امیگرنٹس تے مغرب دا ڈر

لکھت:اسدمفتی

یورپی یونین دے شماریاتی ونگ یوروسٹٹ نے اعدادوشمارجاری کیتے نیں کہ برطانیہ نوں یورپ دا سب توں ودھ اوپن ملک بنان لئی ہر پنج منٹ وچ دو اعداد دی حیران کن شرح نال امیگرنٹس نوں پاسپورٹس جاری کر دتے گئے نیں۔ ریسرچ موجب 2019ء وچ ناقابل یقین حد تک دو لکھ چار ہزار غیرملکیاں نوں برطانوی شہریت دتی گئی‘ ایہ شرح پورے براعظم وچ سب توں ودھ منی جاندی اے۔
اودھر یورپی یونین دے رکن ملکاں دی اکثریت نے اپنیاں سرحداں تے نگرانی دے عمل نوں سخت بنان دے حق وچ ووٹ دتا اے شمالی افریقہ وچ بدامنی دے شکار ملکاں توں ہزاراں مہاجرین دی اٹلی آمد دے بعد ایہ فیصلہ کیتا گیا اے ایہدے باوجود برطانیہ دے بعد دوجی وڈی گنتی وچ شہریت دین والے ملکاں وچ فرانس دا نمبر آئوندا اے جتھے اک لکھ چھتی ہزار غیرملکی تارکین وطن نوں شہریت دتی گئی اے۔ ایہ گنتی تریجے نمبر تے آن والے ملک جرمنی توں تقریباً دونی اے جتھے 96ہزار غیرملکی‘ جرمنی دی شہریت حاصل کرن وچ کامیاب ہوئے۔ ایس حساب نال ویکھیا جاوے تے ماہرین دی ایہ پیش گوئی صحیح لگدی اے کہ 2050ء وچ برطانیہ یورپ دا سب توں ودھ گنجان آباد ملک بن جاوے گا۔ اعدادوشمار جاری ہون مگروں وڈی گنتی وچ امیگرنٹس نوں شہریت دتے جان تے تنقید کیتی جا رہی اے تے وزیراعظم جانسن نوں کیتا گیا مطالبہ زور پھڑ گیا اے کہ اوہناں توں وڈی گنتی وچ پاسپورٹاں راہیں دہشت گرداں دے بیرونی دوریاں دے خاتمے دا وی مطالبہ کیتا اے۔ انٹرپول دے اک عہدیدار نے حیران کن انکشاف کیتا اے کہ چالھی ہزار توں ودھ بندے جعلی پاسپورٹ ورت کے وکھووکھ ملکاں دا دورا کردے نیں یاں غایب ہو جاندے نیں‘ ایہ اک خطرناک رجحان اے پاکستان وچ جعلی برطانوی پاسپورٹ دا استعمال سب توں ودھ اے۔
دارالعوام دی امور داخلہ سلیکٹ کمیٹی دے چیئرمین نے اک واری فیر کہیا اے کہ اوہناں دے ترکی تے یونان دے دورے توں ایہ ثابت ہو گیا اے کہ دوہاں ملکاں دیاں حکومتاں دی کوششاں دے باوجود ایس خطے چوں غیرقنونی تارکین وطن دے یورپی یونین وچ داخلے نوں روکن لئی ترکی‘ یورپی تے بین الاقوامی قنون دا نفاذ کرن والی ایجنسیاں وچکار مسلسل انٹیلی جنس دے تبادلے دی ضرورت اے نہیں تے ترکی نوں جے یورپی یونین دا ممبر بنن دی اجازت دے دتی گئی تے برطانیہ وچ غیرقنونی تارکین وطن دا ہڑھ آ جاوے گا۔ ایس لئی ترکی نوں ممبر بنن دی اجازت دین توں پہلاں اوہدیاں سرحداں تے برسلز دے قواعد دے مطابق سخت کنٹرول لایا جاوے۔ امریکی حکومت نے یورپی یونین اگے درخواست کیتی اے کہ جعلی یورپی پاسپورٹ خاص کر برطانوی پاسپورٹ لئی دہشت گرداں دے سمندر پار دوریاں نوں روکیا جاوے۔ امریکی حکومت نے پاکستان تے دوجے ملکاں وچ اپنی جی اے او ٹیماں نوں وی ٹوریا اے تاں جے اوہ جعلی پاسپورٹاں دے نیٹ ورک تے پابندیاں نوں چھیتی لاگو کروا سکن۔ اوہنے جعلی پاسپورٹاں دے چار شعبیاں دی نشاندہی کیتی اے جہدے وچ گروہ بارے جانکاری دے تبادلے‘ جعلی سفری دستاویزات‘ پاسپورٹ دے غیرقنونی اجرا وچ سکیورٹی دیاں خامیاں دا پتہ لایا اے۔ برسلز وچ ہون والے یورپی یونین داخلی امور دے حالیہ اجلاس وچ ایہ وی کہیا گیا اے کہ شینگن زون وچ آزادانہ سفر دی سہولت نوں گھٹ نہیں کیتا جاوے گا۔ ایس توں پہلاں عارضی طور تے بارڈر کنٹرول بحال کرن دی گل کیتی گئی سی جہدے تے یونین ملکاں دے کجھ نمائندیاں نے ایس رائے دا اظہار کیتا سی کہ یونین دی حدود وچ آزادانہ نقل و حرکت یونین دی اک وڈی کامیابی اے تے اسیں ایس بنیادی کامیابی نوں برقرار رکھاں گے پر یورپی کمیشن وی کسے حد تک شینگن معاہدے وچ اصلاحات دا حمایتی اے۔اوہدے خیال وچ انج کرنا اوس ویلے ضروری ہو سکدا اے جدوں بیرونی سرحداں نوں غیرمتوقع دبائو دا سامنا ہووے۔ اندرونی سرحداں دی فیر توں بحالی تارکین وطن دے حالیہ مسئلے تے قابو ممکن ہو سکدا اے۔ سارے خدشات تے اندیشے اپنی تھاں ٹھیک ہو سکدے نیں پر شینگن معاہدے وچ شامل سارے ملکاں دی رضامندی دے بناں ایہ ممکن نہیں۔ خیال رہوے کہ کوئی وی منفی فیصلہ تقریباً چار سو ملین یورپی باشندیاں تے اوہناں دے کلچر نوں متاثر کرے گا۔(بشکریہ جنگ)