’’بلین ٹری منصوبہ تے ٹمبر مافیا‘‘

تحریر: اکرم عامر سرگودھا

قوم دی اکثریت ایس قدر بے حس ہو چکی اے کہ کسے وی فائدہ اپڑان والی شے دی حفاظت دی بجائے اپنی طمع نفسی دی خاطر ایہنوں ضائع یا چوری کر کے ملک لئی نقصان دا باعث بن رہی اے۔ ایہو وجہ اے کہ آزاد ہون دے 74 ورہے بعد وی پاکستان ترقی یافتہ ملکاں دی صف وچ شامل ہون دی بجائے ہن وی پسماندگی ول جا رہیا اے۔ حالانکہ پاکستان طرح طرح دی قدرتی نعمتاں نال مالا مال، خوبصورت ترین ملک اے، راقم سنے پوری قوم ایس دی ذمہ دار اے، چونکہ ملک وچ وسن والا کوئی وی شہری اپنی ذمہ داری پوری نہیں کر پا رہیا، ملک دی ترقی نہ کرن دی اک وجہ ایہہ وی اے کہ اسیں جرم نوں اپنے ساہمنے ہوندا ویکھ کے وی ایس دی روک تھام لئی نہ تے قانون دی مدد کرنے آں تے نہ ای آپ کوئی قدم چکنے آں۔ ایہو وجہ اے کہ ملک وچ طرح طرح دے جرائم سر چک رہے نیں تے ایس ملک نوں دیمک وانگوں چٹن والا طبقہ ایس دے اثاثے بے دردی نال لُٹ کے اپنا پیٹ تے تجوریاں بھر رہیا اے۔
ایہناں وی اثاثیاں وچ پورے ملک دے جنگلات، نہراں و سڑکاں دے کنارے، نکے وڈے شہراں دے چوراہواں، پارکاں، تفریح گاہواں وچ لگے درخت وی شامل نیں۔ جیہڑے لکھاں نہیں ارباں دی تعداد وچ ملک دے محکمہ جات جنہاں وچ جنگلات، محکمہ انہار تے دیگر سرکاری محکمے شامل نیں نے لائے نیں۔ ایہناں وچ پارکس اینڈ ہارٹیکلچر شہراں نوں خوبصورت بنا ن لئی پھُلاں دے نال سایہ دار درخت وی لاندا اے۔ جنگلات وچ لگے درختاں دی حفاظت محکمہ جنگلات تے نہر کنارے گو کہ درخت محکمہ جنگلات لاندا اے پر ایہناں دی حفاظت وچ معاونت محکمہ انہار کردا اے۔ وڈے شہراں دے اندرون حدود لگے درختاں دی آبیاری لئی پارکس اینڈ ہارٹیکلچر دے ملازم فرائض ادا کردے نیں۔ جیہڑے شہر نوں خوبصورت گرین رکھن دے نال لائے گئے پودیاں، درختاں دی حفاظت دے ذمہ دار ہوندے نیں۔
جنگلات، نہراں، سڑکاں دے کناریاں اُتے لائے گئے درخت جویں جویں جوان ہوندے نیں ایسے طرح ایہہ ملک وچ زرمبادلہ وچ وادھے دا باعث بنن دے نال انسانی صحت لئی سود مند ثابت ہوندے نیں پر بدقسمتی نال ملک وچ ایس اثاثہ نوں چوری کٹن دا عمل تیزی نال ودھدا جا رہیا اے۔ ملک دے مختلف شہراں دے اردگرد جنگلات پورے ملک دے طول و عرض وچ ودھدی شاہراہواں تے نہراں دے کناریاں اُتے نظر ماری جائے تے تہانوں تھاں تھاں کٹے درختاں دے ’’مڈ‘‘ نظر آن گے جنہاں دی لکڑی ٹمبر مافیا دے پیٹ دا ایندھن بن چکی ہوئے گی۔
ایسے طرح ملک دے ہزاراں ایکڑ اُتے لائے گئے سرکاری درختاں نوں بے دردی نال چوری کر کے نہ صرف قومی خزانہ نوں سالانہ ارباں روپئے دا نقصان اپڑایا جا رہیا اے بلکہ درخت چوری کر کے ساڈی آن والی نسلاں نوں تازہ ہوا وچ ساہ لین دی نعمت توں محروم کیتا جا رہیا اے۔ ایسے طرح ایہناں درختاں دا قتل عام انسانی قتل دے مترادف اے۔ نسیم سحر توں لے کے باد صبا تیکر پورے ملک دے مختلف شہراں دے جنگلات دے سائبان دی ٹھنڈی تے تازہ ہوا نوں کھون والا ٹمبر مافیا ڈاکوئواں، چوراں، لٹیریاں تے دہشتگرداں توں وڈا مجرم اے۔
ٹمبر مافیا جنگلات تے دیگر مقامات اُتے لگے درختاں نوں انتہائی شاطرانہ طریقے نال چوری کٹوا رہیا اے آسان و پہاڑی علاقیاں وچ جنگلات دی حالت قدرے بہتر اے جد کہ انتہائی دشوار گزار تے مشکل نال اپڑن والے مقامات توں لکڑی چوری دا دھندہ عروج اُتے اپڑ چکیا اے جدوں تسیں انج دے گھمبیر مقام اُتے اپڑو گے تے تہانوں حد نظر سینکڑاں نہیں لکھاں دی تعداد وچ کٹے درختاں دے مردہ لاشے جا بجا کھلرے وکھائی دین گے، جنہاں نوں انتہائی مخصوص انداز وچ مخصوص ویلے وچ مخصوص راہواں توں چوری کڈ کے منزل تیکر اپڑایا جاندا اے۔ سالہا سال توں پلی ہوئی موٹی تازی لکڑی نوں ایہناں ای دے جھاڑ (سبز شاخاں) وچ لُکا کے اک تھاں توں دوجی تھاں منتقل کیتا جاندا اے۔ ایس وسیع تے تباہ کن کرپشن نال جتھے ٹمبر مافیا مالا مال ہو رہیا اے اوتھے محکمہ جنگلات تے دیگر محکمہ جات دے افسران وی ایس بہتی گنگا وچ ہتھ دھو رہے نیں۔انج دے تھانہ جات جنہاں دے ایریاز وچ جنگلات آندے نیں ایہناں دے اہلکار وی حصہ بقدر جسہ وصول کر کے لکڑی چوری کران وچ ٹمبر مافیا دے معاون بن دے نیں۔
ایس تباہی تے بربادی وچ جنگلات دے علاقہ مکین تے شامل ہوندے ای نیں پر سردیاں وچ سال دے تن چار مہینیاں لئی برفانی علاقیاں توں ہزاراں خاندان اپنی بھیڑ بکریاں تے مویشیاں دے نال میدانی علاقیاں وچ آ کے ایہناں سرکاری جنگلات وچ محکمہ دے افسران دی آشیر باد نال ڈیرے پاندے نیں، برفانی علاقیاں توں آ کے جنگلات وچ ڈیرے پان والیاں دی ترجیح دشوار گزار تے لُکے ہوئے مقامات ہوندے نیں جتھے عام بندے دی رسائی ناممکن یا مشکل ہوئے۔ ذرائع کہندے نیں کہ برفانی علاقیاں توں آ کے میدانی علاقیاں وچ ڈیرہ لان والیاں توں فی خاندان تن توں پنج لکھ تیکر سیزن دا لیا جاندا اے جس دے بدلے وچ نہ صرف ایہہ لوک ایتھے عارضی بستیاں بسا کے رہائش رکھدے نیں بلکہ بے تحاشہ لکڑی نوں بطور ایندھن استعمال کردے نیں تے جنگلاں دے جنگل کٹ کے اپنی بھیڑ بکریاں تے جانوراں نوں بطور خوراک کھواندے نیں۔ ذرائع کہندے نیں کہ ایہہ خاندان گھنے جنگلات وچ اڑیالاں، تیتراں تے دیگر جنگلی حیات نوں وی نقصان اپڑاندے نیں۔ برفانی علاقیاں توں آن والے ایہہ لوک وی یقینا ساڈے بھائی تے وطن دے مکین و میدانی علاقیاں دے باسیاں دے مہمان ہوندے نیں پر ایتھے آ کے اپنے رہن دے معاہدے وی ایہناں نوں میدانی علاقیاں دے عوام نال ای کرنے چاہیدے نیں تاکہ نفرت دی بجائے بھائی چارہ ودھے تے میدانی علاقیاں دے لوکاں نوں وی فائدہ ہوئے تاں جے محکمہ جات دے کرپٹ افسران تے ملازمین نوں ایتھے ایس وچ کوئی دورائے نہیں کہ ایہناں ای محکمیاں وچ مٹھی بھر فرض شناس افسر وی موجود نیں جنہاں دی وجہ نال ایہناں محکمیاں دا نظام رواں دواں اے۔
جدوں توں کپتان عمران خان دی حکومت اقتدار وچ آئی اے ایس ویلے توں پورے ملک دے صوبیاں کے پی کے، سندھ، بلوچستان، پنجاب، گلگت بلتستان وچ ارباں درخت لائے جا رہے نیں تے ایس نوں بلین ٹری منصوبے دا ناں دتا گیا اے جنہوں کامیاب بنان لئی پورے ملک دے دفاعی و صوبائی محکمہ جات دے نال عوام خاص طور تے کپتان دے کھلاڑی متحرک نیں تے ایس منصوبے دے تحت مختلف مقامات اُتے درخت لان دا سلسلہ زور و شور نال جاری اے۔ دوجے پاسے مری، چکوال، کلر کہار، چھانگا مانگا، سما سٹہ، جنگل مڈھالا، جہلم، وادی سون، بہاولپور، رحیم یار خان، راجن پور، نادرن ایریاز و دیگر دنے ملک دے درجناں مقامات اُتے واقع جنگلات وچوں لکڑی دی چوری کٹائی عروج اُتے اے۔ ایس طرح ساڈے ملک دی سب توں وڈی اکائی نوں ہن ختم ہون توں کوئی نہیں بچا سکدا۔ تے بلین ٹری منصوبے وچ لائے جان والے درخت مستقبل قریب وچ ایسے ٹمبر مافیا دا کدی نہ بھرن والے پیٹ دا ایندھن بنن گے؟
تے کپتان جی لوڑ ایس امر دی اے کہ ملک وچ ارباں نہیں کھرباں نویں درخت ضرور لائو پر پہلے توں موجود جنگلات، شہراں دے پارکس، نہراں تے سڑکاں دے کنارے لگے کروڑاں درختاں اُتے چیک اینڈ بیلنس نوں ودھایاجائے تے سرکاری لکڑی چوری کرن والیاں دا محاسبہ کیتا جائے، انج دے عناصر دے نال آہنی ہتھاں نال نمبڑیا جائے تے انج دے مجرماں دیاں سزاواں وچ وادھے لئی قانون سازی کیتی جائے ، لکڑی چوری دی روک تھام نال ملک نوں ارباں روپئے دا زرمبادلہ وی حاصل ہوئے گا تے نسل نو نوں پرفضا ماحول وی میسر آئے گا۔ جس نال صحت مند معاشرہ تشکیل پائے گا۔