آئین دے ہوندے ہوئے ملک بند گلی وچ

اپوزیشن دا ایجنڈہ نواز شریف تے شہباز شریف نیں

لكهت:اسد اللہ غالب

گوجرانوالہ دے جلسے وچ نواز شریف دی تقریر دے بعد جیہڑا کھلواڑ شروع ہویا اے میں ہجے تیکر جان بوجھ کے ایس اُتے قلم نہیں چکیا، پر ہن پانی سر توں لنگھ گیا اے کیوں جے ریاست نوں چلان والا آئین بے بس نظر آندا اے، ریاست پاکستان دی قسمت نال کھلواڑ ایسے دن شروع ہو گیا سی جدوں میاں نواز شریف دے خون دی رپورٹاں جعلی بنائیاں گئیاں تے ایہناں دی بنیاد اُتے میاں نواز شریف اک وار فیر جیلاں دیاں سلاخاں توڑ کے بیرون ملک بحفاظت جان وچ کامیاب ہو گئے، ایہو کجھ مشرف دور وچ ہویا سی، ایس ویلے وی ریاست پاکستان نوں گھٹنے ٹیکن اُتے مجبور کیتا گیا۔
ریاست پاکستان توں ودھ کے طاقت ور کون اے، ایس دا اندازہ ہر کسے نوں اے۔ میں کدی انکشافاتی صحافت نہیں کیتی، جو کجھ ہوندااے یا ہوئے گا، اپنی بساط دی حد تیکر ایسے دا تجزیہ کرنا واں۔ پاکستان ایٹمی طاقت ضرور اے پر سیاسی تے معاشی حیثیت دے طور اُتے بے حد نحیف و نزار، ظاہر اے جیہڑی طاقتاں خزانیاں دی مالک نیں اوہ پاکستان دے بازو مروڑدی نیں، میاں نواز شریف دی گوجرانوالہ دی تقریر کیوں نشر ہوئی ایس دا وی جواب تلاش کرنا مشکل نہیں پر سوال ایہہ وے کہ ریاست پاکستان نوں ڈھیر کر کے کسے نوں کیہ ملے گا۔ کیہ اسرائیل ایہناں ملکاں دا دفاع کر سکدا اے جیہڑی پاکستان نوں کمزور کرن اُتے تلی ہوئیاں نیں۔ ایس سوال دا جواب اے بالکل نہیں۔ تے ایہو گل بیرونی ایجنڈے اُتے کم کرن والی ساڈی سیاسی جماعتاں نوں سوچنی چاہیدی اے۔ دنیا دے ہر ملک وچ حکومت تے اپوزیشن وچ ٹھنی رہندی اے امریکہ وچ وی نویں تےپرانے صدر دے حامیاں وچ جنگ دا منظر پیدا ہو گیا اے پر پاکستان دی اپوزیشن چاہندی اے کہ اوہ ریاست توں کجھ ایٹم بم چھینن وچ کامیاب ہو جائے تے پاکستان دے سر اُتےدے مارے۔ ایہہ سراسر خود کشی دا راہ اے۔
ہر ریاست دے کجھ بنیادی ستون ہوندے نیں جیہڑے مل جل کے ریاست نوں قائم وی رکھدے نیں تے ایہنوں ترقی دی راہ اُتے گامزن وی رکھدے نیں۔ انتہائی تعجب دی گل اے کہ ساڈی اپوزیشن نے پاکستان دی بنیاداں نوں لرزا دتا اے۔ عدلیہ انصاف مہیا کرن دا اک سہارا اے۔ بدقسمتی ایہہ وے کہ اسیں پہلا وار ای عدلیہ اُتے کیتا تے ایہنوں متنازعہ بنا دتا۔ عدلیہ کسے دے حق وچ فیصلہ کرے تے زندہ باد تے نہ کرے تے ایس اُتے لعن طعن۔ نیب اُتے سوالیہ نشان چکے جا رہے نیں، ایسے نیب نوں ن لیگ تے پی پی پی نے اک دوجے دے خلاف استعمال کیتا۔ پارلیمان ریاست دی پہلی تے آخری امید ہوندی اے پر ساڈی اپوزیشن نے پارلیمان دی عزت مٹی وچ ملا دتی، پاکستان دی نویں نسل نے پارلیمان دا کوئی انج دا اجلاس نہیں ویکھیا، جس وچ اپوزیشن دھینگا مشتی اُتے نہ اتر آئے۔ ہن تے نوبت ایہہ آ گئی اے کہ پارلیمان دا اجلاس بلانا ای ناممکن ہو گیا اے تے اپوزیشن سارے فیصلے سڑکاں، چوکاں تے گلیاں وچ کرنا چاہندی اے، اپوزیشن نے عدلیہ نوں وی متنازعہ بنا دتا تے پارلیمان نوں عضو معطل بنا کے قانون سازی دے سارے رستے بند کر دتے نیں۔
ملک وچ انتشار تے عدم استحکام پیدا کرنا بھارت دی پہلی تے آخری کوشش اے پر اوہ اپنے کل بھوشناںتے ابھی نند نوں دی فوج ظفر موج دے بل بوتے اُتے آپ تے اپنے ایس گھنائونے مشن وچ کامیاب نہیں ہو سکیا پر ایہنوں ہن کارندے میسر آ گئے نیں جیہڑا سیاسی انتشار نوں وی ہوا دے رہے نیں، حکومت استحکام لئی وی خطرہ نیں تے معاشی اقدامات دے رستے وچ روڑے اٹکا رہے نیں۔ اپوزیشن نے شہر شہر تے قصبے قصبے، جلسیاں، جلوسیاں تے ریلیاں دی مدد نال عوام توں آزادانہ نقل و حرکت دا اوہ حق وی کھوہ لیا اے جس دا ضمانت آئین فراہم کردا اے۔ سب توں وڈا ظلم ایہہ وے کہ اپوزیشن دی بے ہنگام غوغا آرائی دی آڑ وچ مافیاز نے سر چک لیا اے تے اوہناں نے عوام دے منہ توں روٹی دا نوالہ وی کھوہ لیا اے۔ چینی، چائے، آلو، ددھ ، دوا ہر شے دے ریٹ اسمان تیکر اپڑا دتے نیں۔ اپوزیشن عوام دے دکھاں اُتے شیطانی قہقہے لا رہی اے تے الٹا ایس دا نعرہ ایہہ وے کہ ایس نے حکومت نوں ناکام بنا دتا اے۔ ساڈی اپوزیشن ہمیشہ حکومتاں نوں ناکام بنان وچ کامیاب رہی اے ، نواز شریف تے بے نظیر نے اک دوجے دی حکومتاں ڈیگیاں، زرداری تے نواز شریف نے اک دوجے نوں پٹخن دی کوشش کیتی، ستم ظریفی ایہہ وے کہ ایہہ اوہ ای دو جماعتاں نیں جنہاں نے میثاق جمہوریت اُتے دستخط کر رکھے نیں، ساڈی اپوزیشن دی جمہوریت اصل وچ خاندانی بادشاہت دا ناں اے، مفتی محمود دے بعد ایس دا پتر فضل الرحمن، زرداری دی تھاں ایس دا پتر بلاول تے نواز شریف دی تھاں مریم نواز نے لے لئی اے ۔ جے ایہو جمہوریت اے تے بادشاہت تے موروثی آمریت کس چڑیا دا ناں اے۔
فیر اوہ ای نواز شریف دی گوجرانوالہ دی تقریر جس نے اپوزیشن دے ہر لیڈر دی زبان نوں دراز کر دتا، اپوزیشن دے جلسیاں وچ جیہڑے نعرے لگدے نیں، ایہناں نوں احاطہ تحریر وچ لیانا ممکن نہیں، میں سدھے تے کھرے لفظاں وچ ایہہ کہنا چاہنا واں کہ اپوزیشن ہن ریاست دے آخری ستون نال ٹکرانا چاہندی اے۔ کاش ساڈا میڈیا ذمہ دارانہ کردار ادا کردا تے اپوزیشن دا الو سدھا کرن وچ مدد گار ثابت نہ ہوندا۔ اپوزیشن دا ایجنڈہ نواز شریف تے شہباز شریف نے ایس ویلے طے کر دتا سی جدوں ترکی وچ اک فوجی بغاوت نوں ناکام کر دتا گیا سی۔ نواز تے شہباز دونواں ے یک زبان ہو کے کہیا سی کہ پاکستان وچ وی عوام دی طاقت دے بل بوتے اُتے جمہوریت نوں سربلند رکھیا جائے گا۔ عوام دی ایہہ طاقت اسلام آباد دا رخ کرن نوں اے تے فیر پنڈی ول مارچ کرن دی کھلے عام گلاں ہو رہیاں نیں۔ پنڈی ریاست پاکستان دے آخری ستون دی علامت اے۔ ویکھیا جائے تے اپوزیشن نے ریاست دا ہر ستون منہدم کر دتا اے تے خدا ای جان دا اے کہ ریاست نوں بچان لئی ہن کیہ امید باقی رہ گئی اے ایہہ اے اوہ انھی تے تاریک گلی جس وچ پاکستان بڑی طرح پھس چکیا اے۔