گفتگو روڈ دے چیئر مین
ہن پیپلز پارٹی ای نہیں میاں نواز شریف تے فضل الرحمن وی بھٹو ای بن کے نکلے نیں
لکھت:آصف عنایت
کدی ویلا سی ساڈے وزرائے اعظم نوں ہنری کسنجر، وڈا بش تے عالمی قوتاں عزت نال ڈسکس کردے سن۔ کدی وزیراعظم دی سربراہی وچ اسلامی سربراہی کانفرنس، متفقہ آئین، آقا کریم نوں آخری نبی نہ منن والیاں نوں غیر مسلم قرار دین، ایٹمی پروگرام، میزائل ٹیکنالوجی، بھارت توں فوجیاں دی واپسی، مقبوضہ علاقہ واگزار کران، پاکستانیاں نوں بیرون ملک روزگار دلوان، وطن عزیز وچ سٹیل ملز لان تے روزگار دے موقعے پیدا کرن، زرعی اصلاحات کرن، ایٹمی دھماکے دے مشورے منصوبے تیار تے ایہناں اُتے عمل ہوندا سی۔ (اج ملیشیا نے طیارہ پھڑ رکھیا اے) اج اپنے حمایتیاں دے مخالفاں نوں قبضہ گروپ دے ناں اُتے وزیراعظم وزیراعلیٰ گل کردے نیں، تے ایہناں اُتے پولیس ریڈز کراندے نیں جنہاں نوں اپنی پارٹی وچ شامل کر کے تصویراں بنوائیاں سن۔ کدی کابینہ وچ حفیظ پیر زادہ، ڈاکٹر مبشر حسن، چودھری اعتراز احسن، پرویز صالح جہے لوک سن اج شیخ رشید، واوڈا،گل، فردوس ، حکومت دا چہرہ نیں
وزیراعظم دا دعویٰ اے کہ اوہ واحد سیاستدان نیں جیہڑے فوجی نرسری وچ نہیں پلے۔ کیہ حمید گل توں لے کے اج تیکر کیہڑی نرسریاں وچ رہے نیں۔ بھٹو صاحب نے تے ایوب دور وچ استعفیٰ دے کے جیل کٹی تے پارٹی بنائی، سارے نویں لوک شامل کیتے۔ کسے جنرل دی انگلی نہیں سی۔ پاکستان دا تے نظام ای خاندانی نظام اے تے ایہو وجہ اے کہ معاشرت وچ سیاست دا عکس اے اونج وی جے کسے دے پیو نوں سیاسی طور اُتے ہٹان لئی عدالتی قتل، کسے دی ماں نوں ساری دنیا دے ساہمنے چوک وچ قتل، کسے دے والد نوں جلاوطن تے بعد وچ پیو دھی نوں جیل گھل دتا جائے تے فیر نتیجہ خاندانی سیاست ای ہویا کردا اے۔ وزیراعظم حکومت کرن تاریخ نوں غلط نہ کرن۔ 5 جولائی 1977ء توں 17 اگست 1988ء تے ایس دے بعد 1999ء توں 2008ء تیکر ملک دا بیڑا غرق ہویا بلکہ ہر مارشل لاء دور وچ ملک وچ کرپشن ہوئی تے ناقابل تلافی نقصان ہویا۔ ہزارہ وچ لاشاں احتجاج کردیاں رہیاں۔ ساندہ وچ غریب اپنی بچیاں نوں قتل کر کے خود کشی کر گیا۔ وزیراعظم پتہ نہیں کنہاں لوکاں دے وزیراعظم نیں۔ ایہناں نوں لیان والیاں نوں چاہیدا سی کہ چندہ کر کے بھارتی بجٹ دے نال وزیراعظم دے کردار اُتے فلم بناندے تے ایس وچ ایہناں نوں وزیراعظم دا کردار دے کے شوق پورا کرا لیندے پر ملک دی تقدیر نال نہ کھیڈن دیندے۔ پہلے دن توں جھوٹ اداکاری تے بناوٹی انداز اپناندے گئے۔ ہن زوال دی گھڑیاں نیں چل چلائو، سابقہ حکومتاں دا رونا ای بند نہیں ہو رہیا جد کہ سابقہ حکومتاں دے تجربے کار لوک تے کابینہ وچ نیں۔ کرپشن دے خاتمے دے دعوے اُتے قائم ہون والی حکومت اج کرپشن دا کاروبار چلن دے ریکارڈ قائم کر رہی اے۔ براڈ شیٹ موسوی سیکنڈل ، فارن فنڈنگ، ملائشیا جہاز، مالم جبہ، بلین تری، بی آر ٹی کیہ حکومت دے کول کوئی جواب اے۔ فارن فنڈنگ دے حوالے نال ایجنٹ اگے کر دتے گئے ایہہ نواں بتی ذمہ داری دے زمرے وچ آندا اے جیہڑا براہ راست ذمہ داری ہوندی اے۔
وزیراعظم کابینہ وچ فرماندے نیں ہن آپ فیصلہ کراں گا کہ کابینہ وچ کس نوں رکھنا اے۔ ظاہر اے پہلے بلاول بھٹو، مریم نواز، مولانا فضل الرحمن تے فیصلہ نہیں کردے گویا فیصلہ کدھرے ہور ہوندا ہوئے گا جیہڑا ہن اوہ آپ فیصلہ کرن گے۔ 22 سالہ اسامہ دی گڈی اُتے 22 گولیاں تے ادھی درجن ایس دے بدن وچ اتر گئیاں۔ وزیراعظم نے ایس دے والد نوں اپنے کول بلا کے افسوس تے فاتحہ پڑھی۔ ظاہر اے نویں پاکستان وچ پرسا وی نویں انداز و اطوار نال دتا جائے گا۔ 22 سال حکومت حاصل کرن لئی بندوبست تے ڈھائی سال وچ کارکردگی ویکھیے تے نہیں لگدا اہہ کسے سیاسی پارٹی دے چیئر مین نیں۔ استدلال، بہانے، عذرات اینے نیں کہ موصوف گفتگو روڈ دے چیئر میں لگدے نیں۔ کابینہ دے اجلاس وچ سب لوکاں دیاں ہوائیاں انج اڑیاں ہوندیاں نیں کہ ہجے اصلی کابینہ نہ آ جائے۔ وزیراعظم جے اپنے حافظے نوں بروئے کار لیا کے یاد کر لین کہ ایہناں دے دوالے کون بیٹھے نیں سب دے سب دوجی سیاسی جماعتاں دے لوک نیں تے گھاگھ تجربہ کار نیں۔ خان صاحب نوں نہ تے اوہ دل نال رہنما تسلیم کر کے آئے سن تے ایہہ اوہناں نے آپ وی ثابت کیتا کہ اوہ رہنما نیں تے نہ ای پارلیمانی وزیراعظم۔ ایہناں دی سیاست نال نواز شریف، شہباز شریف، آصف علی زرداری، بلاول بھٹو، مریم نواز، الزامات ، جھوٹے دعوے، وعدے، دلاسے ایہناں دی اپنے منہ توں اپنی تعریفاں تے اپنی خوشامد پسندی کڈ دین تے جنرل حمید گل دی انگلی توں ایمپائر دی انگلی تے موجودہ اک پیج باقی بچ دا اے۔ کاش! خان صاحب نے نوجواناں تے قوم لئی سوچیا ہوندا کوئی عملی اقدام کیتے ہوندے۔ افواہ سازی دی فیکٹریاں، ہوائی قلعے تعمیر، بے بنیاد بیانات تے منڈیاں جہی غیر ذمہ دارانہ گل بات نہ کیتی ہوندی، اپوزیشن توں انتقام دے علاوہ کجھ کیتا ہوندا۔ ہن ایہناں دا Politacal Perception تباہ ہو چکیا ۔ ہن باقی ڈھائی سال کیہ ڈھائی صدیاں وی مل جان جدوں تیکر اپوزیشن زندہ اے ایہناں دی سوچ مثبت کماں ول نہیں آ سکدی۔ قوم نے 72 ورہے وچ بوہت کجھ کھویا ہوئے گا پر جو کجھ پایا اوہ موجودہ حکومت نے ڈھائی ورہے وچ برباد کر دتا۔ ایہناں دی سیاسی پارٹی دا ایہہ عالم اے کہ مینوں ببو برال دا لکھیا ہویا شہر ہ آفاق پنجابی ڈرامہ شرطیہ مٹھے وچ جناب سہیل احمد دا بولیا ہویا مکالمہ یاد آندا اے۔ ڈرامے دا منظر انج دا اے کہ سہیل احمد فقیر نیں اک پتر عابد خان اے جس دے دو پتر نابینے نیں۔امان اللہ تے ببو برال ایہناں نال شادی لئی اک رشتہ آندا اے۔ رشتہ کران والا پچھدا اے کہ گھر تہاڈا اپنا اے کہ کرائے دا اے۔ جناب سہیل احمد اپنے مخصوص لہجے، اواز تے اندازہ وچ کہندے نیں ( رپیہ رپیہ سارے شہر نیں پایا وے پر رجسٹری ساڈھے ناں ای اے) روپیہ روپیہ سارے شہر نے ڈالا ہویا اے پر رجسٹری ساڈے ناں ای اے۔
ایسے طرح پی ٹی آئی وچ پیپلز پارٹی، ق لیگ ، ن لیگ GDA تے دیگر جماعتاں نے افراد دی صورت روپیہ روپیہ پایا ہویا اے پر رجسٹری جناب عمران خان دے ناں اُتے اے۔
ہن کشتی دُبن نوں اے تاں سامان اٍتاریا جا رہیا اے۔ الیکٹیبلز چاہیدے سن ایہناں نوں وی آئندہ سیاسی ٹھکانہ چاہیدا اے۔ محض الزامات ، وعدیاں، وعویاں نال حکومت نہیں چلیا کردی۔ پاک فوج دی تاریخ اے کہ ایس نے اپنا وقار ہمیشہ قائم رکھیا اے۔ چاہے ایہناں دا اپنا کوئی جنرل ہوئے جے ادارے لئی بوجھ بن جائے تے اوہ آن دی آن وچ مشرف بن جایا کردا اے۔ موجودہ حکومت نے فوج دی ساکھ نوں جیہڑی سیاسی طور اُتے نقصان اپڑیا اے اینا نقصان پہلے کدی نہیں ہویا تاں سوال ای پیدا نہیں ہوندا کہ باوقار ادارہ اپنے وقار نوں قربان کردیوے۔ ری گل سٹیٹس دی تے اوہ اج وی قائم اے۔ وطن عزیز وچ تن قسم دے لوک حکومت وچ رہے۔ فوج، پیپلز پارٹی، ن لیگ، یا فیر کوئی اتحاد زیر نگرانی طاقتور اداریاں دے اج وی صورت حال مشرف دور توں مختلف نہیں اے پر کارکردگی منفی اے تاں گلاں تے گل بات توں کوئی ادھا کلو دال نہیں دیندا ایہہ نواں پاکستان بنان چلے۔ کدی پیپلز پارٹی وچ نعرہ سی کہ ،تم کتنے بھٹو مارو گئے، ہر گھر سے بھٹو نکلے گا، اصل وچ بھٹو اک نظریہ تے پیغام اے ، اک کردار اے، جدوجہد دی اک داستان اے۔ ہن پیپلز پارٹی ای نہیں میاں نواز شریف، فضل الرحمن وی بھٹو ای بن کے نکلے نیں۔ وزیراعظم تے ایہناں دی ساری کابینہ صرف گفتگو روڈ دے چیئر مین نیں۔
