اِک لُکے چھپے ادارے دا ناں سنیا اے تسیں

امرجلیل

جے تسیں پاکستانی او‘ محب وطن او تے فیر تساں زیب دا ناں ضرور سنیا ہووے گا۔ جے تساں نیب دا ناں نہیں سنیا تے فیر تسیں پاکستانی نہیں۔ محب وطن پاکستانی ہون لئی ضروری اے کہ تسیں نیب دا ناں سنیا ہووے۔عام طور تے پاکستان وچ حکومتاں چلدیاں نہیں‘ چلائیاں جاندیاں نیں۔ حکومتاں چلان لئی خفیہ ادارے بنائے جاندے نیں جو کھٹارا گڈی نوں دھکا سٹارٹ کردے رہندے نیں۔ خفیہ اداریاں وچ تہاڈے وانگوں تے تہاڈے بچیاں وانگوں‘ میرے وانگوں تے میرے بچیاں وانگوں بخشے ہوئے لوک کم کردے نیں۔ اسیں پٹرول نال چلن والی گڈی وچ ڈیزل پا دینے آں۔ ڈیزل نال چلن والی گڈی وچ کاسلیٹ یعنی مٹی دا تیل پا دینے آں۔ اسیں آں اللہ سائیں دی بخشی ہوئی مخلوق‘ اسیں پاکستانی حکومتاں دے ہر ادارے وچ کم کرنے آں۔ کھٹارا گڈی نوں دھکا سٹارٹ رکھن لئی پاکستانی حکومتاں خفیہ ادارے بناندیاں رہندیاں نیں۔ کجھ چر بعد حکومتاں آپ تے ا للہ حافظ ہو جاندیاں نیں تے اپنے پچھے اپنے بنائے ہوئے ادارے چھڈ جاندیاں نیں۔ ساڈی تریخ دے شروع دیہاڑیاں وچ حکومتاں نوں انگریز دا بنایا ہویا ادارہ سی آئی ڈی ورثے وچ ملیا سی۔
اک ہور خفیہ ادارہ وی ساڈیاں حکومتاں نوں ورثے وچ ملیا سی۔ ایس ادارے دا ناں سی اے سی ڈی‘ یعنی اینٹی کرپشن ڈیپارٹمنٹ۔ ایس ادارے دا کم سی دوجے اداریاں وچ وڈھی خوراں تے نظر رکھنا تے اوہناں نوں رشوت لیندے ہوئے رنگے ہتھیں پھڑنا۔ کجھ چر بعد آن والیاں حکومتاں نوں اک ہور خفیہ ادارہ بنانا پیا جس ا دارے دا کم سی اینٹی کرپشن ادارے وچ رشوت خور افسراں دا خاتمہ کرنا۔ ایس ادارے دا ناں اپنی قومی زبان وچ رکھیا گیا سی۔ ایس خفیہ ادارے دا ناں سی اینٹی کرپشن ادارہ دا زہر مہرہ یعنی تریاق۔ مینوں نہیں پتہ کہ اینٹی کرپشن ادارے دا تریاق ادارہ اج کل فعال اے یاں گولڈن ہینڈ شیک دے بعد بند کر دتا گیا اے۔ گولڈن ہینڈ شیک نے وی چنگیاں چنگیاں دے وارے نیارے کر دتے نیں۔ اک محب وطن پاکستانی ہون دے ناطے تسیں نیب دا ناں ضرور سنیا ہووے گا تے یاد وی رکھیا ہووے گا پر تسیں بین (BAN) دا ناں نہیں سنیا ہووے گا۔ بین دا کم اوہو اے جو نیب دا کم اے پر نوعیت وکھری اے۔ نیب دا کم اے آمدن توں ودھ اثاثے رکھن والیاں دی نیندر حرام کرنا۔ بین دا کم اے آمدن توں گھٹ‘ بدتر زندگی گزارن والیاں دی نیندر اڑانا۔ میں ایس ادارے وچ کم کر چکیا واں۔ تسیں سوچ رہے ہوو گے کہ میرے ورگے بونگے نوں ذہین لوکاں دے اک ادارے وچ ملازمت کیویں مل سکدی اے؟ میں ایس راز توں پردہ نہیں چک سکدا۔ پر ہاں میں تہانوں ایناں دس سکنا واں کہ بین ادارے وچ ملازمت توں مینوں کیوں کڈھیا گیا سی۔ گل کجھ ایس طرح اے کہ افسراعلیٰ نے مینوں سدیا تے آکھیا: مینوں پتہ لگا اے کہ جوزف اسٹریٹ دے اک نکے جہے مکان وچ اک بائی گریڈ دا ریٹائر افسر ماڑی حالت وچ رہندا اے۔ تسیں چھان بین کرکے مینوں دسو کہ اوہ بندہ پنشن وچ ملن والی چنگی بھلی رقم دا کیہ کردا اے؟ افسراعلیٰ نوں متاثر کرن لئی میں کہیا: سر ہو سکدا اے بائی گریڈ دا ریٹائرڈ افسر اپنی پنشن نال غریب طالب علماں دی فیس بھردا ہووے۔ کسے نادار دا علاج کرواندا ہووے کسے دے گھر راشن اپڑاندا ہووے۔
افسراعلیٰ دے تیور بدل گئے۔ کہیا جو تہانوں کہیا گیا اے اوہ کرو۔ پھنے خاں نہ بنو۔ ساڈے محکمے وچ آرڈر ملن دے بعد جواب وچ تسیں صرف یس سر کہہ سکدے او۔ ایس توں اگے تسیں اک لفظ منہ چوں نہیں کڈھ سکدے۔ ہن ایہ گل طے ہو چکی اے کہ آمدن توں ودھ اثاثے رکھن والا بندہ کریمنل ہوندا اے تے آمدن توں گھٹ اثاثے رکھن والا وی کریمنل ہوندا اے۔ ایس لحاظ نال میرے ادارے بین دے مطابق بائی گریڈ وچ ریٹائر ہون والا بندہ کریمنل سی کیوں جے اوہ اکلا ماڑی حیاتی گزار رہیا سی۔ کسے دے پچھے پین توں پہلاں ہن اسیں ہتھ نہیں دھوندے۔ کرونا دے ڈر توں بار بار ہتھ دھون دی وجہ نال ہن ساڈے ہتھ پیر ہر ویلے دھوتے رہندے نیں۔ ایس لئی جدوں چاہیے اسیں کسے دے وی پچھے پے سکنے آں۔ میں بائی گریڈ وچ ریٹائر ہون والے افسر دے پچھے پے گیا۔ وکھووکھ زاویاں توں میں کھوج لائی اوہدا ناں سی عبدالواحد۔ جدوں اوہ اٹھارویں گریڈ وچ سی اودوں اوہدی بیوی نے طلاق لے کے ویہویں گریڈ وچ کم کرن والے اک بندے نال ویاہ کھڑکا لیا تے اپنے دوویں پُتر عبدالواحد دے حوالے کر گئی سی۔ عبدالواحد نے دوہاں پُتراں دی پرورش کیتی۔ اوہناں نوں پڑھا لکھا کے وڈا کیتا۔ دوہاں نے لو میرج کیتی۔ دوہاں نے وکھرے وکھرے چنگے بھلے مکان خرید لئے۔ دوہاں بھراواں دے گھر وچ بڈھے باپ نوں رکھن لئی سرونٹ کوارٹر توں اڈ کوئی تھاں نہیں سی۔ دوہاں پُتراں دی ایس توں اڈ کوئی دلچسپی نہیں سی کہ ہر مہینے اوہ اپنے والد توں پنشن دی رقم وٹ لیندے سن۔ پُتراں کول سرونٹ کوارٹر وچ رہن دی تھاں عبدالواحد ڈیڑھ سو روپیے مہینہ کرائے تے اک کھولی وچ رہن لگ پیا۔ ایسے کھولے وچ میری پہلی تے آخری ملاقات عبدالواحد نال ہوئی سی۔ جدوں میں عبدالواحد توں پچھیا: تے ایہدا مطلب اے کہ تسیں اپنی پنشن دی رقم دہشت گرداں نوں نہیں دیندے۔ اوسے ویلے کسے نے لت مار کے بوہا کھول دتا۔ دو ہٹے کٹے خوش لباس بندے کھولی وچ داخل ہوئے۔ عبدالواحد نے ٹٹی ہوئی میز دے دراز چوں دو چیک کڈھ کے اوہناں نوں دتے۔ اک بندے نے کہیا: تہاڈی پنشن وچ دس فیصد وادھا کرن توں انکار کرکے عمران خان نے سینئر سٹیزنز تے بڑا ظلم کیتا اے۔ جدوں دوویں بندے ٹر گئے اودوں عبدالواحد نے آکھیا ایہہ دوویں دہشت گرد نہیں سن اوہ میرے پُتر سن۔٭٭