پِلاک ولوں ’’ کلیات امین خیال‘‘ دی تقریب رونمائی

امین خیال ہوراں اپنی شاعری تے نثرراہیں پنجابی زبان و ادب وچ انمول وادھا کیتا: مقررین

رپورٹ : علی قیصر شاہ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام ’’کلیات امین خیال‘‘ دی تقریب رونمائی ہوئی۔ جس وچ پنجابی زبان دے دانشوراں، ادیباں تے شعراء نے شرکت کیتی۔

امین خیال دی شخصیت تے فن اُتے اظہار خیال کرن والیاں وچ پروفیسر جمیل احمد پال، مدثر اقبال بٹ، پروفیسر اکرم سعید، ڈاکٹر پروفیسر رزاق شاہد، ڈاکٹر کنول فیروز، ڈاکٹر شاہدہ تارڑ، سلیم احمد سلیم، ڈاکٹر صائمہ بتول، پروفیسر خالد ہمایوں، کلیان سنگھ کلیان، محمد عاصم چودھری، ر ح رفاقت، افضل عاجز، بیرسٹر محمد عون شاہد، وسیم عالم تے ڈاکٹر صغرا صدف شامل سن۔ مقررین نے کہیا کہ امین خیال نہایت منکسر مزاج، حلیم الطبع ، خوش گفتار تے مہمان نواز سن جیہڑا وی اک وار ایہناں نال ملاقات کر لیندا ایہناں دا ہو کے رہ جاندا۔ اوہناں نے اپنی شاعری تے نثر دے ذریعے پنجابی زبان و ادب وچ انمول وادھا کیتا اے۔ ایہناں دی شاعری دے اندر صوفیانہ رنگ بوہت نمایاں اے۔ ڈاکٹر شاہدہ تارڑ نے امین خیال اُتے پی ایچ ڈی وی کر رکھی اے۔ اوہناں نے کہیا کہ ایہناں دے کلام دے اندر بوہت گہرائی اے۔ ایہناں دے پتر بیرسٹر محمد عون شاہد نے ایس گل دا اعادہ کیتا کہ اوہ ا پنے والد دے نقش قدم اُتے چلدے ہوئے ماں بولی دی خدمت نوں جاری رکھن گے۔ اوہناں نے امین خیال ٹرسٹ قائم کر دتا اے جس دے ذریعے پنجابی دی معیاری کتب دی اشاعت مفت کیتی جائے گی۔ عنقریب امین خیال دی ساری شاعری پی ڈی ایف دی صورت وچ انٹرنیٹ اُتے موجود ہوئے گی۔ تقریب وچ نظامت دے فرائض ممتاز ملک تے ر ح رفاقت نے سرانجام دتے۔