حافظ سلمان بٹ، سچائی تے بہادری دا عہد مُک گیا

لكهت:ذبیح اللہ بلگن

اوہ میرے خدایا !کنج کنج دے لوک زمین وچ اتار دتے، اوہ جنہاں دے چہرے دی شفق نال اسیں ضیا پانے تے لہجے دی گرج ناہ مہمیز حاصل کردے سی، ویکھدے ویکھدے زمین توں زیر زمین منتقل ہو گئے۔ دل یقین کرن اُتے آمادہ نہیں کہ حافظ سلمان بٹ ساڈے توں جدا ہو گئے نیں۔ اکھاں پرنم نیں، دل غور نال رنجور اے۔

گل کرن دا حوصلہ اے تے نہ لکھن دی سکت۔ اوہ سن ای انج دے پیار و محبت دا مجسم جیہڑا اک وار مل لیندا دیوانہ وار محبت وچ مبتلا ہو جاندا۔ خدا نے لوکاں دے دلاں وچ ایہناں دی محبت پا رکھی سی۔ پورے پاکستان وچ ایہناں نال محبت کرن والے لکھاں جانثار سن جو ایہناں نال محبت نہیں بلکہ عشق کردے سن۔ راقم نے سینکڑے ملاقاتاں دے دوران کدی ایہناں نوں بناوٹی لب و لہجہ اختیار کردے نہیں ویکھیا۔ اوہ جویں دے سن اونج دے ای وکھائی دیندے سن۔ اوہ جو کہہ رہے ہوندے اوہ ای سچ ہوندا۔ 2001 وچ منعقد ہون والے بلدیاتی انتخابات وچ آپ لہور وچ ضلعی ناظم دے امیدوار سن۔ جنرل پرویز مشرف نوں مارشل لاء نافذ کیتے زیادہ ویلا نہیں لنگھیا سی۔ سیاسی جماعتاں فوج دے رعب و دبدبے تھلے دبکے بیٹھی سی۔ کجھ مہینے پہلا ں میاں نواز شریف جنرل پرویز مشرف دے نال معاہدہ کر کے سعودی عرب روانہ ہو چکے سن۔ پاکستان پیپلز پارٹی دی محترمہ بے نظیر بھٹو پہلے توں پاکستان توں باہر سن۔ انج مسلم لیگ ن تے پاکستان پیپلز پارٹی جنرل پرویز مشرف دے امیدوار میاں عامر محمود دا مقابلہ کرنا چاہندی سی تاں ایہناں نوں فوج دا ڈر لاحق سی۔ ایہناں دا کوئی امیدوار ساہمنے آن نوں تیار نہیں سی۔ دونواں سیاسی جماعتاں دے نمائندے عزیز الرحمان چن تے خواجہ سعد رفیق جماعت اسلامی دے دفتر لٹن روڈ آئے تے کہن لگے کہ جنرل پرویز مشرف دے امیدوار دا مقابلہ کرن لئی حافظ سلمان بٹ توں موزوں کوئی ہور نہیں ہو سکدا تاں اسیں دونواں جماعتاں اپنے سارے ووٹ حافظ سلمان بٹ دے حوالے کرنے آں۔

مرکز منصورہ وچ مزید ملاقاتاں ہوئیاں تے فیر ’’جمہوری گروپ‘‘ بن گیا۔ انتخابی مہم دا آغاز ہویا تے حافظ سلمان بٹ ویکھدے ای ویکھدے اک وار فیر لہوریاں دے دلاں دی دھڑکن بن گئے۔ اہلیان لہور حافظ صاحب نال عشق کردے سن۔ جناب امیر العظیم، فاروق چوہان تے راقم میڈیا دی ذمہ داریاں سنبھالے ہوئے سن۔ میرا زیادہ ویلا جماعت اسلامی دے دفتر لٹن روڈ وچ ای لنگھیا سی۔ حافظ صاحب رات نوں انتخابی مہم توں واپس آندے تے کمیٹی روم دے صوفے اُتے ای سو جاندے۔سویرے ایہناں لئی کپڑے گھر توں آندے تے اوہ دفتر جماعت اسلامی وچ ای غسل کر کے اوہ کپڑے پا لیندے۔ علی الصبح پورے لہور توں مسلم لیگ ن تے پاکستان پیپلز پارٹی دے جنرل کونسلر، نائب ناظم تے ناظم دفتر آنا شروع ہو جاندے تے منتاں کردے کہ حافظ صاحب صرف اک گھنٹے لئی ایہناں دے حلقے وچ آ جائو۔ حافظ سلمان بٹ دنیا وی رنگ و بو توں کوساں دور سن۔ ایہناں وچ کسے قسم دا کوئی احساس کمتری نہیں سی۔ ایہناں دے جُتے پالش نیں یا نہیں، کپڑے استری ہوئے نیں یا وٹ پئے نیں، اوہناں نے کدی ایس ول دھیان ای نہیں دتا سی، لہور وچ فوجی آمر جنرل پرویز مشرف دے امیدوار دے مقابل جدوں حافظ صاحب للکاردے تے سیاسی کارکنان دا جوش و جذبہ دیدنی ہوندا۔

2003ء وچ اک وار فیر حافظ سلمان بٹ پاکستان مسلم لیگ ق دے صدر میاں اظہر دے مقابل میدان وچ اترے۔ اک وار فیر اہلیان لہور نے ایہناں نوں موہڈیاں اُتے بٹھا لیا۔ حافظ صاحب جدھر ہو لیندے ، جتھوں لنگھ کے جاندے بس اک ای نعرہ ہوندا حافظ ساڈا شیر اے… باقی ہیر پھیر اے۔ میاں اظہر شکست نال دو چار ہوئے تے حافظ صاحب ممبر قومی اسمبلی منتخب ہو گئے۔ حافظ صاحب بوہت پیار کرن والی شخصیت سن۔ فٹ بال گرائونڈ وچ بیٹھے ہون یا ریلوے یونین دے دفتر وچ اوہ سراپا محبت و الفت ہوندے۔ جنہاں دناں میں روزنامہ انصاف وچ کم کردا سی۔ حافظ سلمان بٹ جماعت اسلامی لہور دے امیر سن۔ پورے دن دی مصروفیت توں تھک جاندے تے ’’انصاف ‘‘ آ جاندے۔ چیف ایڈیٹر جنید سلیم دے کمرے وچ صوفے اُتے نیم دراز ہو جاندے۔ میں کمرے وچ آ کے محبت نال پچھدا حافظ صاحب کجھ کھان لئی منگوائواں؟ کدی مزنگ دی مچھی، کدی نیلہ گنبد دے چنے، بس کھانا کیہ ہوندا بیٹھن دا بہانہ سی۔

حافظ سلمان بٹ شخصیت نہیں انجمن سن۔ اوہ جدھر جاندے قافلہ اُدھر نوں ہو لیندا۔ اوہ دہشت سن پر ایہناں دی شخصیت اُتے محبت غالب سی۔ ایہناں دے دور امارت وچ اسیں لہور وچ تنظیمی تے دعوتی کم کیتا۔ اوہناں نے ہمیشہ حوصلہ افزائی کیتی، س تائش کردے، امیر تے کارکنان والی تے کوئی گل ای نہیں سی۔ دوستانہ ماحول وچ سفر ہوئے امور نبٹے۔ ایہناں دی رحلت اُتے دل سخت اداس اے۔ اوہ ہن کدی نہیں ملن گے۔ اسیں ایہناں دی مخصوص خوشبو توں محروم ہو گئے آں۔ اسیں ایہناں نوں کنج بھُلاں گے؟ لفظ ختم ہو گئے نیں تے جذبات دا غلبہ اے۔ میں ازبکستان وچ بیٹھا اپنے عظیم قانو نوں خراج تحسین پیش کرنا چاہنا واں تاں ہتھاں دی جنبش توں ایہہ ممکن نہیں ہو رہیا …میرے قائد… میرے مربی… اسیں تہانوں ہمیشہ یاد رکھاں گے۔ تسیں ساڈی محبت سی… تسیں ساڈا عشق سی۔ یقینا جناب مولانا ابوالاعلیٰ مودودی، جناب میاں طفیل محمد، جناب قاضی حسین احمد تے سید منور حسن نے تہاڈا پرتپاک استقبال کیتا ہوئے گا کہ ایہناں دا کارکن تے ایہناں دا شیر اج ایہناں تیکر اپڑ گیا اے۔ اللہ تہانوں جنت الفردوس دی میزبانی نال سرفراز فرمائے۔ آمین