رب راکھا

جیہڑیاں قوماں اپنی تہذیب اپنی روایات نوں بھل جاندیاں نیں تاریخ گواہ اے اوہ یا تے صفحہ ہستی توں مٹ جاندیاں نیں

لكهت:اے ڈی شاہد

کتھے گئی توتاں دی چھاں جتھے پنڈ دی پرہیا بیہندی سی
جھاڑ کے پلو نفرت دے اک دوجے نوں دکھڑے کیہندی سی
رھے نہ اج اوہ سانجھے کھوہ نہ سیاں دے حسن جمال
وارث شاہ ایس دھرتی دے ہو گئے مندڑے حال
جیہڑیاں قوماں اپنی تہذیب اپنی روایات نوں بھل جاندیاں نیں تاریخ گواہ اے اوہ یا تے صفحہ ہستی توں مٹ جاندیاں نے یا فیر مسلسل افراتفری تے بے چینی دی فضا وچ ساہ لینا اُونہاں دا مقدر بن جاندا اے۔ ایہو جہیاں قوماں دے بے اصول تے بے ترتیب معاشرے وچ جھوٹ،چغل خوری، چوریاں ، ڈاکے، لٹ مار ،قتل ، زناہ ، رشوت، بد کاری، حرام، دھوکہ ، فراڈ، نفرت،فرقہ واریت،مذہبی انتہا پسندی،نا انصافی، مہنگائی، بے روز گاری، مفاد پرستی تے ذات پات وغیرہ جیہے روگ جنم لیندے نے ۔ پورا معاشرہ نفسا نفسی دے عالم وچ مبتلا ہو کے رہ جاندا اے ۔ ایس نویں تے ترقیاں دے زمانے دے فیدیاں دے نال نال اساں گھاٹے وی بہت کھاہدے نے ۔ کدی نہ پورے ہون والے نقصان بھگتے نے ۔ جس طرحاں انسان دے جسم وچ قبض نوں بیماریاں دی جڑ سمجھیا جاندا اے اوسے طرحاں معاشرے دے جسم وچوں اخلاقیات دے ختم ہو جان تے کافی زیادہ برائیاں پیدا ہو جاندیاں نے ۔ اک زمانہ سی جدوں پنڈ یا شہر دے محلے وچ فوتگی ہو جاندی سی تے جدوں تیک میت نوں دفنا نہیں لیا جاندا سی اودوں تیک گھراں دے چلھیاں وچ اگ نہیں بلدی سی ۔ سارا پنڈ یا محلہ سوگ وچ مبتلا ہو جاندا سی ۔ دیہاتاں وچ تاں ایس طرحاں ہو جاندا سی جس طرحاں مرن آلے دے نال سارا پنڈ ای مر گیا اے ۔ ہر اکھ وچ اتھرواں دی جھڑی لگ جاندی سی ۔ چہلم دی رسم تک ریڈیو ٹیپ ریکارڈر ٹیلی ویژن نوں چک کے صندوق وچ رکھ دتا جاندا سی ۔ شادی ویاہ دیاں رسماں مکمل طور تےبند ہو جاندیاں سن ۔ قبر کشائی واسطے سارے پنڈ دے نوجوان اکھٹے ہو کے ایہہ ضروری فرض ادا کردے سن ۔ اگر خدا نخواسہ کوئی طلاق دا واقعہ پیش آئوندا تے پنڈ دے معززین بزرگ پنڈ توں دور جا کے طلاق لکھن دے واقعے یا فیصلے نوں سر انجام دیندے سن ایس لئی کہ ایس دا عذاب پورے پنڈ اُتے نازل نہ ہووے ۔ دھی والیاں دے گھر وچ کئی دناں تیک افسوس کرن والیاں دا آنا جانا لگیا ریہندا تے بڑے چراں تیک اوتھوں دی فضا ء سو گوار رہندی سی ۔ جے کوئی انسانی قتل جیہی واردات ہو جاندی تے اعلیٰ اخلاق دا مالک اسمان دا رنگ سرخ ہو جاندا ۔ الودہ فضا تے اسمان دی لالگی نوں قتل دی نشانی سمجھیا جاندا سی ۔ راہواں وچ پئے کنڈیاں نوں چک لیا جاندا سی ایس لئی کہ کسے دوسرے دے پیراں وچ نہ چھُبن ۔ محبت تے بھائی چارے دا ایہہ حال سی کہ شادی ویاہ دیاں رسماں کئی دناں تائیں چلدیاں رہندیاں سن ۔
نکےبچے بچپن وچ ای اخلاقی تربیت توں مالا مال ہوندے سن اک دوسرے نال چھوٹی اُنگلی ملا کے دوستی پکی کردے سن تے ہن تاں سینے نال لا کے وی اندر دی میل صاف نہیں ہوندی تے اج کل اوسے چھوٹی انگلی نوں ملا کے بچے کچی کرن دا عمل کردے نے ۔ دیسی تے قدرتی کھانیاں دا استعمال کر کے لمیاں عمراں تے صحتاں والے ہن ولائیتی کھانیاں دی بھینٹ چڑھ کے اپنیاں صحتاں تے لمیاں عمراں توں وی محروم ہو گئے نیں ۔ دل دے دورے نوں صرف امیراں دی بیماری سمجھیا جاندا سی ۔ پر اج کل ایہہ نامراد بیماری غریباں نوں وی لگ گئی اے جس دا علاج معالجہ نہ ہون دی وجہ توں زیادہ تعداد وچ غریب ای مر رہے نے ۔ وڈے وڈے تنازعیاں دا جلدی تے انصاف دے سارے تقاضے پورے کردیاں حل پنچائیتاں دے ذریعے ہوندا سی ۔ پر ہن ایس نوے تے تیز دور وچ غریب تے عام انسان نوں انصاف لبھدیاں لبھدیاں ساری حیاتی تھانے کچہریاں دے دھکے کھاندیاں ای گزر جاندی اے ۔ عمر دے آخری حصے وچ وی کوئی چوٹ لگدی یا تکلیف ہوندی تے مونہہ وچوں خالص تے انمول رشتے ہائے ماں دی آواز نکلدی سی پر ہن فیڈر نے ماں کولوں بچہ کھوہ لیا اے ایہو ای وجہ اے کہ اج کل ماں بیٹے دا مضبوط رشتہ وی کمزور ہو گیا اے ۔ بیٹا باپ نوں تے باپ بیٹے نوں ، بیٹا ماں نوں بھائی بھائی نوں قتل کرن جیہے واقعات عام ہو رہے نے ۔ بیٹی دی مضبوط پناہ گاہ باپ دا گھر وی اوس دی زندگی تے عزت واسطے محفوظ نہیں رہیا ، اپنے خاوند نوں مجازی خدا سمجھن والی عورت نام نہاد مغربی آزادی تے اُوسے آزاد ی دا پر چار کرن والے ساڈے ٹیلی ویژن پروگراماں دی وجہ توں فیشن تے آزادی دی دھن وچ مگن اج دی خواتین اپنے رویاں دی وجہ توں طلاق دی شرح وچ بے پناہ اضافے دا خود بہت وڈا سبب بن چکی اے ۔ ایس جنسی فاقہ کش قوم دی بد اخلاقی دی انتہا ہو گئی اے کہ سبھ دے سانجھے سمجھے جاون والے بچے وی غیر محفوظ ہو گئے نے ۔ بچیاں نوں زیادتی کرن توں بعد قتل دا روجھان جس تیزی نال ودھ رہیا اے ایہہ سبھ اپنی روایات ، دین توں دوری تے پیغمبرعظیم حضرت محمدصلی اللہ علیہ والیہ وسلم دے عظیم پیغام نوں بھل جان دا نتیجہ اے ۔ اساں جس تیزی نال اپنا سبھ کجھ کھڑا دتا اے ایس نوں آہستہ آہستہ حاصل کرن تے وی کئی صدیاں لگ جان گیاں۔
اچھا جی رب راکھا
جیوندے رہے تاں فیر ملاں گے
بھَرماں دے کھنڈراں اُتے