‘‘بادشاہی مسجد لہور وچ ’’ داعی اتحاد امت کانفرنس
پروفیسرحکیم شفیق کھوکھر
گزشتہ جمعتہ المبارک نوں سترہویں داعی اتحاد امت کانفرنس انعقاد پذیر ہوئی جس دی صدارت وفاقی وزیر مذہبی امور و بین المذاہب ہم آہنگی پاکستان ڈاکٹر پیر نور الحق قادر نے کیتی۔ایس عظیم الشان کانفرنس وچ شریک مختلف مکتبہ ہائے فکر دے علماء کرام تے عوام نے شرکت کیتی تے بادشاہی مسجد دے سابق خطیب مولانا ڈاکٹر سید عبدالقادر آزاد جنہاں نے اج توں تقریباً 50سال پہلاں اتحاد ملت اسلامیہ دا خواب ویکھیا تے بادشاہی مسجد لہور نوں اتحاد امت اسلامیہ دی علامت بنا دتا ۔ اوہناں نے مسجد وچ سارے مکاتیب فکر نوں بلا کے ایہناں توں اتحاد ملت دے عمل نوں اگے ودھوایا۔ اوہناں نے بطور رکن مرکزی روئیت ہلال کمیٹی پورے ملک وچ اک عید منان لئی بھرپور کوشش کیتی۔ اوہ اکثر ایس سلسلے وچ کیتی جان والی مذموم کوششاں دا وی ذکر کردے رہے نیں جنہاں دا ذکر کسے ہور موقعے اُتے کراں گا۔ ایس دا فرنس وچ جتھے علماء کرام نے مولانا سید ڈاکٹر عبدالقادر آزاد دی دینی تے ملی خدمات اُتے خراج تحسین پیش کرن دے نال نال ایہناں دے فرزند ارجمند مولانا سید عبدالخبیر آزاد دے چیئر مین مرکزی روئیت ہلال کمیٹی مقرر ہون اُتے ایہناں نوں مبادکباد دتی گئی تے ایس اقدام نوں وزیراعظم پاکستان تے وفاقی وزیر مذہبی امور ڈاکٹر پیر نور الحق قادری دا بہترین اقدام قرار دتا۔
ایس موقعے اُتے صدر محفل ڈاکٹر پیر نورالحق قادری نے مولانا عبدالقادر آزاد دی خدمات نوں خراج عقیدت پیش کردے ہوئے ایہناں نوں امام السلاطین تے امام الملوک قرار دتا تے کہیا کہ آب حیات اللہ تے ایس دے رسول نال تعلق اے۔ اوہناں نے کہیا کہ دین دے نال ساڈا تعلق جوڑن والا امام اے۔ اللہ تے آپ ﷺ نال تعلق نوں برقرار رکھن والا امام مسجد اے جے کسے نوں قرآن پاک یاد اے تے ایہہ ایہناں علماء کرام دی خدمت اے، جیڑی کسے حکومت توں توقع دے بغیر دین دی خدمت کر رہے نیں تے مسیتاں دے دروازے کھلے رکھدے نیں۔ اوہناں نے ایس موقعے اُتے اعلان کیتا کہ وزیراعظم دی ہدایت اُتے خیبر پختونخوان تے پنجاب دی مسیتاں دا سروے کرایا جا رہیا اے جس دے بعد مسیتاں دے علمائے کرام نوں 10 ہزار روپئے ماہوار اعزازیہ دتا جائے گا۔
اوہناں نے جس نوں وی اللہ نے دین دے رستے اُتے لایا ایہنوں نجات مل گئی اوہناں نے کہیا کہ سانوں کسے وی کم دے انجام دا علم نہیں ہوندا کہ اوہ کنج دا ہوئے گا؟ چنگا ہوئے گا یا نہیں ہوئے گا؟ پر جنہوں اللہ نے دین دے رستے اُتے لایا ایس دا انجام خیر رہوے گا۔ کیوں جے اللہ جنہوں نوازنا چاہندا اے ایہنوں دین دے رستے اُتے لا دیندا اے۔ اوہناں نے بادشاہ مسجد لہور دی روحانی برکات دا حوالہ دیندے ہوئے کہیا کہ جدوں وی ایس مسجد وچ آنا واں میرے اُتے اک کیفیت طاری ہو جاندی اے۔ اوہناں نے کہیا کہ اللہ تعالیٰ ولوں علمائے کرائم نوں لوکاں نوں ملان دا جیہڑا کردار تعویض کیتا گیا اے مولانا عبدالقادر آزاد نے اوہ بڑی خوش اسلوبی نال ادا کیتا ۔ اوہناں نے نظریہ پاکستان دے خلاف دشمناں دی سازشاں نوں ناکام بنایا۔ ایتھوں اٹھن والی ایہناں دی اواز فلسطین، کشمیر، بوسینا تے دوجے اسلامی ملکاں وغیرہ اسلامی ملکاں دے مظلوم مسلماناں دی اواز سی۔ اوہناں نے اعلان کیتا کہ بوہت سارے اسلامی ملک اسرائیل نوں تسلیم کرن نوں تیار سن پر عمران خان دے بیانیے تے ساڈے موقف دے بعد ایہناں دا ارادہ بدل گیا اے۔
مولانا سید عبدالالخبیر آزاد نے اپنے خطاب وچ مجلس وچ شرکت کرن والے علماء کرام دا شکریہ ادا کیتا تے یقین دلوایا کہ اوہ سارے مکاتیب فکر دے علماء کرام نوں نال لے کے تے جدید ٹیکنالوجی توں مدد لے کے اپنا فرض ادا کرن گے۔ اوہناں نے اپنے والد سید عبدالالقادر آزاد دی بادشاہی مسجد تے اتحاد ملت لئی خدمات نوں بیان کیتا تے کہیا کہ اوہ ایہناں دے مشن اُتے ای عمل پیرا نیں۔ ایس محفل وچ سارے مقررین نے اپنے خطاب وچ کہیا کہ ملک نوں ایس ویلے وی اتحاد یکجہتی دی لوڑ اے۔ علماء کرام نوں مولانا ڈاکٹر سید عبدالقادر آزاد وانگوں اتحاد و یکجہتی دے فروغ لئی بھرپور جدوجہد کرنی چاہیدی اے۔ ایس طرح ای اسیں پاکستان دی سلامتی، دفاع تے تحفظ دا فرض ادا کر سکنے آں۔ کانفرنس وچ شریک سارے علماء کرام نے ہتھاں وچ ہتھ پا کے یکجہتی دا اظہار کیتا۔ جس وچ شیخ الحدیث مفتی مبشر نظامی،علامہ محمد حسین اکبر،پیر ناظم حسین شاہ،مولاناسردارمحمد خان ،علامہ زبیراحمد ، مفتی سید عاشقحسین شاہ ،مولانا اسد عبید، مولانا اسد اللہ فاروق،حافظ کاظم رضا نقوی ، علامہ محمد رشید ترابی ، مفتی عبدالمعید اسد لدھیانوی ، علامہ پیر مسعودقاسم قاسمی ،مولانامحمد اسحاق ساقی،مولانا نعمان حامد ، مولانا مفتی زبیرانعام الحق،مولانا زبیرعابد،مولانا عاصم مخدوم ، اصغرعارف چشتی،کلیم ڈار،عمران صدیقی،مولانا شعیب الرحمان ،مولانا سیفاللہ خالد ،مولانا محمد عباس غازی،قاری اسامہ شوکت،علامہ شکیل الرحمان ناصر،علامہ عبدالستارنیازی،مولانا ایوب خان ثاقب ،سید عبدالقدیرآزاد، صاحبزادہ سید عبدالبصیرآزاد،میں اجمل عباس ، بلال احمد میر، حسان اللہ تبسم،اسامہ اجمل قاسمی،خواجہ جاوید اسلم صحاف،حافظ سید عبدالرزاق آزاد مولانا انیس الرحمان،محفوظ احمد،تے دوجے حاضرین شامل سن۔ آخر وچ پاکستان دی سلامتی، پاکستان دی فوج دی مضبوطی، عالم اسلام دی خوشحالی، فلسطین تے کشمیر دی آزادی تے مولانا ڈاکٹر سید عبدالقادر آزاد دے درجات دی بلندی لئی خصوصی دعا کیتی گئی۔
مولانا سید عبدالقادر آزاد نوں ایہہ اعزاز وی حاصل اے کہ اوہناں نے بوہت سارے بندیاں نوں قبول اسلام دی سعادت حاصل کرن دی راہ ہموار کیتی۔ اوہناں نے بادشاہی مسجد وچ اعتکاف کرن دی روایت دی بنیاد رکھی، ہن ایس مسجد وچ بغیر کسے امتیاز دے ہر علاقے، مسلک تے عمر دے بندیاں نوں بغیر کسے رقم دی ادائیگی دے اعتکاف دی سہولت میسر آندی اے۔ ایہو نہیں اعتکاف دے دوران 10 دن تیکر روزانہ قرآن مجید دی تلاوت دا وی اہتمام کیتا گیا سی۔ جنہوں پاکستان ٹیلی ویژن تے ریڈیو پاکستان براہ راست ٹیلی کاسٹ تے نشر کردے سن۔ پر بدقسمتی نال پچھلے دور حکومت وچ ایس اہم دینی کم نوں ترک کر دتا گیا سی۔ ایس لئی ضروری اے کہ موجودہ حکومت ایس سلسلے نوں بحال کرے تاں جے پوری دنیا دے لوکاں تیکر ایس دی برکات اپڑن تے سانوں ثواب دارین ملے۔ امید اے کہ پیر ڈاکٹر انوار الحق قادری ایس معاملے اُتے رمضان المبارک دی آمد توں پہلاں اقدام چکن اُتے توجہ دین گے۔
