دشمن دے مقابلے لئی تیار ی کرو

بھارت سرکار ساڈے دریاواں دا پانی روک کے ساڈی زمیناں نوں بنجر بنا دینا چاہندی اے

لكهت:عتیق انور راجہ

پچھلے کئی دناں توں جدوں شہر ول جانا واں تے شہراں دے بیچوں بیچ توں لنگھن والی نہر دی حالت ویکھ کے دل نوں تکلیف ہوندی اے کدی ایہہ نہر پانی نال بھری ہویا کردی سی تے شہر دی فضا وچ تازگی جہی محسوس ہوندی سی۔ ایس دے پانی دے اُتے کدی بلبل تے فاختاپروا کردیاں تے محبت بھرے گیت گاندیاں سی۔ پر اج کل ایہہ نہر نہ صرف خشک اے بلکہ ایہہ گندگی تے غلاظت دا ڈھیر بن چکی اے۔ نہر وچ پانی تے سُک ای چکیا اے پر روز سویرے ایس وچ مناں دے حساب نال پلاسٹک شاپراں وچ صدقے دے گوشت دے ناں اُتے پتہ نہیں کیہ کجھ سُٹیا جا رہیا اے۔ روز سوشل میڈیا اُتے کراپ، کر کے شہر دی صفائی ستھرائی دی تصویراں لان والی انتظامیہ دی توجہ ایس پاسے پتہ نہیں کیوں نہیں ہو رہی ۔ پرانے وقتاں وچ کہندے سن کہ ’’وگدا پانی پاک ہوندا اے‘‘ پر جدوں اسیں نہراں ندی نالیاں تے دریائواں دے پانی وچ گندگی سٹنی شروع کیتی اے تے اسیں پاک پانی نوں پلید کر دتا اے۔ جس نال اسیں نعمتاں دی بے قدری دے مرتکب ہوئے آں تے ایسے بے قدری دا نتیجہ اے کہ ساڈے دریا خشک ہو رہے نیں۔ سونا اگلدی زمین خشک ہوندی جا رہی اے۔ فضائواں وچ ہر ویلے زہریلی گیس محسوس ہوندی اے۔ اونج تے اسیں بھارت دی ہر شر انگیزی برداشت کردے چلے جا رہے آں پر مینوں لگدااے کہ بھارت دے نال پانی دے مسئلے اُتے ساڈی جنگ طے اے کیوں جے جدوں ساڈی فصلاں خشک سالی دا شکار ہون گیاں تے کسان دے نال عوام وی دشمن نوں للکاردی باہر آ جائے گی۔
اسیں جان دے آں کہ ایہہ دور میڈیا دی طاقت دا دور اے یعنی جس دا جس قدر کسے دا بیانیہ طاقتور ہوندا اے یا جو جس قدر چنگے انداز وچ اپنا موقف پیش کردا اے دنیا والے ایسے دی گل نوں تسلیم کر لیندے نیں۔ ہن ویکھو کہ وٹس ایپ ہوئے، فیس بک یا کوئی دوجا سوشل نیٹ ورک جدوں اسیں تقلید ای کرنی اے تے فیر ساڈے حقوق دی حفاظت کنج ہو سکدی اے۔ اج کل بوہت سارے پاکستانی اپنی پرائیویسی توں پریشان نیں پر میں تے ایہہ ویکھیا اے کہ سوشل نیٹ ورک اُتے کوئی وی ایپلی کیپشن ڈائون لوڈ کرو تے اوہ ساڈے توں ساڈے فون وچ موجود ہر شے اُتے دسترس منگے بنا سانوں مطلوبہ سہولت دین نوں تیار نہیں ہوندے۔
کیوں جے سانوں شوق ہوندا اے نویں نویں ایپلی کیشنز نوں چلان دا تے ساڈے ایس شوق دے عوض سانوں مختلف وقتاں وچ مختلف ملکاں دی ایجنسیاں ساری معلومات حاصل کر لیندیاں نیں۔ ایس لئی واٹس ایپ ولوں فیس بک اُتے معلومات منتقل ہون یا فیس بک توں امریکہ و اسرائیل اسیں بے بس آں۔ ساڈے لوک سوشل نیٹ ورک استعمال کرن توں ہن رک نہیں سکدے کہندے نیں کہ سوشل نیٹ ورک نوں ہینڈل کرن والیاں وچ اکثریت ساڈے دشمن ملک بھارت تے اسرائیل دے لوکاں دی اے۔ ساڈے نوجوان ہونہار تے بوہت نیں پر ساڈا تعلیمی نظام اینا بوسیدہ ہو چکیا اے کہ ایس توں نکلن والے صرف نوکری تلاش کردے نیں صرف اپنا چنگا مستقبل ای ایہناں دا خواب ہوندا اے۔ ساڈے لوک چاہے جنہے وڈے عہدے تیکر اپڑ جان، وطن دی خدمت دے ناں اُتے ایہناں دی ترجیحات وچ اپنی تے اپنیاں دی نسلاں سنوارنا ای ہوندا اے۔ اوہ ہر حال وچ ودھ توں ودھ پیسہ بنانا چاہندے نیں۔ پیسے دے پجاریاں توں ملکی مفادات دی حفاظت کنج ہو سکدی اے۔ ساڈے قومی مسائل تے قومی ضروریات ودھدی جا رہیاں نیں تے قومی وقار اُتے روز سوالیہ نشان لگ جاندا اے۔ سانوں ایہہ نقطہ سمجھنا ہوئے گا کہ ایس ویلے بھارت ای نہیں بلکہ دنیا دا ہر طاقت ور ملک تے ادارہ جارحیت اُتے تلیا ہویا اے سانوں ایس مشترکہ دشمن دے مقابلے لئی تیاری کرنی ہوئے گی۔ اپنی توانائیاں اپنیاں نوں ہران وچ لان توں گریز کرنا ہوئے گا۔ سانوں دشمن نال ہر میدان وچ مقابلے لئی تیاری دا حکم اے۔ اسیں اکثر ایہہ خبر سن دے آں کہ لائن آف کنٹرول دے مقام اُتے بھارتی جارحیت دی وجہ نال ساڈے کئی شہری شہید یا زخمی ہو گئے انج دیاں خبراں وی سانوں ملدیاں نیں کہ بھارتی ایجنسیاں دے کارندے اپنے مذموم مقاصد دی تکمیل وچ پاکستان وچ سرگرم نیں۔
سانوں ایہہ وی دسیا جاندا اے کہ بھارت سرکار ساڈے دریائواں دا پانی روک دے ساڈی زمیناں نوں بنجر بنا دینا چاہندی اے۔ انج دی خبراں وی سنیاں جاندیاں نیں کہ بھارتی میڈیا اپنی حکومت دے ایما اُتے پری پلان طریقے نال پاکستان مخالف تے اسلام مخالف پروگرامز ترتیب دیندا رہندا اے۔ بھارتی فلماں جنہاں ساڈے لوک شوق نال ویکھدے نیں ایہناں وچ وی اسلام تے پاکستان دے خلاف مسلسل زہر اگلیا جا رہیا اے۔ پر ساڈے ولوں کدی زبانی کلامی احتجاج تے کدی اک ادھ جاسوس نوں پھڑن دی ای خبر پیش کیتی جاندی اے۔ مینوں لگدا اے کہ میرے ملک وچ یا تے کوئی تھنک ٹینک ہے ای نہیں جیہڑا دشمن دی چالاں دے جواب وچ زیادہ موثر چال چل سکے یا ساڈے تھنک ٹینک وچ بیٹھے لوکاں دی اپنی ترجیحات کجھ ہور نیں کیوں جے جے اسیں واقعی دشمن نال مقابلہ کرنا اے تے ایہنوں شکست فاش وی دینی اے تے سانوں اپنی حکمت عملی تبدیل کرنی پئے گی۔