اسلم کمال ہوراں دی ورھے گنڈھ دی تقریب

تقریب وچ اوہناں دے سجناں بیلیاں اوہناں نوں تحفے پیش کیتے تے لَمّی حیاتی لئی دعاواں کیتیاں

رپورٹ: حافظ ممتاز ملک

پنجاب انسٹیٹیوٹ آف لینگویج آرٹ اینڈ کلچر، محکمہ اطلاعات وثقافت پنجاب دے زیر اہتمام اک پروقار تقریب وچ نامور مصور، خطاط، ادیب تے سفر نامہ نگار اسلم کمال صاحب دی سالگرہ دا کیک کٹیا گیا۔.

تقریب وچ ایہناں دے دوست احباب نے بھرپور شرکت کیتی، ایہناں لئی نیک تمنائواں دا اظہار کیتا تے ایہناں دی لمبی عمر دی دعا کیتی۔ پھُلاں دے تحفے پیش کیتے۔ تقریب دے شرکاء وچ سرور سکھیرا، حسین مجروح، جمیل بھٹی، خالد یزدانی، سید قطب، بیاجی، ڈاکٹر ابرار احمد، ممتاز راشد لاہوری، جاوید آفتاب، علی ہاشمی، قاری عیاض احمد، عقیل طاہر، محمد عاصم چودھری تے ڈاکٹر صغرا صدف ودیگر شامل سن۔ایہناں دے دوستاں دا کہنا سی کہ اسلم کمال ہوری ایہناں خوش قسمت لوکاں وچوں نیں جنہاں نوں ایہناں دی زندگی وچ پذیرائی ملی۔ اوہ بوہت ای باکمال شخصیت دے مالک نیں ایہناں نوں اللہ تعالیٰ نے گونا گوں خوبیاں نال نوازرکھیا اے۔ ایہناں نوں سب توں زیادہ کتاباں دے سرورق بنان دا اعزاز حاصل اے جیہڑا کہ 20 ہزار توں ودھ نیں۔ اوہ خط کمال دے موجد نیں۔ اوہناں نے علامہ اقبال تے فیض دی شاعری دی نویں انداز وچ مصوری دے ذریعے ترجمانی کیتی اے۔ جنہاں دا تعلق سیالکوٹ نال سی تے ایہہ حسن اتفاق اے کہ اسلم کمال صاحب دا تعلق وی سیالکوٹ نال ای اے۔ اوہناں نے 555 ادیباں دے پورٹریٹ وی بنائے، کئی ملکاں وچ ایہناں دی مصوری دی نمائش ہو چکی اے۔ حال ای وچ پلاک لئی پنجاب دے صوفی شعراء دا مشترکہ پورٹریٹ’’ پنجاب کا شاندار ماضی ‘‘ دے عنوان نال مکمل کیتا اے جس دی افتتاحی تقریب عنقریب منعقد کیتی جائے گی۔ اسلم کمال صاحب نوں صدارتی تمغہ برائے حسن کارکردگی، پنجاب یونیورسٹی ولوں گولڈ میڈل،پلاک ولوں پرائڈ آف پنجاب و دیگر انعامات نال نوازیا گیا اے۔