طاقت تے سیاست دا نشہ
لکھت:اکرم شیخ
سجنا… جدوں سیاست ہووے گی تے فیر گلاں وی ہون گئیاں کسے دا منہ تے بند نہیں کیتا جا سکدا۔ الزام وی لگن گے تے سوال وی ہون گے۔ انج وی دشمن تاں موقع دی تلاش وچ ہوندے نیں۔ اوہ ٹٹے پراں دیاں ڈاراں وی بنائوندے نیں تے اوہناں نوں اڈا کے اسماناں تک وی لے جاندے نیں۔ ایس لئی بھائی سیاست توں دوری ای چنگی اے پر کیہ کریئے اک واری منہ نال لگ جاوے تاں فیر اوہدا ذائقہ بھلائیاں نہیں بملدا۔ سگوں ہر ویلے اوہدی طلب تے تانگھ رہندی اے۔ ایہ طلب اپنے ول کھچدی رہندی اے۔ سیاست دی شراب ای نہیں ایہدا نشہ وی وکھرا ہوندا اے۔ ساڈے اک سجن نے بینظیر بھٹو دے لہور آئون ویے ہون والے استقبال ویلے آکھیا سی ایہ اوہ نشہ اے جہڑا ہن ساری عمراں سر چڑھ کے بولے گا۔ اگے پچھے چار چفیرے لوک‘ شہر دی کوئی سڑک خالی نہیں‘ سارے رستے مینار پاکستان ول جاندے سن تے فیر دنیا نے ویکھیا وزارت عظمیٰ وی پیراں ہیٹھاں آئی۔ اقتدار تے اختیار وی انگلی دے اشارے وچ رہیا۔ جیلاں قیداں تے دیس نکالے وی ہوئے پر نشہ نہیں اتریا ایسے نشے وچ ای دشمن تے وار چلے موت وی آئی تے شہادت وی ہوئی۔ نہ اوہنوں ماریا جا سکیا نہ ای اوہدا ورثہ مُکایا جا سکیا۔ اوہدے وارث اوہدی حفاظت دے دعویدار وی نیں اوہدی وراثت نوں پرچلت رکھن نوں اپنی ذمہ داری سمجھدے نیں۔ ایہ وکھری گل اے کہ طاقت تے سیاست ویلے دی لوڑ بنا کے اک دوجے دے سامنے کھلوتے ہوئے اک دوجے نوں لکوندے پئے نیں۔ ایہ وکھری گل اے جدوں طاقت سیاست کردی اے اوہدا مان تران تے رنگ ڈھنگ وکھرا ہوندا اے یاں فیر اوہدی شراب وی وکھری ہوندی اے تے نشہ وی۔ پر فیر وی وچلی گل ایہو ای ہوندی اے کہ گلاں وی ہوندیاں نیں تے الزام وی لگدے نیں منہ بند نہیں ہوندے۔ اخباراں تے پابندی لگ جاندی‘ میڈیا وی قنونی پابندیاں وچ جکڑ لیا جاندا اے پر کیہ کیتا جاوے اکیہویںصدی نے اک در بند کرکے سیکڑے در کھول دتے نیں ہن کوئی گل لکی نہیں رہندی۔ سوشل میڈیا تے تاں ہر کسے نوں ننگیاں کر دتا اے۔ ایہو جہے ڈرون کیمرے آ گئے نیں جلسہ ہووے یاں جلوس اگا پچھا سب کجھ سامنے آ جاندا اے کون کس حالت وچ اے تے کہدے پیر زمین اُتے نہیں اوہ صرف ہواواں وچ جے گانے پراں خالی اڈدا پھردا اے اوہدیاں اپنیاں لتاں وچ بھار نہیں اوہ وساکھیاں تے کھلوتا ہویا اے۔ ایہو ای طاقت دی سیاست ہوندی اے سیاسی شطرنج اپنے قبضے وچ رکھدی اے فیر اوہدے اُتے اپنی مرضی نال مہرے وچھاندی اے۔ ملک بنائون والا قائداعظم بھاویں جنتاں وچ بیٹھا شرمندہ ہو رہیا ہووے کہ میں تے اک عوامی جمہوری تے فلاحی ریاست بنائون دا سُفنا ویکھیا۔ فیر اوہدے لئی جدوجہد کیتی لوکائی نے میرے اُتے یقین کرکے قربانیاں دتیاں پر ایہ جاگیردار تے زمیندار کتھوں حکمران بن کے سامنے آ گئے۔ لمی کہانی اے جہدے اُتے حکمراناں نے طاقت نال سانجھ بنا کے تواریخ دا پردہ پایا ہویا اے ایہ پردہ ای حکمراناں دی لوڑ وی ہوندی اے تے مجبوری وی۔
ایہ وی اک شراب اے تے ایہدا اک وکھرا نشہ اے۔ لوکاں نوں پورے سچ توں دور رکھنا تے آپ موجاں ای موجاں۔ پر فیر کدی کدی انج وی ہوندا اے کہ دیسی شراب پین والے اپنی لہر وکھائون لگ پیندے نیں نشے دی ترنگ وچ بونگیاں مار کے ماحول نوں خراب کرن لگ پیندے نیں فیر اوہ وارا نہیں کھاندے اوہناں نوں چپ کرانا لازم ہو جاندا اے۔ اختیار تے اقتدار سارے وسیلے استعمال کردے نیں اوہناں نوں جھوٹھا وی کہندے نیں۔ اوہناں اُتے الزام وی لائوندے نیں ایہ بھیڑے لوک بے ایمان وی نیں تے ریاست دے دشمن وی۔ ایہناں دا مشن دشمن ملک دا اے ایہ غدار وی نیں تے لوکائی دی بہتری تے بھلایئی دے دشمن وی۔ لوکاں نوں چاہیدا اے ایہناں کولوں دور رہن۔ پر فیر وی لوکائی اوہناں نوں پسند کرن توں باز نہیں آئوندی۔ طاقت نوں دوجے اداریاں دی سانجھ نوں استعمال کرنا پیندا اے۔ نظریہ ضرورت چوں آئینی تے قنونی فیصلے لبھ کے اوہناں دی ورتوں کرنا پیندی اے۔ سزاواں وی ہوندیاں نیں تے قنونی پابندیاں وی‘ جیلاں وی استعمال ہوندیاں نیں تے دیس نکالے وی… مولوی مشتاق تے ثاقب نثار ورگے قاضی دے سامنے آئوندے تے تواریخ دے سنہرے ورقیاں توں انج غایب ہوندے نیں کوئی اتہ پتہ نہیں رہندا۔ ایہو ای تاں تواریخ دا پورا سچ اے کہ… قاضی فقیر ہووے یاں انوارالحق‘ لوکائی اوہناں نوں ویلے دے کھوبے وچ سٹ چکی اے۔ ایوب ہووے یاں یحییٰ‘ ضیاء الحق ہووے یاں مشرف اوہناں دیاں سرکاراں یادگاراں ہون اوتھے طاقت سلامیاں وی کردی اے پر اوہناں دیاں قبراں اُتے دیوے نہیں بلدے پر لوکائی فیر وی ایہو ای کہندی اے
میں قربان تنہاں توں باہو
قبر جنہاں دی جیوے ہو
سجنا… سچی گل تاں ایہو ای اے لوکائی دی پسند دا معیار تے قدراں ہور ہوندیاں نیں جنہوں ایہ پسند سمجھ وچ آ جاندی اے اوہو ای جیوندے رہندے نیں بھاویں اوہناں دا جنم طاقت دی ککھ وچوں ای ہوندا اے۔ کجھ لوک ایہنوں موسیٰ دے فرعون دے محل وچ پرورش دی مثال نال جوڑدے نیں تے کجھ اوہ جہڑے دھرتی دے تواریخی تے تہذیبی سفر دے پاندھی نیں اوہ ایس وچ ہرناکش تے راجہ ہرہلاد والے کردار تلاش کردے نیں۔ فرعون ہووے یاں ہرناکش دوہاں نوں طاقت دا نشہ سی۔ ایس نشے دے خلاف اوہناں دے گھروں ای آواز اٹھی سی پر تواریخ دا سچ تاں ایہہ وے کوئی تواریخ اُتے اعتبار نہیں کردا۔٭٭
