خیر نال آتے خیر نال جا

لكهت: سعد الله شاه

خواب ہو گا یا کوئی خواب کے جیسا ہوگا
ہم نے دیکھا تھا جسے آنکھ کا دھوکہ ہو گا
اتنا لکھوں گا ترے بعد ترے بارے میں
آنے والوں نے تجھے پہلے ہی دیکھا ہوگا
خواب‘ سراب‘ شباب‘ حباب تے سماب سارے اکو طرح دے ہوندے نیں۔ اکھ دا دھوکھا یاں فریب نظر۔ جہنوں تسیں سب توں ودھ ایماندار سمجھدے او اکثر اوقات اوہناں دی ایماندری تہانوں لے ڈُبدی اے۔ نالائقی تے نااہلی سب کجھ ای بلڈوز کر دیندی اے۔ میں کوئی مافوق الفطرت گل نہیں کر ریہا۔ ایہو زمینی حقائق نیں‘ اوہو زمین جہدے تے دوپائے تے چارپائے چلدے نیں تے اکثر اوقات ایہناں وچ پچھان ختم ہو جاندی اے۔ تسیں یقین کرو ہر پاسے دھند اے۔ گلاں دی دھند خیالات دی دھند الزامات دی دھند تے حالات دی دھند توں اگے کجھ نظر نہیں آئوندا سگوں اپنی نک تک ایہدے وچ کسے نوں نظر نہیں آئوندی:
اک بات کا رونا ہو تو رو کر صبر آئے
ہر بات پہ رونے کو کہاں سے جگر آئے
کنے ای حادثے سرشام ہو گئے اخباراں دیاں پیشانیاں کالیاں نظر آئوندیاں نیں کہ ایہناں تے خبراں ای انج دیاں نیں کہ ہر خبر تے دم نکلدا اے۔ ملائیشیا وچ پی آئی اے دا جہاز ضبط یااللہ خیر۔ سویرے سویرے ایہ کیسی کالے رنگ دی سرخی‘ پتہ لگدا اے کہ بوئنگ 777 جہاز ویت نام دی کمپنی توں 2015ء وچ لیز تے لیا سی۔ واجبات نہیں سن دتے۔ مسافر وچارے رُل گئے تے وطن دی کڈی بدنامی ہوئی۔ اسیں ایہ دن وی ویکھنا سی ایہ ساڈے نال کیہ ہو رہیا اے نجیب احمد نے ایہو تے کہیا اے:
ہم اتنے بھی گئے گزرے نہیں ہیں
ہمارے ساتھ یہ کیا ہو رہا ہے
ریکوڈک دا کیس وی اسیں ہار گئے۔ اسیں تے بس بدقسمت آں کہ اسیں بے بہا پیسے لائے تے ساڈے ہتھ سمندر چوں وی کجھ نہ آیا۔ تیل ندارد۔ چنیوٹ توں وی ارباں روپیے دیاں دھاتاں نکلیاں سن سب خواب تے سراب۔ حکومت نے پٹرول حملہ دو واری کیتا اے اسیں واری فیر سوا تن روپیے فی لٹر پٹرول مہنگا کر دتا اے۔ بجلی دے شاکس اوہ لوکاں نوں پہلے ای لا چکے نیں۔ فیر ڈرامہ کردے نیں کہ اوگرا والے تے 13روپیے ودھا رہے سن۔ خان صاحب نے دس روپیے دی رعایت کر دتی۔ خوشیاں منائو تے عیش کرو۔ کوئی منے یاں نہ منے ایہ سب کجھ کسے ایجنڈے دے تحت ہو رہیا اے کہ ملک نوں اپاہج کر دتا جاوے۔ صحت تے تعلیم دے ادارے پہلے ای برباد کر دتے گئے نیں۔ ساڈی نویں نسل تباہ ہو رہی اے۔ ایہ ہولی ہولی سکول کھولن دی گل مضحکہ خیز۔ ایہ ہولی ہولی بربادی دی گل اے۔ بچیاں دا ٹیمپو ٹُٹ چکیا اے۔ باقی سب کم جاری نیں صرف تعلیمی ادارے آخر کیوں بند کر رکھے نیں۔ تسیں سازش نوں سمجھن دی کوشش کرو:
سعد لہجے میں جو تلخی ہے کسی رنج سے ہے
مجھ کو آتا نہیں جگنو کو ستارا لکھنا
تسیں فارن فنڈنگ کیس نوں ای ویکھ لوو کہ پی ٹی آئی لئی ایہ کیس کمبل بن گیا اے۔ اکبر اویس بابر دی آواز جہڑی صدا بصحرا لگدی سی ہر تھاں سنائی دین لگ پئی اے تے اوہ کیوں جے پی ٹی آئی دے فائونڈر ممبر ای نہیں خان صاحب دے دست راست سن اوہ پورے اعتماد دے نال چھ ورھے توں کیس لے کے چل رہے نیں۔ اوہناں دا مطالبہ اپوزیشن نے وی پھڑ لیا اے۔ فارن فنڈنگ کیس پی ٹی آئی دیاں ساریاں وضاحتاں دے باوجود اپنے پورے مضمرات دے نال سامنے آ چکیا اے۔ تسیں مولانا فضل الرحمن دی گل نوں اجے چھڈ دیو کہ فنڈنگ کرن والیاں وچ اسرائیل تے بھارت وی نیں پر کوئی فنڈنگ سامنے آنا ضروری اے:
غیر پھرتا ہے لیے یوں ترے خط کو کہ اگر
کوئی پوچھے کہ یہ کیا ہے تو چھپائے نہ بنے
چنگے لوک تہانوں چھڈ گئے یاں تسیں چنگے لوکاں نوں نظرانداز کیتا۔ ہن اک واری فیر لوک تہانوں چھڈ رہے نیں۔ ندیم افضل چن دا استعفیٰ جو تساں قبول کیتا اے ایہدا پس منظر ساریاں دے سامنے کہ تسیں خرابی بسیار دے بعد ای اوہو آکھو گے جو ندیم افضل چن کہہ رہے سن اوہ تے کامیاب ہوئے پر:
اسی باعث تو قتل عاشقاں سے منع کرتے تھے
اکیلے پھر رہے ہو یوسف بے کارواں ہو کر
کیہ خان صاحب دے پسندیدہ طارق جمیل دی ایہ گل سمجھ وچ نہیں آئوندی کہ جدوں اللہ رنج ہوندا اے تے حکومت بے وقوف لوکاں نوں دے دیندا اے کیسیاں کیسیاں بوعجیبیاں سامنے آئوندیاں نیں لوک وی بڑے ستم ظریف نیں سب کجھ سمجھدے تے جان دے نیں۔ ٹریجڈی توں وی مزاح کڈھ لیندے نیں تے لطف اٹھاندے نیں۔ وزیراں تے مشیراں دے مذاق مزا دیندے نیں۔ ایس مکدر تے بے کلی دے عالم وچ وی سوشل میڈیا تے کوئی پوسٹ گد گدی کر جاندی اے۔ کسے نے لکھیا اے کہ ہن جہاز تے ایہ لکھن دا فیصلہ ہویا اے کہ خیر نال آ تے خیر نال جا۔ میرا خیال اے کہ ہن کجھ ہور لکھن دی لوڑ نہیں۔ فیر لکھنا وی تے بیکار ای اے۔ سارے لوک کہندے نیں تے خوب لکھدے نیں۔ پڑھن والے پڑھدے نیں تے روز پڑھدے نیں۔ جہڑے لوکاں نوں پڑھنا چاہیدا اے اوہ نہیں پڑھدے کیوں جے اوہ سانوں پڑھاندے نیں۔ اوہ تے سارا دن بہت کجھ سن دے نیں تے رات نوں اپنے بارے بہت کجھ ویکھدے وی نیں شاید اوہ ایس سب کجھ دے عادی ہو چکے نیں۔ اصل وچ اوہناں دا انحصار ای اجہی زندگی اُتے اے جہدے وچ سدھا راہ ای نہیں۔ سب اوہو نیں جہناں نے ثابت کیتا کہ:
جو بھٹکتا ہے وہی راہ بنا جاتا ہے
ورنہ بستی میں کہاں سیدھا چلا جاتا ہے
کیہ کریئے دھند ہور زیادہ ودھدی جا رہی اے۔ موسم کجھ اگے چلے گئے نیں انج لگدا اے کہ جیویں دسمبر جنوری وچ آ چکیا اے۔ ہر چیز اگے ول جا رہی اے۔ قدرت نوں ایس تغیر دا پتہ اے اسیں کیہ کر سکنے آں واقعی اسیں کیہ کر سکنے آں؟۔٭

اپنا تبصرہ گھلو