سچ بولنا جرم اے

لكهت: مظہر برلاس

35سالہ جمہوری داستان وی عجیب اے۔ اٹھ روپیے فی ڈالر توں شروع ہون والا سفر اک سو سٹھ تے اپڑ گیا اے۔ تعلیمی سہولتاں وی تنزلی ول گئیاں‘ ایہو حال صحت تے دوجے شعبیاں دا اے جی ٹی ایس دیاں بساں پتہ نہیں کون کھا پی گیا۔ 1985ء وچ جہڑے سیاستداناں دے کول کجھ نہیں سی اج اوہناں دے کول دولت دے ڈھیر لگے ہوئے نیں۔ ایس جمہوری سفر وچ معاشرہ بہتری دی تھاں ابتری ول گیا۔ معاشرہ جرائم دی آماجگاہ بن گیا۔ اج نہ رشتیاں دا احترام اے نہ ای اخلاقیات دا خیال۔ لوک حرام رزق ول نسی جا رہے نیں لوک یوم حساب بھل کے فکرمندی توں آزاد ہو گئے نیں۔ ایہدے وچ ماواں دا قصور تے ہے ای اے پر تن طبقے وڈے قصوروار نیں استاد‘ مذہبی رہنما تے سیاستدان۔ سب توں وڈا جرم سیاستداناں دا اے جہناں نے استاداں دا احترام ختم کران وچ بڑا کردار ادا کیتا اے ساڈے پیارے سیاستداناں نے ای مذہبی تے دوجے طبقات دا رخ دولت ول موڑیا کہدا کہدا تذکرہ کیتا جاوے۔
سیاستدان ذاتی مفادات دے حصول وچ اپنیاں آکھیاں گلاں توں مُکر جاندے نیں۔ اپنیاں گلاں بدلدے نیں‘ نظریات چھڈ جاندے نیں۔ صبح و شام اوہناں دے جھوٹ سن کے معاشرہ تھک گیا اے پر ایہ فیر وی جھوٹ بولدے جا رہے نیں۔ جھوٹ کسے اک پاسے توں نہیں‘ سارے پاسیاں توں بولیا جا رہیا اے۔ جے ایہ سچے تے مخلص ہوندے تے ملک دا ایہ حال ہوندا؟ اج ملک دے وکھووکھ شہراں وچ اسلحے دے زور تے ڈکیتیاں ہو رہیاں نیں قبضے ہو رہے نیں۔ یاد رہوے کہ ایہ اسلحہ سیاستداناں نے ای ونڈیا۔ ایہو لوک معاشرے دے بندیاں نوں اسلحہ لائسنس بنا کے دیندے رہے‘ ہر ایم این اے تے ایم پی اے لئی اسلحہ لائسنس دا کوٹہ بن دا رہیا۔ ودھدی قتل و غارت ایسے سلسلے پاروں اے پر سیاستدان فیر وی سچ نہیں بول رہے۔ پاکستان وچ سیاسی جماعتاں وچ جمہوریت نہیں‘ خاندانی اجارہ داریاں نیں‘ خانداناں دے پارٹیاں تے قبضے نیں۔ پارٹیاں دے لیڈر جھوٹ بولدے نیں‘ ایہناں پارٹیاں دے باقی رہنما ایس جھوٹ تے قوالی کردے نیں۔ ایہناں نوں کوئی خوف خدا نہیں ایہ سویرے شام اپنے لیڈراں نوں راضی کرن دے چکر وچ جھوٹ بول کے حیاتی گزار رہے نیں۔ اک دوجے نوں نیواں وکھان لئی عجیب و غریب حربے استعمال کردے نیں ایس پینتی سالہ جمہوری سفر وچ سوائے بربادیاں دے کجھ نظرنہیں آیا۔ معیشت توں لے کے سماجی وگاڑ تک مسافت ایسے دوران ہوئی۔ زراعت توں لے کے اخلاقیات دی تباہی تک دا سفر وی ایس عہد وچ ہویا پر سیاستداناں نوں اج وی جھوٹ بولدے ہوئے شرمندگی نہیں ہو رہی۔
کوئی عمران خان نوں خوش کرن دے چکر وچ لگا ہویا اے تے کوئی نوازشریف نوں خوش کرنا چاہندا اے۔ کوئی آصف علی زرداری دی آشیرباد لینا چاہندا اے تے کوئی مولانا دی نگاہ کرم دا منتظر اے۔ تہانوں جے سیاستداناں دے جھوٹ تے کوئی شک اے تے ایہدے لئی ڈھیر مثالاں دتیاں جا سکدیاں نیں۔ کجھ دیہاڑ پہلاں دا قصہ سن لوو۔ اسلام آباد وچ اک نوجوان نوں پوگیس نے گولیاں نال بھن دتا اے حکومت والے کہندے نیں کہ انصاف ہووے گا فلاں نے ایکشن لے لیا‘ ذمے داراں نوں کٹہرے وچ لیاواں گے‘ حکومتی لوک ایہ دسن توں قاصر نیں کہ اوہناں نے سانحہ ساہیوال دا کیہ کیتا؟ پی ڈی ایم دے رہنما اسلام آباد والے نوجوان دا ذکر کردے نیں پر سانحہ ماڈل ٹائون دا تذکرہ نہیں کردے۔ تہانوں یاد ہووے گا کہ سانحہ ماڈل ٹائون دے ذمے واراں نوں ترقیاں دتیاں گئیاں سن اوہناں دی دیکھ بھال کیتی گئی سی پر کیوں جے سیاستدان جھوٹ بولدے نیں اوہ جھوٹ بولدے رہن گے۔ تہانوں ساریاں نوں قصور دی معصوم بچی زینب تے یاد اے ناں‘ اوتھے میرے کالج دے دیہاڑیاں دے دوست ملک احمد خان وی اپنے لیڈراں دا دفاع کردے نظر آئوندے نیں‘ اپنی دھرتی دی بچی بھل جاندے نیں۔ جس دن ایہ واقعہ ہویا سی اوس دن قصور توں منتخب ہون والے لیگی اراکین نے استعفے دتے سن؟ جس دن ماڈل ٹائون وچ درود سلام پڑھن والیاں تے گولیاں برسائیاں گئیاں سن کیہ اوس دن کسے لیگی رکن دی غیرت جاگی سی؟ کسے نے استعفیٰ دتا سی؟۔
خواتین و حضرات! جعلی پارلیمنٹ دا قصہ وی سن لوو۔ ایس جعلی پارلیمنٹ دے ذریعے مولانا فضل الرحمن صدر پاکستان بننا چاہندے سن ایس جعلی پارلیمنٹ وچ شہبازشریف اپوزیشن لیڈر نیں اک جعلی صوبائی اسمبلی وچ مولانا دے بھائی قائد حزب اختلاف نیں تے اک دوجی جعلی صوبائی اسمبلی وچ شہبازشریف دے صاحبزادے اپوزیشن لیڈر نیں۔ جعلی الیکشن دے طفیل جتھے پی ٹی آئی دی حکومت بنی اوتھے سندھ وچ پیپلزپارٹی دی حکومت بن گئی۔ ہاں یاد آیا کہ اک جعلی اسمبلی وچ مولانا دے صاحبزادے وی رکن نیں جے ایہ سب کجھ جعلی اے تے فیر سیاستدان استعفے کیوں نہیں دے دیندے؟ تریہہ ورھے پہلاں ڈاکٹر امبر شہزادے نے کہیا سی لیڈر بے ضمیر‘ عوام بے وقوف‘ ایہو سچ اے بقول سید عارف
تو قد و قامت سے شخصیت کا اندازہ نہ کر
جتنے اونچے پیڑ تھے اتنا گھنا سایہ نہ تھا
(بشکریہ روزنامہ جنگ)