کپتان جی! اپنی تے ساڈی زندگی سوکھی کر دیو

لكهت:ایثار رانا

وزیراعظم عمران خان نے ٹوٹ بٹوٹ دا کہیا تے اسیں اپنے بچپن وچ چلے گئے‘ یاد آیا ٹوٹ بٹوٹ کیویں کھیر بناندا سی۔ پاکستان وچ 1947ء توں دو طرح دی کھیر بن رہی اے اک جو ٹوٹ بٹوٹ بناندے‘ جہدے وچ اوہناں دی خالہ لکڑی لیاندی‘ پھپھی ماچس تے اگ امی جان لاندی اے تے نظم دے آخر وچ کھیر تے پورے پنڈ وچ لڑائی ہوندی اے تے کھیر کسے دے ہتھ نہیں آئوندی۔ خدارا ایس نظم دے ایس خلاصے نوں موجودہ حالات دے تناظر وچ نہ ویکھو۔ خوفناک نتیجہ نظر آن تے میرے ذمہ توش پوش ہووے گا۔ دوجی کھیر یوم آزادی توں لے کے اج تک عوام بناندی اے جس جتن نال بناندی اے اوہ ساڈے توں ودھ کون جان دا اے‘ اپنا چرخا تک بال دیندے نیں پر ہر واری کتا کھا جاندا اے‘ اسیں ڈھول وجاندے رہ جانے آں یعنی پہلے دن توں کھیر کدی لوکاں دے ہتھ نہیں آئی۔ خدارا امیر خسرو دے شعر دے خلاصے دا وی اپنی ذمہ داری تے نتیجہ کڈھو‘ تسیں لکھ اختلاف کرو کپتان اپنے موقف تے کھلونا جان دا اے سارا پنڈ بہہ جا بہہ جا کہوے اوہ کھلوتا رہندا اے۔ ہر واری میرا دل غٹ غوں غٹ غوں کردا اے پر ہر واری کپتان دا موقف کبوتری ورگی چال چلدا فضا وچ پھیل جاندا اے۔
سانحہ مچھ تے کپتان دے موقف نے مینوں وی مشکل وچ پا دتا سی میرا یقین سی کہ ریاست ماں وانگوں ہوندی اے تے جدوں منفی ست ڈگری وچ شہیداں دے لاشے پئے ہون ماں کیویں دور بہہ سکدی اے فیر سمجھ وچ آیا ماں تے وزیراعظم وچ فرق ہوندا اے‘ خیر وزیراعظم نے تے جانا ای سی۔ ایہ کیویں ممکن اے کہ بچے مر رہے ہون تے ماں چپ رہوے۔ پر میری اتی رائے اے کہ لواحقین نوں وی میتاں دی بے حرمتی نہیں سی کرنی چاہیدی۔ چلو کپتان اپڑ گیا‘ دلاسہ وی مل گیا تسلی وی دے دتی‘ مینوں دکھ ایس گل دا سی کہ شہیداں دیاں میتاں نوں اناء دی جنگ وچ منفی ست ڈگری وچ رسوا نہ کیتا جاوے۔ مچھ وچ پئے لاشے کسے کسے شیعہ یاں ہزارہ گروہ دے نہیں سن‘ اوہ پاکستانیاں دے مسلماناں دے لاشے سن‘ اوہ ہزارہ دے جوان نہیں سن اوہ لہور‘ کراچی‘ پشاور‘ کوئٹہ‘ مظفرآباد دے گبھروئواں دے لاشے سن۔ کنے ٹوٹ بٹوٹ نیں اسیں لوک میتاں تے وی اناء دی جنگ تے گندی سیاست توں باز نہیں آئوندے۔ کپتان جی ایہ 35‘ چالھی داعشیے ریاست توں ودھ طاقتور نہیں‘ بھارت ایہناں دے پچھے اے تے ساڈے اگے وی ریاست اے۔ مدھ دیو‘ ہن ساڈے توں اپنے پیاریاں دے لاشے نہیں چکے جاندے ہن ساڈیاں آوازاں وین کردے کردے بیٹھدیاں جا رہیاں نیں۔ ریاست ماں وانگوں ہوندی اے تے سانوں اپنی تحفظ دی جھولی وچ وی لے لوے۔
ہاں گل ہو رہی سی ٹوٹ بٹوٹاں دی‘ تے کپتان جی تسیں وی اپنی زندگی سوکھی کر لوو تے ساڈی وی۔ اسیں ٹی وی سکرین تے اخباراں وچ چنگیاں خبراں ویکھنا چاہنے آں۔ جدوں ٹی وی کھولو سیاستدان سوکناں وانگوں بس طعنے دیندے نظر آئوندے نیں۔ چلو اک ادھ مولانا فضل الرحمن ورگا کیوٹ‘ سافٹ‘ سمائلنگ چہرہ نظر آ جاندا اے تے بدوبدی بندے دا دل ہسن نوں کردا اے نہیں تے ہر وقت اک ای رنڈی رونا‘ سنتا سنگھ ڈرائیونگ ٹیسٹ دے کے آیا بنتا سنگھ نے پچھیا کیہ بنیا پاس ہو گئے؟ سنتا سنگھ بولیا پتہ نہیں یار جدوں میں ہسپتال توں آیا تے ٹیسٹ لین والے سارجنٹ نوں ہوش نہیں سی آیا۔ پتہ نہیں کدوں تک ساڈے ٹوٹ بٹوٹ سیاست دے ڈرائیونگ لائسنس لئی سانوں ہسپتال وچ لمیاں پاندے رہن گے۔ اوہناں نوں پتہ ای نہیں کہ اسیں ہر واری اوہناں نوں ڈرائیونگ سیٹ تے بیٹھا ویکھ کے کہنے آں
ماہی میریا روند نہ ماریں
میں داء لایا جند جان دا
امریکہ وچ جمہوریت خطرے وچ اے اوتھے ووٹ نوں عزت دیو والی فلم شرطیہ نویں پرنٹ دے نال چل رہی اے۔ بس اللہ خیر کرے۔ کدھرے اوہ اپنی سجری سجری ٹرمپی نہ وکھا دین۔ انج اوہناں نوں مشورا مشورہ اے کہ اپنی تحریک وچ جان پان لئی جے قائد احتجاج مولانا میاں نوں اپنے کول آن دی دعوت دین تے ویکھو کیویں ڈیموکریٹس تے ری پبلکنز وچ ست اکونجا ہوندی اے۔ امریکہ وچ وڈے وڈے سائنس دان‘ مفکر‘ دانشور ہون گے پر میرا دعویٰ اے اوہناں دے کول اک شیخ رشید‘ اک مولانا فضل الرحمن ورگا کاریگر نہیں ہووے گا‘ پتہ نہیں کیویں اوہناں دی جمہوریت محفوظ اے۔
لگدا اے وفاق تے پنجاب وچ کپتان تے وسیم اکرم دی سطح تے ضرور انڈرسٹینڈنگ اے‘ پر وچوں وچ ہور وی بہت ساریاں پھسوڑیاں نیں۔ ہن ویکھ لوو وزیراعظم دے ترجمان شہباز گل نال لہور وچ مسلم لیگیاں نے چنگا نہیں کیتا۔ پر پنجاب دی سطح تے ایکشن تے دور دی گل احتجاج دی ہلکی جہی اوں آں وی نہیں ہوئی۔ گھٹ توں گھٹ بندہ اندرواندر ای گیم پاندا رہوے اُتوں اُتوں تے رولا پا دیوے۔ شہباز گل حکومتی مشینری دا اہم حصہ نیں میں ایہ نہیں کہندا کہ کچہری وچ اوہناں دے نال رولا رپا پان والے لیگیاں دے نال پھڑن پھڑیا کیتا جاوے پر گھٹ توں گھٹ پنجاب دی وزارت اطلاعات دی سطح تے مذمت‘ شذمت تے کھڑکانی چاہیدی اے۔ فردوس آپا جے ایہ سطراں پڑھن تے خدارا ساڈے کالم دی لاج رکھدے ہوئے اک ادھ جملہ شہباز گل لئی ضرور ادا کرو گھٹ توں گھٹ دوہاں دا ڈاک خانہ تے اک ای اے۔ نہیں تے انج دا ایپی سوڈ اگوں کسے ہور دے نال وی ہو سکدا اے۔٭٭