بابری مسجد توں کرک مندر تک

لكهت: مظلوب وڑائچ

مسجد ڈھا دے، مندر ڈھادے ڈھا دے جو کجھ ڈھیندا
اک بندے دا دل نہ ڈھاویں رب دِلاں وِچ ہندا
دوستو! اسیں مذہب دیاں کتاباں وچ پڑھیا اے۔ اللہ تعالیٰ آپ فرماندا اے کہ کسے دے خدا نوں برا نہ کہوو نہیں تے جواب وچ اوہ وی تہاڈے خدا نوں برا بھلا کہہ سکدا اے۔ بھارت سیکولر ملک اے بھارتی میڈیا‘ اوہدے سیاستدان تے سول سوسائٹی بڑے مان نال بھارت نوں سیکولر قرار دیندے نیں۔ سیکولر دا مطلب دہریت نہیں سگوں ایہدا مطلب سیکولر ملک وچ مذہبی غیرجانبداری اے تے بھارت دنیا وچ اپنے آپ نوں انج ای باور کراندا اے پر بھارت کدی وی سیکولر نہیں رہیا۔ اوتھے ہمیشہ توں ہندو شدت پسندی عروج تے رہی اے۔ دنیا دی اکھاں وچ مٹی پان لئی کدی کسے مسلمان نوں صدر بنا دتا جاندا اے کدی منموہن سنگھ ورگے بندے نوں وزیراعظم لا دتا جاندا اے۔ اوتھے اقلیتاں دے نال جو کجھ ہوندا اے پوری دنیا اوہدے توں واقف اے تے ایسے پاروں اوتھے آزادی دی دو درجن توں ودھ تحریکاں چل رہیاں نیں۔ بھارتی سیاستدان اوہ اج دے حکمران ہون یاں ماضی دے‘ اقلیتاں دے بارے اوہناں دا تعصب اکو جیہا اے۔ مسلمان تے سکھ تے اوہناں لئی ناقابل برداشت نیں۔ ایہ تعصب صرف سیاستداناں‘ میڈیا تے بیوروکریٹاں دی حد تک ای نہیں ہندوستان دیاں عدالتاں وی اقلیتاں خاص طور تے مسلماناں دے خلاف بغض تے عناد نال بھریاں پئیاں نیں تے اوہ صحیح معنیاں وچ حکومت دی کٹھ پتلی دا کردار ادا کر رہیاں نیں۔
ایسے حوالے نال کئی مثالاں دتیاں جا سکدیاں نیں ایہناں وچوں سب توں اہم تے سجری مثال بابری مسجد نوں ڈھا کے رام مندر دی اساری دا فیصلہ اے۔ ایہ فیصلہ سپریم کورٹ دے پنج رکنی بنچ نے دتا جہدے وچ اک مسلمان جج عبدالنذیر وی شامل سی اوہنوں شاید اپنی سلامتی تے اپنے خاندان دیاں جاناں پیاریاں سن کہ اوہنے وی تعصب‘ کینے تے مسلماناں دے نال عناد پرستی تے مبنی فیصلے توں اپنے ضمیر دی گواہی دے الٹ اتفاق کر لیا حالاں کہ ایہ فیصلہ الٰہ آباد ہائیکورٹ دے فیصلے دے خلاف سی اوس فیصلے نوں وی مسلماناں ولوں قبول نہیں سی کیتا گیا ہائیکورٹ دے فیصلے وچ بابری مسجد نوں تن حصیاں وچ ونڈ کے اک حصہ مسجد دوجا مندر لئی مختص کیتا گیا تے تریجا نرموہی اکھاڑے دے حوالے کرن نوں کہیا گیا۔ ایس فیصلے نوں مسلماناں تے ہندوئواں نے چیلنج کیتا سی جہدے تے سپریم کورٹ دا انصاف قتل نوں کرن والا فیصلہ سامنے آیا۔ دوجے پاسے پاکستان اے جو سیکولر نہیں اسلامی جمہوریہ اے جہدے وچ اقلیتاں دے حقوق دا تحفظ کسے وی ملک توں ودھ کے کیتا جاندا اے۔ پاکستان وچ کجھ عناصر بیرونی اشاریاں تے کدی کدی اقلیتاں دے خلاف کوئی حرکت کر جاندے نیں۔ بھارت تے پاکستان وچ فرق ایہہ وے کہ اجہے واقعات نوں کدی بھارت وانگوں چھپایا نہیں جاندا۔ میڈیا وچ کوریج ہوندی اے تے جرائم پیشہ بندیاں دے خلاف قنون دے مطابق کاروائی کیتی جاندی اے۔
ایہدی سجری مثال کرک مندر نوں ساڑیا جانا اے۔ ایہ اک شرمناک واقعہ اے پر جیویں ایہ واقعہ ہویا پوری حکومتی مشینری حرکت وچ آ گئی۔ چار سو لوکاں دے خلاف مقدمہ درج ہویا لوکاں نوں ایس اقدام تے اکسان والیاں سنے ڈیڑھ سو بندیاں نوں پھڑ لیا گیا۔ مندر دی چھیتی طور تے اساری تے مرمت دافیصلہ ہویا۔ پورا پاکستان ہندو برادری دی حمایت وچ اٹھ کھلوتا۔ سپریم کورٹ نے چھیتی نوٹس لیا۔ انکوائری کمیشن بنیا جنہے 48گھنٹیاں وچ رپورٹ مرتب تے ایہدی سفارشات تے عمل وی شروع ہو گیا۔ انج بھارت وچ کدی نہیں ہویا۔ اجہے مائنڈ سیٹ دے پچھے یقینا بھارتی ہتھ اے تے ایہ اوہو ذہنیت اے جو مچھ وچ یاراں ہزارہ مزدوراں دے قتل وچ ملوث اے۔ ایہناں لوکاں نے اپنی بدباطنی تے خبث نوں کدی چھپایا نہیں‘ کھلا اعلان کردے نیں اُتوں تھلے تک افغانستان اے۔ ویکھدے آں ریاست ایس مائنڈ سیٹ تے کیویں قابو پاندی اے۔ اجے تے اوہناں نے ریاست نوں سٹینڈ سٹل کر رکھیا اے۔
دوستو! پچھلے دیہاڑے ساڈے ساتھی تے معروف کالم نگار یاسین وٹو وفات پا گئے۔ یاسین وٹو (مرحوم) لہور شہر دی ادبی محفلاں دی جان سن تے اوہناں نوں مجید نظامی تے اوہناں دی فیملی ولوں ہمیشہ مکمل آشیرباد تے دعاواں حاصل رہیاں۔ محترم وٹو صاحب میاں تے شریف برادران دے وی بڑے قریبی ساتھیاں وچ شمار ہوندے سن۔ مرحوم محمد یاسین وٹو صاحب نوں ستارہ شناسی تے دست شناسی تے عبور حاصل سی تے اوہ ایس فن نوں صرف فن نہیں سن سمجھدے اکثر محفلاں دی جان سمجھے جاندے سن۔ مرحوم دا انداز سخن تے الفاظ نوں پرون دا انداز وکھرا تے یکتا سی۔ میری تے باقی ساتھیاں دی دعا اے کہ اللہ تعالیٰ اوہناں جواررحمت وچ جگہ دیوے تے اوہناں دے کبیرہ گناہواں نوں معاف فرمائے۔ (آمین)٭٭