بائوجی

لكهت: مطلوب وڑائچ

جتھوں تک مینوں پتہ اے نوازشریف دی شخصیت تے کوئی مکمل کتاب موجود نہیں تے میاں صاحب نے وی اپنے بارے لکھن لئی قلم نہیں چکیا۔ بائوجی دے ٹائٹل دے تحت کتاب لکھن ول میرا دھیان میاں نوازشریف دی بیوی کلثوم نواز دے انتقال دے موقع تے گیا۔ اوہناں دیہاڑیاں شریف خاندان اک گہرے صدمے دی کیفیت وچ سی۔ اک پاسے کلثوم نواز زندگی تے موت دی کشمکش وچ سن دوجے پاسے اوہناں دی تیمارداری لئی اوتھے موجود اوہناں دے زندگی دے ساتھی میاں نوازشریف تے دھی مریم نواز نوں جیل توں بلاوے آ رہے سن تے گل ایتھے ختم نہیں سی ہوئی۔ مخالفین کلثوم نواز دی بیماری نوں اک ڈرامہ تے بہانہ قرار دے کے شریف خاندان دے پھٹ کرید رہے سن۔ کسے نے کیہ زبردست کہیا سی کہ ایتھے اپنے آپ نوں بیمار ثابت کرن لئی مرنا پیندا اے۔ کلثوم نواز نوں ہوش توں بیگانہ چھڈ کے پیو دھی نوں پاکستان آنا پیا تے دوویں ایئرپورٹ توں سدھے جیل ٹر گئے تے کجھ دیہاڑے بعد کلثوم نواز دا لندن وچ انتقال ہو گیا۔ ہائے سیاست‘ کلثوم نواز دے پُتر حسین تے حسن نواز جنازے وچ شریک نہ ہو سکے۔ امتدادِ زمانہ میاں نوازشریف علاج دی غرض نال لندن گئے اوتھے اوہناں دی ماں موجود سن۔ اوہناں دا اوتھے ای انتقال ہو گیا تے میاں نوازشریف جنازے دے نال پاکستان نہ آئے اوہناں دے پوترے حسین تے حسن وی نہ آ سکے۔
بائوجی کتاب وچ میں میاں نوازشریف دی شخصیت‘ اوہناں دی سیاست‘ اوہناں نوں سیاست وچ آن والیاں اوکڑاں‘ مقدمے‘ سزاواں بارے بحث کیتی۔ اپنے ولوں میں کتاب دی تکمیل تک میاں نوازشریف دی سیاست تے دوجے معاملیاں دی کہانی مکمل کرن دی کوشش کیتی پر میاں نوازشریف دی زندگی دی کتاب اوہناں دی زندگی وچ مکمل ہوندی نظر نہیں آئوندی۔ ہر گزردے دن دے نال نویں توں نواں معاملہ سامنے آئوندا اے۔ اجہے اجہے سکینڈل کہ انسان سر پھڑ کے بہہ جاندا اے۔ اوہ کس طرح فوج دی قربت وچ کامیابی دی منزل تے منزل طے کردے گئے۔ ماڈل ٹائون توں سدھا اقتدار دے ایواناں تک اپڑے تے فیر پاکستان دے تن واری وزیراعظم بنے تے اج اوسے فوج دے خلاف آخری حد تک چلے گئے۔
اج براڈشیٹ معاملہ پاکستان دی سیاست سے چھایا ہویا اے جہدے وچ نوازشریف توں انتقام وی جھلکدا اے کہ مشرف نے نوازشریف دے احتساب لئی براڈشیٹ نال معاہدہ کیتا تے کدھرے نوازشریف تے مشرف وچکار گہری ہم آہنگی نظر آئوندی اے جہدے تے دوہاں دے مفادات نے اکٹھا کر دتا۔ مشرف نے اپنے اقتدار نوں مستحکم تے لماں کرنا سی۔ میاں نوازشریف نوں تن آسانی تے احتساب توں نجات چاہیدی سی۔ بائوجی نوازشریف دے حوالے نال اک ریفرنس کتاب ضرور اے پر میں ایہ نوازشریف طبلچی دے طور تے نہیں لکھی۔ غیرجانبداری نال لکھی اے۔ ایہدے پیش لفظ وچ لکھیا گیا اے کہ قارئین جس ویلے تہاڈے ہتھاں وچ ایہ کتاب ہووے گی تے تسیں یقینا سوچ رہے ہوو گے کہ میاں نوازشریف تے شریف برادران نال میرے سیاسی تے نظریاتی اختلاف کسے توں لکے چھپے نہیں تے فیر مینوں ایہ کتاب لکھن دی لوڑ کیوں محسوس ہوئی؟ ایس توں پہلاں کہ میں ایس سوال دا جواب لکھاں مینوں تھوڑا جیہا ماضی دے دریچیاں وچ تہانوں لے کے جانا پوے گا۔ ماضی دے اوہ دریچے کتاب پڑھن نال ای کھلن گے۔ایس کتاب وچ ہور کیہ کجھ اے ایہدا اندازہ تہانوں کتاب پڑھ کے ای ہووے گا۔ 264 صفحیاں دی کتاب دی قیمت 1240 روپیے اے تے ایہ جمہوری پبلی کیشنز لہور توں ملے گی۔
دوستو! اک مستند رائٹر نوں لکھن وچ کوئی اوکڑ نہیں آئوندی پر اک سیاست دے طالب علم تے لکھاری وچ بڑا فرق ہوندا اے۔ سیاسی کارکن دے اپنے جذبات ہوندے نیں اوہ کسے نہ کسے سیاسی دھڑے یاں گروپ نال جڑیا ہوندا اے تے لامحالہ اوہدے لئی غیرجانبدار رہنا اک کڑی آزمائش وانگوں ہوندا اے۔ ایسے طرح مینوں ایہ کتاب لکھن دا خیال کیوں آیا ایہ اوہ سوال اے جو میرے توں دنیا بھر وچ میرے لکھاں مداح تے قارئین کرن گے۔ میں اپنی سیاسی زندگی دی شروعات وچ خطریاں نال کھیڈنا سکھیا اے ایہو وجہ سی کہ میں جنرل ضیاالحق دی آمریت دے دور وچ وی اوہناں نوں بحیثیت اک طالب علم رہنما للکاریا‘ فیر مقدمیاں دا سامنا کیتا‘ میں جلاوطنی اختیار کیتی تے میرے جنون نے فیر اک واری مینوں جنرل مشرف دی ڈکٹیٹر شپ دے سامنے لیا کھڑا کیتا۔ ایس واری میں شہید بینظیر بھٹو دے خصوصی ایلچی دی حیثیت نال جنرل مشرف تے اوہدے حواریاں لئی اوکڑاں پیدا کیتیاں تے ہن اوہ نوازشریف جہناں دے دور وچ میرے تے نہ صرف مقدمے بنائے گئے سگوں میاں نوازشریف بحیثیت وزیراعظم میرے خلاف مقدمے وچ مدعی سن تے فیر سانحہ ماڈل ٹائون دے بعد میں علامہ ڈاکٹر طاہر القادری دے پولیٹیکل سیکرٹری دی حیثیت نال شریف برادران دی کھل کے مخالفت کیتی۔ پر بعد وچ میں عظیم تر ملکی مفاد وچ اوس ویلے دے وزیراعلیٰ پنجاب میاں شہبازشریف‘ علامہ ڈاکٹر طاہرالقادری‘ عمران خان تے جہانگیر ترین دے وچکار پل دا کردار ادا کیتا تے ایہ سارے واقعات دا اپنی اگلی آن والی زیرطبع کتاب وچ ہوشربا انکشاف کراں گا۔
ایس زیربحث کتاب بائوجی دا ایس مشکل گھڑی وچ لکھیا جانا ایس گل دی ضمانت اے کہ مطلوب وڑائچ دا قلم بھاویں سُکا پیا ہووے اوہ جدوں وی کسے تے ظلم ویکھدا اے اوہ بے قرار ہو کے اوس ظلم دے سامنے ڈھال بن جاندا اے۔ میری اج وی خواہش اے کہ شریف برادران تے اسٹیبلشمنٹ دے وچکار پل دا کردار ادا کراں تاں جے شریف برادران دی سیاست تے گرفت نوں مثبت انداز وچ پاکستان دے مفادات لئی استعمال کیتا جا سکے تے ایہ گوہرضائع نہ ہون۔
دوستو! ایس کتاب دے پڑھن دے بعد مینوں اپنی مشاورت بارے ضرور دسیا جے۔٭