‘‘ پاسکو کرپشن تے حکومت پاکستان’’

تحریر: اکرم عامر سرگودھا

جد واڑھ واہی نوں کھاندی اے
اوتھے کھیتی مول نہ راہندی اے
جدوں ملک معرض وجود وچ آیا اے۔ ایس ویلے توں ہر آن والا حکمران کرپشن دی لعنت ختم کرن دا نعرہ لاندا رہیا اے۔ پر کوئی وی حکومت ایس گھنائونے فعل نوں روکن وچ کامیاب نہیں ہو سکی، پی ٹی آئی دے کپتان عمران خان نے وی وزارت عظمیٰ دا عہدہ سنبھالدے ای نعرہ مستانہ بلند کیتا سی کہ اوہ کرپشن دے ناسور نوں جڑ توں کڈ دین گے، موصوف نے انج دے عناصر توں آہنی ہتھاں توں نمبڑن دا اعلان کیتا سی، ہن کپتان دی حکومت نوں اڑھائی سال لنگھن نوں نیں پر کرپشن دا ناسور گھٹ ہون دی بجائے ودھدا نظر آ رہیا اے۔ سیاستدان، جاگیردار ، وڈیرے محکمہ جات دے افسران و ملازمین، صنعتکار، تاجر، کاشتکار حتیٰ کہ انج لگ رہیا اے کہ قوم دی اکثریت ایس ملک نوں دونواں ہتھاں توں لٹ رہی اے۔ہر کرپشن کرن والے دا طریقہ واردات منفرد اے، کوئی سرکاری زمیناں خورد برد کر کے کرپشن دا مرتکب ہو رہیا اے، تے کوئی رشوت لے کے، کوئی بینکاں توں قرضہ لے کے ہڑپ کر رہیا اے تے کوئی سرکاری بجٹ خورد برد کر کے وگدی گنگا وچ ہتھ دھو رہیا اے۔ایس طرح ملک وچ ہر پاسے کرپشن دا راج اے۔ ملک وچ کرپشن دی روک تھام لئی کم کرن والے وفاقی تے صوبائی سطح دے ادارے وی ایس دی روک تھام وچ ناکام وکھائی دے رہے نیں، ایس طرح کرپشن ملک وچ دہشت گردی توں زیادہ خطرناک صورت اختیار کر گئی اے جیہڑی وطن عزیز نوں دیمک وانگوں چٹ رہی اے۔ آئے دن ملک وچ کرپشن دے نویں نویں طریقے تے سکینڈل منظر عام اُتے آ رہے نیں جنہاں نوں سن کے عام بندا ورتہ حیرت وچ مبتلا ہو جاندا اے۔ راقم زیر نظر تحریر وچ کرپشن دی اک نکی جہی کہانی بیان کر رہیا اے۔
کنہے افسوس دی گل اے کہ پاکستان گندم پیدا کرن والا دنیا دا اٹھواں وڈا ملک کرپشن دی لعنت پاروں باہر دے ملکاں توں گندم خریدن اُتے مجبور ہو گیا اے پر انج دے حالات پیدا کرن والے کرپٹ مافیا نوں نکیل نہ پائی جا سکی، جنہاں نے کرپشن دے ریکارڈ توڑ کے قومی خزانے نوں نقصان اپڑایا تے ایس دی نکی جہی مثال کجھ انج اے زونل ہیڈ پاسکو ساہیوال نے مبینہ کرپشن دی انتہا کر دتی، تحصیل پاکپتن وچ 2020 وچ پاسکو گندم خریداری دے 10 مراکز قائم کیتے گئے جنہاں نوں سرکاری سطح اُتے 9 لکھ بوری گندم خریدن دا ٹارگٹ دتا گیا۔ ذرائع دے مطابق زونل ہیڈ پاسکو ساہیوال فی بوری 8 روپئے وادھو کٹوٹی کردا رہیاایس طرح موصوف نے 9 لکھ بوری گندم خرید کے 72 لکھ روپئے خرد برد کیتے۔ جد کہ موصوف نے لیبر ٹھیکیداراں توں فی سنٹر تقریباً 30 ہزار روپئے وصول کر کے لیبر دا ٹھیکہ دتا ایس طرح 19 مراکز توں 5 لکھ 70 ہزار روپئے رشوت لئی۔ اینی وڈی کرپشن توں وی من نہ بھریاتے موصوف پاسکو ہیڈ جبران نے گندم ویچن والی مختلف پارٹیاں توں بھاری رقماں لے کے ایہناں نال ساز باز کر کے ناقص کوالٹی دی گندم تے وزن ودھان لئی مٹی تے پانی دا استعمال وی کرایا جس دے ساہمنے ماتحت اہلکار تے لیبر ٹھیکیدار بے بس ہو کے رہ گئے ٹھیکیداراں دا ٹھیکہ منسوخ کر کے نویں ٹھیکیدار لیان دی دھمکیاں تے پاسکو اہلکاراں نوں نوکری توں کڈن یا تبادلے دے ڈر نے خاموش تماشائی بنائے رکھیا ایس دے علاوہ زونل ہیڈ پاسکو ساہیوال نے ہر پاسکو سینٹر توں 50 توں 60 بوری گندم اپنے ناوٹ دے ذریعے مقامی فلور ملز نوں فروخت کر دتی مبینہ کرپٹ زونل ہیڈ نے اسسٹنٹ پرچیز انسپکٹر خالد گجر تے عمران چوکیدر نال مل کے مختلف پاسکو سینٹرز توں چکی گئیاں 395 بوری گندم جس دا وزن 987.5 من اے۔ 2172500 روپئے بن دی اے آڑھتی اللہ بخش تے فلور مل مالک علی شیر نوں فروخت کیتی۔ ایس دے علاوہ گندم خریداری تے سٹاک دے ویلے توڑی تے مارکیٹ کمیٹی دی رقماں وی کرپشن دی نذر ہو گئیاں۔ ایس ساری کرپشن اُتے ذرائع دے مطابق زونل ہیڈ نے صرف پاسکو سینٹرز توں چکی جان والی 395بوری گندم دی ذمہ داری ایس طرح قبول کیتی اے کہ نہر دا بند ٹُٹن نال زیر آب آن والا پاسکو سینٹر گرودتہ اُتے ہون والا نقصان پورا کرن لئی گندم اکٹھی کیتی گئی جد کہ گرودتہ سینٹر دے انچارج دے مطابق ایس نے اک بوری وی گندم وصول نہیں کیتی۔ اونج وی جدوں ایہہ واقعہ رونما ہویا تے ڈپٹی کمشنر پاکپتن احمد کمال مان دی زیر نگرانی ضلعی انتظامیہ دی مدد نال بھاری مشینری دے نال فوری طور اُتے قابو پا لیا گیا سی جس اُتے صورت حال دا جائزہ لین لئی جنرل مینجر فیلڈ پاسکو میجر ریٹائرڈ مظاہر اقبال نے دورہ کیتا تے تمام سٹاک محفوظ پا کے اہلکاراں نوں شاباش دتی سی۔
کپتان جی ایہہ تے کرپشن دا ٹریلر اے فلم نہیں؟ کیوں جے وفاق پنجاب، بلوچستان، سندھ، کے پی کے، دے محکمہ جات پاسکو، ریلوے، سوئی گیس، محکمہ خوراک، لائیو سٹاک اینڈ ڈیرہ ڈویلپمنٹ، محکمہ بلڈنگ، ہائی وے حتیٰ کہ ملک دے ہر ادارہ وچ کرپشن دے انج دے لاتعداد سکینڈل نادیدہ قوتاں نے فائلاں وچ دبوا رکھے نیں جد کہ ملک وچ ارباں روپئے دی سرکاری اراضی اُتے قبضہ مافیا نے پنجے گاڑھ کے کرپشن کر رکھی اے۔ ایس بابت عدالت عظمیٰ دے احکامات نوں پس پشت پا کے ایہہ رقبے واگزار نہیں کرائے جا سکے۔ جد کہ سرمایہ داراں نے بینکاں توں قرضہ دی مد وچ لئے ارباں روپئے دبا رکھے نیں جس دا ، داء لگے اوہ ملک نوں بے دردی نال لُٹ کے کھوکھلا کر رہیا اے ملک وچ کرپشن دی روک تھام کرن والے اداریاں دا وجود مبہم نظر آ رہیا اے یا فیر اوہ وی اپنا حصہ بقدر جسہ لے کے اکھاں اُتے پٹی بنھے ہوئے نیں۔ پکڑ دھکڑ تے صرف نکے کرپٹ عناصر دی ہو رہی اے۔
کپتان جی تسیں برسر اقتدار آ کے پہلی تقریر وچ کہیا سی کہ کرپشن دے خاتمے بغیر ملک ترقی نہیں کر سکدا تے ایہہ وی کہیا سی کہ میری پہلی ترجیح کرپشن وچ ملوث کرپٹ عناصر نوں جیلاں وچ پانا ہوئے گا۔ پر کپتان جی انج تے ہو رہیا اے پر آٹے وچ لون دے برابر، پاکپتن کرپشن سکینڈل جہے کئی کیس ملک دا نظام چلان والے اداریاں وچ موجود نیں۔ چیک اینڈ بیلنس دا فقدان ہون پاروں کرپشن دے وڈے وڈے بادشاہ ہن وی اپنی سیٹاں اُتے براجمان ہو کے ملک نوں دونواں ہتھاں نال لٹ کے کھوکھلا کرن وچ مصروف نیں، لوڑ ایس امر دی اے کہ انج دے عناصر نوں قانون دی گرفت وچ لیان لئی واضح لائحہ عمل ترتیب دتا جائے کرپٹ عناصر دی فائلاں نوں دفاتر دی الماریاں توں نکلوا کے ایس اُتے جمی ، مٹی صاف کر کے انکوائریاں کرا کے کرپشن وچ ملوث عناصر نوں قانون دی گرفت وچ لیایا جائے نہیں تے کرپشن دے خاتمے دا تہاڈا نعرہ وی دیوانے دا خواب ثابت ہوئے گا تے جدوں تاریخ لکھی جائے گی تے تہاڈا ناں وی ماضی دے سیاستداناں وچ شمار ہوئے گا جیہڑے نعرے تے لاندے رہے پر ملک توں کرپشن دا خاتمہ نہ کر سکے۔