد وچ دین دی تبلیغ ہوندی اے

لكهت:عتیق انور راجہ

پچھلے دناں میرے اک عزیز دوست نے میرے نال سوال کیتا راجہ صاحب جمعے دی نماز کنہاں دی مسجد وچ پڑھدے او، میں جواب دتا کنہاں دا کیہ مطلب ۔ میں باقی مسلماناں وانگوں الحمداللہ ہر جمعے دی نماز مسلماناں دی مسجد وچ پڑھنا واں ۔ ایس دوست نے فیر سوال کیتا کہ نہیں کجھ وضاحت کرو کہ اوہ مسجد کنہاں دی اے۔ میں فیر کہیا یا راوہ مسجد اللہ دا گھر اے تے مسلمان ای اوتھے نماز پڑھدے نیں۔ ایس نے تیجی وار سوال دہرایا کہ نہیں ایہہ دسو کہ ایس مسجد دی انتظامیہ تے خطیب صاحب دا مسلک کیہ اے۔ میں نرم لہجے وچ پچھیا کہ صاحب تہانوں ایس نال کیہ لینا اے جدوں میں دس دتا کہ مسجد مسلماناں دی اے تے اوتھے دین دی تبلیغ ہوندی اے۔ انسانیت نال محبت دا درس دتا جاندا اے تے فیر تہاڈا ایہ سوا ل پچھنا بن دا تے نہیں پر جے تہاڈے دل وچ کوئی شک اے تے کسے دن میرے نال چلو تے آپ ویکھ لوئو۔ اللہ دا شکر اے کہ شخصیت پرستی دے سحر وچ کدی مبتلا نہیں ہویا۔ جے کسے نال اختلاف ہوندا اے تے اگے بہہ کے تے دلیل نال کرنا واں۔ جے کسے دی گل چنگی لگے کسے دا نقطہ نظر دل نوں چنگا لگے تے ایہنوں اگے ودھان وچ کنجوسی نہیں کردا میں بچپن وچ ای ایہہ نقطہ سمجھ لیا سی کہ جے اللہ دے نیڑے دین اسلام اے تے فیر مینوں اپنی پہچان اک مسلمان دے طور ای رکھنی اے۔ عمل چاہے کسے وی امام دی تقلید وچ کراں گا پر اپنے آپ نوں کسے مسلک دا نمائندہ بنا کے پیش نہیں کراں گا۔
مینوں اللہ دے نیک بندیاں نال ہمیشہ توں اک خاص عقیدت رہی اے پر میں کدی کسے دے بارے وچ سنی سنائی گل اُتے یقین نہیں کردا بلکہ کسے وی خطیب دی بیان کیتی گئی گلاں دی سمجھ نہ آئے تے قرآن و حدیث دی کتاباں توں ی فیر علما دے بیان نال کسے نتیجے تیکر اپڑن دی کوشش کرنا واں۔ مینوں انج لگدا اے کہ نہ صرف پاکستان بلکہ پوری دنیا وچ مسلمان جس زبوں حالی دا شکار نیں ایس دی وجہ مسلماناں نوں مختلف فرقیاں تے مسالک وچ ونڈ ہونا اے۔ حد تے ایہہ وے کہ ہر مسلک دے لوک اپنے آپ نوں صیح العقیدہ تے دوجیاں نوں قابل اصلاح سمجھدے نیں۔ دنیا دی گل فیر کدی ہوئے گی اج مینوں کوئٹہ واقعے دے حوالے نال کجھ دو چار لفظاں وچ گل سمیٹنی اے کہ جدوں سانوں دسیا جاندا اے کہ اوتھے اک مدت توں اک خاص مسلک دے لوکاں نوں قتل کیتا جا رہیا اے تے اپوزیشن ایہناں مظلوماں دی داد رسی دی کوشش کردی اے۔ ہر حکومت ایہناں دے نال تسلی تشفی دا معاملہ کرن دی کوشش کردی اے۔ پر عقیدے دی وجہ نال انساناں دے لہو نال ہولی کھیڈن دا سلسلہ رکن وچ نہیں آ رہیا جے ساڈی حکومت تے دوجے طاقتور ادارے واقعی اپنے لوکاں دے جان و مال نوں تحفظ دین وچ سنجیدہ نیں تے فیر جویں وی ہوئے مساجد نوں کسے مسلک یا فقرے دی نمائندہ بنن توں روکنا ہوئے گا۔ مسجداں وچ مقررین دی تقریراں دی ریکارڈنگ لازمی قرار دتی جانی چاہیدی اے۔ مسیتاں وچ خطیب صاحب نوں چنگے معاوضے اُتے تعینات کرن دا سلسلہ کروانا چاہیدا اے تاں جے علم رکھن والے جہاندیدہ لوک ممبر اُتے بہہ کے لوکاں نوں لوکاں دے حق توں آگاہ کرن دا سلسلہ شروع کرن۔ لوکاں نوں دسیا جانا ضروری اے کہ اسلام دوجے مذہباں دا احترام کردا اے۔ دوجے دین دے منن والیاں نوں ایہناں دی عبادات اپنے انداز وچ کرن دی پوری اجازت دیندا اے۔ میں تے ایہہ کہواں گا کہ مسجداں وچ کجھ ویلے لئی علما دی تھاں صوفیا نوں تبلیغ لئی خدمات سرانجام دین دا موقع دتا جانا چاہیدا اے۔ علما اپنے علم دی بنا اُتے اپنے مسلک تے مذہب دے بارے وچ دلائل دے انبار لاندے نیں جد کہ صوفی ہر کسے نوں خندہ پیشانی نال گلے لا کے اپنا بنا لیندا اے کہیا جاندا اے کہ برصغیر پاک و ہند وچ اسلام دے ودھن دی اک وڈی وجہ صوفیا کرام دا انداز تبلیغ سی۔ ایس پاک دھرتی اُتے اللہ پاک دے خاص کرم نال ہر دور وچ صاحب علم تے اللہ دی محبت نال سرشار صوفیا کرام دا ظہور ہوندا رہیا اے۔ انج دے صوفی جنہاں دا ہر لفظ معرفت دا اک سمندر سی۔ ہن ایس معرفت نال لوک فیض حاصل کردے تے اک سدھی سادھی رواداری دی زندگی بسر کردے سن جس وچ سارے فرقیاں تے اقلیتاں دا احترام ہوندا سی۔ ایس خوبصورت دھرتی اُٗتے لوکاں نوں مل جل کے رہن تے احترام آدمیت دا درس دین والے آرام فرما نیں تے ایہناں دے لفظاں دی صورت ایہناں دا فیض اج وی جاری اے۔ ساڈے صوفی شعرا جنہاں وچ وارث شاہ بابا فرید،بابا بھلے شاہ،میاں محمد بخشؒ،حضرت علی ہجویریؒ تے دیگر دے کلام وچ محبت پیار تے مل جل کے رہن دا اک دوجے نوں برداشت کرن دا انج دا سبق ملدا اے کہ جے اسیں ایس نوں سمجھ لئے تے ساڈے معاشرے وچ ودھی نفرت تے بدامنی دی فضا بوہت جلدی ختم ہو جائے گی۔