الیکٹڈ موروثیت تے سلیکٹڈ جانشین

اج امریکہ دا دارالحکومت فوجی وردی دی پناہ وچ دے دتا گیا اے

لكهت:طیبہ ضیاء چیمہ

مریم نواز اپنے پیو دی تے بلاول زرداری اپنے پیو دے سلیکٹڈ چیئر پرسن نیں۔ جعلی وصیت توں سلیکٹڈ بلاول زرداری وی جمہوریت دی گل کردا اے؟ تجربہ کار بزرگ رہنمائواں نوں غلام بنا کے پارٹی اُتے مسلط ہونا جمہوری انتخاب اے؟مریم نواز ووٹ نوں عزت دے کے پارٹی دی جانشین منتخب ہوئیاں سن؟ نہ الیکشن لڑیا نہ پارٹی نے ووٹ توں جانشین منتخب کیتا، بادشاہ دی شہزادی بس محل دے اندر ای سلیکٹ ہو گئی؟ ایہہ نسلی سلیکٹڈ ملک و قوم دی جمہوریت دے مامے پھوپھی بن گئے۔ مثالاں امریکی جمہوریت دی دیندے نیں جیہڑی پوری دنیا دا جمہوری ماما بنیا پھردا سی تے اج خاکی وردی والے جمہوریت سنبھالدے پھر رہے نیں؟ پوری دنیا اُتے جمہوریت دی آڑ وچ حملے کرن والیاں دے اج اپنے گھر وچ جمہوریت دا جنازہ نکل چکیا اے۔ جمہوریت بچان لئی فوج نوں مداخلت کرنی پئی اے۔ امریکی آرمی چیف نوں فوج نوں میموجاری کرنا پیا اے کہ سیاست وچ مداخلت نہ کیتی جائے۔ جدوں ایہو جملہ پاک فوج دا جرنیل کہے تے غلاماں دا ٹولہ مذاق بناندا اے؟ فوج مخالف بیانیہ پاکستانیاں نے منہ پردے ماریا اے۔
اج امریکہ دا دارالحکومت فوجی وردی دی پناہ وچ دے دتا گیا اے۔ امریکہ دا آرمی چیف مکمل نگرانی کر رہیا اے۔ ٹرمپ حواریاں دی دہشت گردی وچ کجھ ریٹائرڈ فوجی افسر وی شامل سن۔ ایس لئی امریکی آرمی چیف نوں اپنی فوج نوں ہدایات جاری کرنی پئی کہ جمہوریت نوں بچائو ایس وچ مداخلت نہ کرو۔ ایہہ کہنا کیہ جمہوریت وچ مداخلت سمجھی جائے؟ نو منتخب صدر 20 جنوری نوں اپنے عہدے دا حلف چکن گے تے ایس حلف برداری دی تقریب توں پہلاں ای واشنگٹن ڈی سی عملا کسے فوجی چھائونی جہیا منظر پیش کر رہیا اے۔ ڈونلڈ ٹرمپ دے حامیاں ولوں واشنگٹن ڈی سی وچ کانگریس دی عمارت کیپٹل ہل اُتے دہشت گردی توں بعد دارالحکومت دی سکیورٹی انتہائی سخت اے تے کسے وی ناخوشگوار صورت حال توں بچن لئی مزید اقدامات دا سلسلہ جاری اے۔ دارالحکومت دی سکیورٹی لئی ہزاراں پولیس اہلکاراں دے نال 10 ہزار فوجی اہلکار وی تعینات کیتے گئے نیں جد کہ کسے وی ناخوشگوار واقعے دے اندیشے دے پیش نظر خفیہ ادارے وی پوری طرح متحرک نیں۔ ایف بی آئی دے مطابق 20 جنوری نوں ہون والی تقریب توں پہلاں یا ایس دن وی واشنگٹن ڈی سی وچ مزید پرتشدد واقعے ہو سکدے نیں۔ یاد رہوے کہ نیشنل گارڈز امریکہ دی فوج تے فضائیہ دے ریزو اہلکاراں اُتے مشتمل فورس اے جس دے اہلکاراں دی تعداد لگ بھگ ساڑھے چار لکھ دے نیڑے وے۔ ایہناں اہلکاراں نوں کسے وی ہنگامی صورت حال یا قدرتی آفت دی صورت وچ امدادی کاروائیاں یا سول انتظامیہ دی مدد لئی طلب کیتا جا سکدا اے۔ جمہوریت تے آزادی رائے دا چمپئن اج آپ اوہ سب کر رہیا اے جس دا دنیا نوں درس دتا کردا سی۔ صدر ٹرمپ دے سوشل میڈیا اکائونٹ بند کرنا ملکی سکیورٹی قرار دتا جا رہیا اے۔ اپنی ریاست دے خلاف گل آئی تے اپنے ای ملک دے صدر دی اواز دبا دتی تے دوجیاں دے ملکاں وچ دخل اندازی تے مخالف پراپیگنڈہ آزادی رائے منیا جاندا اے؟ اپنے خلاف ای صدر دی رائے برداشت نہیں ہو پائی تے مسلماناں دے نبی دے خلاف گستاخ خاکے تے توہین آمیز مواد شائع کرنا آزادی رائے قرار دتا جاندا اے؟ اپنی ایس دوغلی پالیسی پاروں ای دنیا دی سپر پاور اج اپنے ای جال وچ پھس گئی اے۔ ٹرمپ دے حواری جنونیت دا شکار ہو چکے نیں۔ ٹرمپ کلٹ بن چکیا اے۔ انتقام تے شکست شدت پسندی اختیار کر چکے نیں۔ ہوس اقتدار خواہ ستر سالہ پاکستان وچ ہوئے یا دو سو ستر سالہ امریکی سپر پاور وچ ہوئے، نظام دیاں دھجیاں کھلار کے رکھ دیندی اے۔ پاکستان وچ الیکٹڈ موروثیت ایسے ہوس اقتدار دا نتیجہ اے۔ جمہوریت سب بکواس اے، ایس دا ثبوت ٹرمپ نے وی دے دتا کہ اقتدار نہیں تے فیر ریاست وی نہیں، نظام دی اٹ نال اٹ وجا دتی جائے کہ ناکھواں گے نہ کھان دیاں گے۔ ایہہ اے اوہ امریکہ جیہڑا جمہوریت دا ماما بنیا پھردا سی، تے اوہ اے پاکستان جتھے موروثی سلیکٹڈ اولاداں جمہوریت دا ماما پھوپھی بنے پھردے نیں۔ سارے ملک فوج دی پشت پناہی توں چل رہے نیں ، اوہ ای فوج لوڑ پین اُتے ساہمنے آ جاندی اے فیر جمہوری ڈرامہ بازی نوں مقدس صحیفہ بنان دی ڈرامہ بازی کیوں؟