سوشل میڈیا اک نواں میدان

میر شکیل الرحمان سنے میرے بوہت سارے دوست ڈیجٹیل میڈیا نوں گٹر نال تشبیہہ دیندے نیں

جاوید ملک

میں ایہہ فیصلہ نہیں کر پاندا کہ اسیں قدامت پسند زیادہ نیں یا سست المزاج پر ایہہ طے اے کہ جدت نوں اپنان وچ جس قدر غفلت اسیں کرنے آں شاید ای دنیا وچ ایس دی کوئی نظیر مل پائے جدوں پانی سر توں چڑھ جاندا اے تے مجبوراً سانوں ترکی دی ٹرین نال لٹکنا پیندا اے نہیں تے جس ویلے تیکر حیلے بہانیاں دا آسرا موجود ہوئے اسیں ایہناں دے پچھے پناہ لیندے رہندے نیں میں جدوں صحافت وچ پیر رکھیا تے جدت ٹیڑھی میڑھی ہو کے اخباری دفتراں وچ وڑ چکی سی کمپیوٹر آسانیاں پیدا کر رہیا سی تے اخباراں دے تن لازمی شعبے خطاطی، تصویراں، لائبریری تے کاپی پیسٹنگ دم توڑ رہے سن۔ کمپیوٹر دا خیال کسے نویں نویلی دلہن وانگوں رکھیا جاندا ہلکی جہی گرد وی پئے جاندی تے ٹیکنیکل اسٹاف کہرام بپا کر دیندا سی ایہناں دناں اک اخباری مالک اخبار دی تاخیر توں اشاعت اُتے ملازمین اُتے برہم ہو رہیا سی کہ کاپی تاخیر توں تیار ہون دی وجوہات دسدے ہوئے کمپیوٹر شعبہ دے انچارج نے دسیا کہ سر کئی دن توں سرور مسئلہ کر رہیا اے جس دی وجہ نال تاخیر ہوندی اے۔
مالک سخت برہم ہویا تے گالی دے کے کہیا ایس سرور نوں فوراً ملازمت توں برخواست کر دیوا مینوں اپنے ادارے وچ مسائل پیدا کرن والے ملازمین نہیں برداشت کرن گے کمپیوٹر دے آ جان دے بعد وی لمبے عرصے تیکر مسائل برقرار رہے صفحہ جوڑن دا عمل مشکل تے پیچیدہ ای رہیا سب ایڈیٹرز کاپی پیسٹر دے نال لکڑی دے تختہ (پیسٹنگ ٹیبل) دے کول کھڑے رہندے خبر دی اک اک سرخی نوں قینچی توں تراشیا جاندیا متن علیحدہ توں کٹ کے جوڑیا جاندا ایہہ اک کھٹن تے لمبا عمل تے سی ای پر ایس وچ غلطی رہ جان دے امکانات وی بوہت زیادہ سن اج ایہہ سارا عمل بوہت سہل اے صفحہ کمپیوٹر وچ جڑ جاندا اے تے پورے صفحے دا پرنٹ لے لیا جاندا اے صرف رنگین اخبار دے رنگ جوڑن لئی کاپی پیسٹر نوں معمولی محنت کرنی پیندی اے پر ایہہ محنت ایس دور وچ اک صفحہ جوڑن دی محنت دا اک فیصد وی نہیں ٹیکنالوجی آسانیاں لیائی اے۔
کمپیوٹر عام ہون تے اردو دے بہتر پروگراماں دے رائج پان دے بعد اک دور وچ اخبارات و جرائد دا ریکارڈ اجراء ہویا دور دراز شہراں تے پنڈاں توں وی اخبارگھاس پھونس وانگوں اگدے چلے گئے ایس بہتات نے معیار نوں تے متاثر کیتا پر روزگار دے نویں مواقعے ضرور پیدا کیتے ایس تیز رفتار ٹریفک دے اگے الیکٹرانک میڈیا اسپیڈ بریکر ثابت ہویا تے صحافت دی لگام اک وار فیر عام بندا تے کارکنان دے ہتھ توں نکل گئی سیھٹوں دا دوبارہ راج قائم ہویا میڈیا ہائوسز دی اصطلاح ساہمنے آئی ٹی وی چینل چونکہ پیسیاں دا کھیڈ سی ایس لئی اجارہ داریاں مضبوط ہوئیاں پر ایہہ سب اک دہائی وی برقرار نہ رہ سکیا تے ہن سوشل میڈیا نے نویں راہواں کھول دتیاں نیں میر شکیل الرحمان سنے میرے بوہت سارے دوست ڈیجٹیل میڈیا نوں گٹر توں ایس لئی تشبیہہ دیندے نیں کہ ایس میڈیم نے اک وار فیر صحافت نوں کارکنان دی جھولی وچ پا دتا اے تے ایس نوں ہضم کرنا سرمایہ دار لئی انتہائی مشکل اے۔
پچھلے دن تھنکر جرنلسٹ فورم دے منتظمین ڈاکٹر سعدیہ کمال تے امجد قریشی نے ڈیجٹیل میڈیا دی اہمیت تے صحافیاں لئی موقعے دے عنوان توں نیشنل پریس کلب وچ اک نشست دا اہتمام کیتا سی جس دی خاص گل نوجوان صحافی صدیق جان دی شرکت سی جنہاں نے مختصر مدت وچ ڈیجٹیل میڈیا دے پلیٹ فارم اُتے اپنا لوہا منوایا ایہناں دی کامیابی سارے صحافیاں تے خاص طور تے رپورٹرز لئی اک قابل تقلید مثال اے پروگرام وچ سینئر صحافی فاروق اقدس نے وی شرکت کیتی فاروق اقدس تن دہائیاں توں پرنٹ میڈیا اُتے راج کر رہے نیں اردو صحافت وچ ایہناں دا اپنا اک مقام اے میں اپنے دور طالب علمی توں ایہناں نوں پڑھ رہیا واں تے ایہناں دا معتقد واں جے اوہ اپنے کم دا معمولی حصہ وی ڈیجٹیل میڈیا دی نظر کر دیئے تے اک قد آور بلاگر دے طور اُتے ساہمنے آن گے ایہناں دی جیل کہانی تاریخ لئی قیمتی اثاثہ اے صدیق جان اپنے چنگے بُرے تجربات توں آگاہ کر رہے سن ایہناں دے ٹیکنیکل شعبہ دے ممبر تصدیق نے وی صحافیاں نوں سوشل میڈیا دے اسرار و رموز توں آگاہ کیتا پروگرام دے اختتام اُتے صحافی دوست وحید ڈوگر دے نال صدیق جان توں مختصر نشست رہی تشنگی برقرار اے میرے سنے سارے صحافیاں نوں ایہناں دے تجربات توں مستفید ہونا چاہیدا اے تے ڈیجٹیل میڈیا دے میدان وچ طبع آزمائی ضرور کرنی چاہیدی اے۔