اچھی خاں دے سر تے سماجی ثقافتی خدمت دا تاج سج گیا

ملکہ جذبات راحیلہ آغا تے نغمہ بیگم نے وی گولڈ میڈل حاصل کر لیا
اس تقریب دا بندوبست کاشف درویش دے روح رواں اعظم منیر تے میڈم صفیہ اسحاق نے کیتا

رپورٹ :رضوان اصغر بٹ

ستمبر 1958 والے دن لاھور وچ آغا خاندان دے گھر اک بچے نے جنم لیا ماں پیو نے اس بچے دا ناں آغا ارشاد خاں رکھیا بچے نے تعلیم مکمل کر کے کوئی کاروبار نہیں کیتا بلکہ سیدھا اسٹوڈیو نگر پہنچ گیا حا لانکہ اس دے خاندان وچ کوئی شوبز نال جڑیا نہیں سی ھویا۔ او حسن اخلاق دا پاسپورٹ گھروں لے کے آیا سی اس نے تھوڑے عرصہ وچ اپنے منہ پیار نال شوبز دے لوکاں نال تعلقات بنا لے تے نکے وڈھے کردار کرنے شروع کر دتے مگر اس دی نیک نیتی نے اس نوں زیارہ خجل نہیں ھون دتا تے اس نوں جلدی اک اردو فلم دو بیگے بدن وچ ولن کاسٹ کر لیا گیا جس دے ھدایتکار رائے فاروق سن۔

ایہ کہانی پاکستان فل فیڈریشن دے چئیرمین اچھی خاں دی۔ ایس دے بعد اس نے پچھے مڑ کے نہیں ویکھیا بلکہ اک وقت ایسا آیا کہ ھر ھفتے جنیاں وی فلماں ریلیز ھوندیاں اونہاں ساریاں وچ اچھی خاں موجود ھوندا سی اس دی دوجی خوش قسمتی ایہ سی کہ اس نوں نڈر بے باک دف باز اصولاں دا پکا تے پریاں پنچایت دا ماسٹر دنیائے فلم دا بے تاج بادشاہ یوسف خاں جہیا استاد میسر آگیا جنے اس نوں پتر بنا کے کندن بنا دیتا کیا اے جاندا اے کہ انسان دیاں دو پیدائشاں نیں۔ اک جدوں دنیا وچ آئوندا اے تے دوجا جس ویلے اس نوں پتہ لگدا اے کہ مینوں مالک تے خالق نے کس کم لئی دنیا وچ گھلیا اے۔ اچھی خاں نے اس انسانیت دی خدمت دا بیڑا چک لیا تے فلم دے ھر بندے دے دکھ سکھ لئی اپنا آپ پیش کر دیتا کسے دی مرگ ھو جائے کسے دی شادی ھوئے کسے دا کسے طرح دا مشکل کم ھوئے اچھی خاں اوتھے موجود اے تسی اے کہہ سکدے او کہ اوٹردی پھر دی 1122 اے۔ پچھلے دناں فردوس بیگم دی فوتگی تے او کلا سی جس دی وجہ نال اس نے عہدے توں استعفی دے دیتا سی جیڑا بعد وچ اوہناں تنظیم دے صدر فلمسٹار شاھد تے سیکرٹری اطلاعات مصنف اشفاق کاظمی دے آکھن تے واپس لے لیا۔ اچھی خاں دن رات ایسے کم وچ لگا رہندا اے اس دی ایس خدمات نوں ویکھدیاں ھوئیاں کشف درویش نامی فلاحی تنظیم نے اوہناں دی تاج پوشی کیتی اس تنظیم دے روح رواں اعظم منیر تے صفیہ اسحاق ھوراں پنجاب سپورٹس دے حال وچ اے خوبصورت محفل سجائی اچھی خاں دے نال نال ملکہ جذبات راحیلہ آغا جیڑے کہ ھن ورسٹائل ھو چکے نیں تے نغمہ بیگم جیہڑے فلم دا اثاثہ نیں، اوہناں نوں وی ایس تنظیم نے گولڈ میڈل اوہناں دی خدمات دے صلے وچ دتے اس محفل وچ ھر مکتبہ فکر دے لوکاں رلت کیتی۔ اچھی خاں دی تعلق داری دا دروازہ بہت وڈا اے ایس لئی تقریب وچ صحافیاں دی بہت وڈی تعداد نے شرکت کیتی جنھاں وچ طاہر بخاری، ٹھاکر لاھوری، یامین صدیقی، شہزاد انجم، حسن عباس زیدی، نصیر احمد وسیم ولایت، فاروقی کراچی توں رنگ روپ دے مدیر ایس ایم شاکر تے روز وار بھلیکھا دے شوبز ایڈیٹر اشفاق کاظمی دے ناں شامل نیں۔ ہور جیہڑے فنکار تے مہمان تقریب وچ اے انہاں وچ فلمساز میاں راشد فرزند، سماجی لیڈر نسیم بٹ، ق لیگ لاھور دی صدر آمنہ الفت نرمل شاہ اقراء سجاد بری، غزل شاہ تے ہدایتکار ساجد علی ساجد دے ناں شامل نیں۔