جگت پنجابی سبھا ولوں 101 پنجابی شخصیتاں دا پوسٹر جاری
پاکستان توں مختلف شعبیا ں نال تعلق رکھن والے 12 پنجابی سیوکاں دے نام شامل
سپیشل رپورٹ
جگت پنجابی سبھا دے چیئر مین سردار عجائب سنگھ چٹھہ ہوراںکینڈا توں 101 پنجابی شخصیتاں دا پوسٹر شائع کیتاگیا اے ۔ایہدے وچ پوری دُنیا توں پنجابی زبان دی ترقی لئی کم کرن والیاں ہزاراں پنجابیاں نے حصہ لیا جیہڑے وکھو وکھ شعبہ زندگی نال جُڑکے پنجابی زبان دے ودھا تے پھلا وچ حصہ پا رہے نیں۔ ایہناں وچوں 101 پنجابی شخصیتاں دا چنائو کیتا گیا اے۔ایہ ا وہ پنجابی نیں جیہڑے گھنی محنت تے دیانتداری نال بغیر کسے لوبھ لالچ دے اپنی مادری زبان دی ترقی تے ترویج لئی ڈَٹ کے کم کر رہے نیں۔
پاکستان دے مختلف شہراں تے اداریاں توں12لوگ ایس پوسٹر لئی منتخب ہوئے جنہاں وچ مہان پنجابی سیوک چیئرمین ورلڈ پنجابی کانگریس فخر زمان ،گجرات شہر توں دو ادبی شخصیتاں چوہدری اسماعیل چیچی تے چیئرمین ورلڈ پنجابی فورم تے روزن ادبی فورم افضل راز، پنجاب یونیورسٹی اورینٹل کالج دی صدر شعبہ پنجابی پروفیسر ڈاکٹر نبیلہ رحمن، وائس چانسلر ڈاکٹر سلیم مظہر،جی سی یونیورسٹی دے ڈین پروفیسر ڈاکٹر اقبال شاہد،ننکانہ صاحب توںڈاکٹر نگہت خورشیدتوں اَڈ لاہور کالج برائے خواتین یونیورسٹی تو ںدوپروفیسراں جنہاں وچ صدر شعبہ پنجابی پروفیسر ڈاکٹر مجاہدہ بٹ تے اسسٹنٹ پروفیسر ڈاکٹر صائمہ بتول ہوراں دے ناںشامل نیں ۔لاہور کالج برائے خواتین یونیورسٹی نوں ایس حوالے نال وڈیائی حاصل رہی کہ ایتھوں دے دو پروفیسراں دے ناں ایہدے وچ شامل نیں۔
ایہہ دوویں ای شعبہ پنجابی نال جڑیاں ہوئیاں نیں تے اپنی نیک نیتی تے سرتوڑ محنت نال نہ صرف پنجابی زبان نوں اپنے ادارے وچ سگوں پوری دنیا وچ نمایاں مقام دلان وچ نویکلا کردار ادا کر رہیاں نیں ۔
ایس حوالے نال کئی دوجے پروگراماں توں اَڈ عالمی پنجابی کانفرنس وی ہر سال کرواندے نیں ۔ایس لئی لاہور کالج فار ویمن یونیورسٹی لاہور مبارک دی حق دار اے۔
