اِک ہور وڈی شخصیت ساہنوں چھڈ گئی

اوہ اک لمبے عرصے توں ریڈیو پاکستان نال جڑے تے اک مقامی اخبار دے مدیر سن

تحریر: اکرم عامر سرگودھا

کجھ دن پہلاں گھر توں دفتر آ کے جویں ای موبائل آن کیتا تے وٹس ایپ اُتے خبر ملی کہ شاعر و ادیب شاکر نظامی انتقال کر گئے نیں، جنازے دا اعلان بعد وچ کیتا جائے گا۔ خبر پڑھدے ای ذہن نوں شاک جہیا لگیا تے 1992 دے اوہ دن اکھاں دے ساہمنے گردش کرن لگے جدوں راقم ہجے صحافت وچ طفل مکتب سی تے اپنے قریبی عزیز دا چیک اپ کروان سول ہسپتال سرگودھا گیا تے فزیشن ڈاکٹر نصر اللہ مرحوم دے کمرے دے باہر رش سی، میں مریض دے نال اپنی واری دا انتظار کر رہیا سی کہ ایس دوران اک ہتھ وچ سگریٹ تے دوجے ہتھ وچ نکی (پاکٹ سائز) ٹیپ ریکارڈ پھڑے اک بندا آیا تے کمرے دا دروازہ کھول کے اندر چلا گیا، تھوڑی دیر بعد واری آن اُتے میں تے مریض ڈاکٹر دے کمرے وچ داخل ہوئے تے موصوف کمرے وچ ڈاکٹر دے ساہمنے کرسی اُتے بیٹھے انتہائی دھیمے لہجے وچ گل بات کر رہے سن تے کمرے وچ موجود درجن لوک ایس گل بات توں مزے لے رہے سن، سگریٹ دا دھواں پورے کمرے وچ ودھیا ہویا سی، راقم نے ڈاکٹر نوں اپنا تعارف بطور صحافی کرایا تے موصوف دا دھیان یک لخت میرے ول پلٹیا تے مینوں متوجہ کردے ہوئے کہیا ’’ اوئے کاکا توں کتھوں آ گیا ایں‘‘ اے( صحافت) تے بڑی مشکل فیلڈ اے۔ ایہہ میری ایہناں نال پہلی ملاقات سی ایہناں دے حسن اخلاق نے مینوں اپنا گرویدہ بنا لیا، میں وی ایہناں دے چاہن والیاں وچ شامل ہو گیا تے فیر ایہناں نال ملاقاتاں دا نا ختم ہون والا سلسلہ ایہناں دی وفات توں پہلے دن پہلاں تیکر جاری رہیا، ہر ملاقات وچ اوہ پہلے توں زیادہ خندہ پیشانی نال پیش آندے، اوہ اک کتاب سن، جنہوں پڑھ کے ذی شعور انسان بوہت کجھ پا سکدا سی۔ ایہناں دے طالبعلماں وچ وڈے بڈھے نوجوان خواتین سارے تے شامل سن جیہڑے ایہناں توں علم و ادب پڑھدے سن۔ میں اکثر ایہناں دے پرانے گھر رحمانپورہ جاندا تے ایہناں دے کمرے وچ ہمیشہ ملک خاص طور تے شہر دی نمایاں ادبی شخصیات موجود ہوندیاں، شعر و شاعری دا دور تے قہوہ چل رہیا ہوندا، کمرہ شعراء دے سلگائے گئے سگریٹ دے دھویں نال اٹا ہوندا، اوہ پوری زندگی آمریت دے خلاف تے حق لئی اواز بلند کردے رہے ایہہ ای ایہناں دی شاعری وچ جا بجا وکھائی دیندا اے۔
وہاں سنتا نہیں کوئی کسی مظلوم کی چیخیں
جہاں انصاف بکتا ہو، جہاں قانون اندھا ہو
ایوان اقتدار میں جب سر جھکا لئے
پھر کیسے پارسائی کے کتبے اٹھا لئے
بونے تھے جتنے قائد اعظم کے سامنے
ان سب نے دھیرے دھیرے قد بڑھا لئے
اب رہبران قوم سے کہنا ہے بس یہی
طوفان سے ملک و قوم کی کشتی نکالئے
اوہ ہمیشہ اپنے کم دی لگن وچ مست رہن والے خوش لباس تے خوش اخلاق انسان سن جیہڑے کسے دا دل دکھانا گناہ سمجھدے سن۔ جے کوئی دوست یا تعلق دار ایہناں نوں اپنا دکھ بیان کردا تے اوہ (شاکر نظامی) وی غمزدہ ہو جاندے۔ ایہناں دے کئی شعری مجموعے ایہناں دی ملک گیر شہرت دا باعث بنے جنہاں وچ آئینہ ، عقیدت،، حسن تمنا، کسے ہور لئی حسن نظر تے دیگر شامل نیں۔
اوہ اک لمبے عرصے توں ریڈیو پاکستان نال جڑے تے اک مقامی اخبار دے مدیر سن۔ موصوف نے 70 دی دہائی توں تادم مرگ علمی، ادبی، حوالے نال نوجواناں دی تربیت کیتی، پورے ملک وچ ہن وی ایہناں دے ہزاراں شاگرد علم و ادب دا نور کھلارن لئی موجود نیں، ایسے بنا اُتے یونیورسٹی آف سرگودھا وچ شعبہ اردو نے ایم اے دی سطح اُتے شاکر نظامی اُتے تحقیقی مقالہ لکھیا، جد کہ نمل اسلام آباد وچ وی ایہناں اُتے تحقیقی مقالہ لکھیا گیا، اوہ خوش اخلاق، ملنسار، درویشانہ طبیعت دے مالک تے ہر حال وچ خدا دا شکر ادا کرن والے انسان سن۔سگریٹ تے شعر دونواں نال لگائو رکھدے سن، ہر کسے نال محبت تے خلوص نال پیش آنا ایہناں دی فطرت وچ شامل سی، پیپلز پارٹی تے بھٹو دا شیدائی ہون دی وجہ نال اوہ کئی وار پابند سلاسل رہے، ایہناں دے جذبے وچ کدی لرزش وکھائی نہیں دتی، اوہ حالات دا مقابلہ کرنا خوب جان دے سن، ایہناں دی شاعری وچ جتھے غریب تے مظلوم طبقہ دی اواز ہوندی اوتھے اوہ معاشرتی مسائل وی خوب اجاگر کردے سن، پر ہن اوہ مناں مٹی تھلے جا چکے نیں، ایس طرح علم و ادب دا اک چراغ بجھ گیا اے، پر شاکر نظامی علم و ادب دا گہوارہ تے ادب دے گلستان دا اوہ پھُل سن جنہاں دی خوشبو ایہناں دے شعراں تے تحریراں دی صورت وچ ہمیشہ زندہ تے ایہناں دی یاداں باقی رہن گیاں۔
شعر:۔
دھوپ چڑھی تو سحرا سحرا درد کے منظر جاگ اٹھے
گرم ہوا سے ریت کے ٹیلے بن کر سمندر جاگ اٹھے
جانے کیا پیغام دیا تھا باد صبا نے چپکے سے
کتنے سچے جذبے میرے دل کے اندر جاگ اٹھے