پِلاک ولوں آرٹ گیلری دے افتتاح دے موقعے اُتے نامور مصور ڈاکٹر اعجاز انوردے

فن پاریاں دی نمائش ’’ میرا سوہنا شہر لاہور‘‘

رپورٹ: سید علی قیصر

پنجاب انسٹیٹیوٹ آف لینگویج آرٹ اینڈ کلچر، محکمہ اطلاعات وثقافت پنجاب دے زیر انتظام قائم کردہ پنجاب آرٹ گیلری دے افتتاح دے موقعے اُتے نامور مصور ڈاکٹر اعجاز انور دے فن پاریاں دی نمائش ’’میرا سوہنا شہر لاہور‘‘ دے عنوان نال منعقد ہوئی۔ گیلری تے نمائش دا افتتاح خیال احمد کاسترو صوبائی وزیر ثقافت پنجاب نے کیتا۔ اوہناں نے ڈاکٹر اعجاز انور دے کم نوں بے حد سراہیا تے کہیا کہ کرونا دے باعث ثقافتی سرگرمیاں وچ جو تعطل آیا سی ایہنوں فیر توں بحال کیتا جا رہیا اے۔ حکومت پنجاب فن و ثقافت دے فروغ لئی عملی اقدامات چکن اُتے یقین رکھدی اے تے ایس سلسلے وچ سار ثقافتی ادارے موثر کردار ادا کر رہے نیں۔ اوہناں نیں پنجاب آرٹ گیلری دے قیام، ایس دی نمائشاں لئی مصوراں نوں مفت دستیابی تے پلاک ولوں نمائش دے انعقاد نوں بے حد سراہیا تے عندیہ دتا کہ حکومت پنجاب مصوراں تے فنکاراں لئی ایس طرح دی سہولتاں بہم اپڑان وچ کوئی کسر نہیں چھڈے گی۔ ایس موقعے اُتے ڈاکٹر صغرا صدف ، ڈائریکٹر جنرل پلاک نے کہیا کہ ایہہ آرٹ گیلری نوجوان مصوراں نوں نمائش لئی عمدہ سہولتاں مہیا کرے گی۔ ایس موقعے اُتے ڈاکٹر اعجاز انور نے اپنے فن پاریاں دے بارے وچ بریفنگ وی دتی۔ ڈاکٹر اعجاز انور مصور لہور دے طور اُتے جانے جاندے نیں۔ اوہ بطور ڈائریکٹر آرٹ گیلری، نیشنل کالج آف آرٹس (این سی اے)، لہور خدمات انجام دیندے رہے۔ ایہناں دے فن پاریاں دا مرکزی موضوع لہور دی پرانی عمارتاں نیں۔ ایہناں نوں صدارتی تمغہ برائے حسن کارکردگی 1997 ء وچ عطا کیتا گیا۔ پنجاب انسٹیٹیوٹ آف لینگوئج، آرٹ اینڈ کلچر (پلاک ) محکمہ اطلاعات و ثقافت پنجاب ولوں آرٹ دے میدان وچ ایہناں دی خدمات نوں تسلیم کردے ہوئے ایہناں نوں 2018ء وچ ’’پرائیڈ آف پنجاب ایوارڈ‘‘ نال نوازیا۔ تقریب وچ ڈائریکٹر پلاک محمد عاصم چودھری سنے فن و ثقافت نال دلچسپی رکھن والے بندیاں نے کثیر تعداد وچ شرکت کیتی تے پلاک ولوں پنجاب آرٹ گیلری دے قیام تے نمائشاں دے سلسلے دی بھرپور تعریف کیتی۔