چودھری مختار گوندل، اِک مثالی پُلس افسر

چوہدری مختار نوں ناجائز کم توں چڑ سی تے جائز کم نال عشق سی،مفت انصاف ایہناں دا منشور سی

تحریر؛ کیپٹن ڈاکٹرعمرحیات بْچہ

چوہدری مختار گوندل پہلی جنگ عظیم دے بعد بار موسیٰ تحصیل پھالیہ ضلع منڈی بہائوالدین وچ پیدا ہوئے۔ ابتدائی تعلیم بار موسی تے فیر کوٹمومن ضلع سرگودھا وچ حاصل کیتی۔ پنجویں جماعت وچ استاد نے کہیا کہ فقرہ بنائوbrought up چوہدری مختارنے کہیا کہ gotum budh was brought up in lap of luxury so he did not know human miseries استاد ن نے کہیا مختار لہور چلے جائو۔ میٹرک دا امتحان سنٹرل ماڈل سکول لہور توں امتیازی نمبراں دے نال پاس کیتا۔ بعد وچ گورنمنٹ کالج لہور وچ داخلہ لیا تے بی اے آنرز کیتا۔ گورنمنٹ کالج لہور وچ کمشنر دربار علی شاہ، آئی جی مسعود محمود، جسٹس گلباز، کرنل قادربخش میلہ، قریشی ظہور،مرزاانورایس ایس پی ،برگیڈیرڈاکٹرمنظورچوہدری ایہناں دے ہم جماعت تے ہم عصر سن دوجی جنگ عظیم توں بعد فارغ التحصیل ہو گئے ہن فکر روز گار تے فکر معاش سی ۔ دوجی جنگ عظیم دے بعد اک سال (ICS) دا امتحان نہیں ہویا تے چوہدری مختار گوندل جلدی وچ 1945ء وچ پلس وچ بھرتی ہو گئے۔ ایس ویلے فوج وچ کمیشن آسانی نال مل سکدا سی دیہاتی پس منظر وچ تھانیدار وڈا افسر تصور ہوندا سی دو جنگاں دے وچکار جہالت تے ناخواندگی دے خلاف جنگ کیتی تے دوجی جنگ عظیم دے بعد جرائم دے خلاف سینہ سپرہو گئے۔ 1951ء وچ چوہدری صاحب ایس ایچ او سٹی سرگودھا تعینات سن ( ایہناں دے فرزندارجمند ڈی آئی جی حامد مختار گوندل مرحوم 1951ء دی خوبصورت تے خوش خط ضمنیاں مینوں وکھا رہے سن)۔ چوہدری مختار گوندل دے ہم جماعت مسعود محمود ایس ایس پی سرگودھا سن تے جہانیاں شاہ دے سید عنائت علی شاہ ڈی آئی جی راولپنڈی رینج سن تے اودوں راولپنڈی رینج پنڈی توں ملتان تیکر محیط سی۔ پنجاب وچ راولپنڈی، لہور ، ملتان، بہاولپور صرف چار رینج سن۔ عنایت علی شاہ نوں چوہدری مختار گوندل دی کارکردگی تے ایمانداری پسند آئی تے ایہناں وچ گوہر نایاب نظر آیا فوری ترقی دے دتی تے لہور تبادلہ ہو گیا۔
راقم 1966ء وچ کنگ ایڈورمیڈیکل کالج لہور وچ داخل ہویا ایس ویلے چوہدری مختار گوندل DSP انار کلی سن۔ میں ملاقات لئی ایہناں دے دفتر گیا پہلی ملاقات وچ انج لگیا پرانی شناسائی تے راہ رسم اے۔ چوہدری مختار گوندل نے کہیا کہ تہاڈے نال مل کے بوہت خوشی ہوئی۔ ایہہ ملاقات دا سلسلہ جاری رہنا چاہیدا اے ایس ویلے حامد مختار نے میٹرک دا امتحان پاس کیتا تے گورنمنٹ کالج لہور وچ داخلہ مل گیا۔ میں اتوار دے دن چوہدری مختار گوندل دی رہائش گاہ ماڈل ٹائون چلا جاندا۔ وسیع عریض لان و سبزہ زار وچ مزے دی دھپ تے گپ شپ ہوندی۔ چوہدری مختار گوندل دا تبادلہ پنجاب کرائم برانچ انار کلی ہو گیا جتھے ہن آئی جی آفس اے ایہہ وی کہ ای میڈیکل کالج تے میو ہسپتال توں براستہ انار کلی تے پرانی انار کلی نیڑے سی۔ میں کالج دے بعد دفتر چلا جاندا۔ چوہدری مختار دا حلقہ احباب بڑا وسیع سی۔ حبیب جالب، شورش کاشمیری، کوثرنیازی ،ایسے ادیب شاعرخواجہ ٓاصف دے والدخواجہ صفدرگوجرہ دے حمزہ ، لہور دے ملک اختر،اعجازبٹالوی ،خدادادلک ، چوہدری ظہورالہی پورے پنجاب وچ حلقہ اثر سی۔ پولیس دے ملک غلام فریدٹوانہ ،غلام اصغرہلاکوخان ،چوہدری صالح مارتھ ایہناں دے رفیق کار سن۔ بشمول چوہدری سردار محمد بوہت سارے سابق۔ آئی جی ۔ ڈی آئی جی تے ایس پی ایہناں دے شاگرد سن۔ چوہدری مختار نوں ناجائز کم توں چڑ سی تے جائز کم نال عشق سی۔ مفت انصاف ایہناں دا منشور سی۔ ایہناں دی انگریزی دا بوہت شہرہ سی۔ ڈی آئی جی قاضی اعظم تے آئی جی صاحبان نے حکم دے رکھیا سی جدوں مختار گوندل دا نوٹ بریفنگ یا رپورٹ آئے انگلش دی ڈکشنری نال گھل دتا کرو۔۔ ڈی آئی جی نبلٹ کہندا سی گوندل تھوڑی جہی انگریزی مینوں وی سکھا دیو۔ میں ڈاکٹر بن گیا 1971ء وچ فوج وچ کپتان بھرتی ہو گیا جنگ لڑی فیر گوجرانوالہ کینٹ آ گیا۔ چوہدری مختار ڈی ایس پی ہیڈ کوارٹر گوجرانوالہ تعینات ہو گئے اودوں احمد نسیم اے ایس پی انڈر ٹریننگ سن۔ اک دن چوہدری مختار نوں ایہناں دے گھر ملن گیا اک شیورلیٹ کار کھڑی سی اندر گیا تے ایس وچ چوہدری شجاعت دے والد ظہور الٰہی بیٹھے سن چوہدری مختار نے تعارف کرایا۔ ڈاکٹر بچہ نیں تے مینوں حامد وانگوں عزیز نیں۔ چوہدری ظہور الٰہی گویا ہوئے مختار میرا دوست وی اے تے مشیر وی۔ میں جدوں پریشان ہونا واں ایہناں نال مشورہ کرنا واں۔ ایہہ بندا گوندل وی اے تے فرشتہ وی۔
1973ء چوہدری مختار گوندل دی ترقی ہو گئی تے اوہ ایس ایس پی فیصل آباد سن آئی جی خان بیگ دے والد محترم ملک یارن ایس ایس پی جھنگ سن اوہ چوہدری مختار دے یار غار وی سن تے رفیق کار وی۔ فیصل آباد وچ عرفان محمود، طارق پرویز چوہدری یعقوب تے بوہت سارے دوجے افسر اے ایس پی انڈر ٹریننگ سن۔ ایہہ سب بعدوچ پولیس دے آئی جی تے اعلیٰ افسران بنے اپنے استاد دے ہمیشہ مداح سن۔
1981ء وچ میرے مہربان تے محسن جنرل سی اے مجید پشاور دے کور کمانڈر سن تے سرحد دے گورنر وی میں جنرل مجید دی دعوت اُتے پشاور گیا۔ میں ریٹائرڈ کپتان سی تے مجید جنرل کور کمانڈر تے گورنر وی اوہ تادم زیست مینوں نکا بھرا سمجھدے رہے کمال شاہ ایہناں دناں ایس ایس پی پشاور سن۔ بعد وچ آئی جی سندھ، فیر سیکرٹری داخلہ تے فیر میرے دیرینہ دوست احمد نسیم آئی جی دے سمدھی بن گئے۔ چوہدری مختار گوندل ایہناں دناں ڈی آئی جی نارکوٹکس پشاور سن ، میں گورنر دی گڈی اُتے ایہناں نوں ملن گیا اوہ حیران وی سن تے خوش وی، استفسار کیتا ڈاکٹر تے گورنر ،میں کہیا عزت وی ایس دے ہتھ وچ اے تے ذلت وی ایس دے ہتھ وچ اے۔ نہیں تے من آنم کہ من دانم
کوبہ کو پھیل گئی بات شنائی کی
اس نے خوشبو کی طرح میری پذیرائی کی
میں سرگودھا آن لگیا گورنر موصوف نے کہیا چوہدری مختار گوندل میرے محسن وی نیں تے بزرگ وی اج کل ڈی آئی جی نارکوٹکس پشاور نیں۔ بوہت لائق، محنتی تے ایماندار پولیس آفیسر نیں ایہناں نوں ملاقات لئی بلا لینا بعد وچ گورنر موصوف نے فون کیتا۔ عمر حیات شکریہ۔ تسیں اینے لائق تے نیک افسر نال ملوایا۔ ہن میں مختار نوں خود مختار بنانا واں۔ ’’ابھی کچھ لوگ باقی ہیں جہاں میں‘‘۔ چوہدری مختار گوندل ڈی آئی جی ہیڈ کوارٹر لہور تعینات ہو گئے تے آخر کار ریٹائر ہو گئے چوہدری مختار کہہ رہے سن۔
ہم نے ہر طرح سے دنیا دیکھ لی
گردش ایام تیرا شکریہ
چوہدری سردار آئی جی پنجاب بنے سرگودھا دورہ اُتے آئے تے اپنے استاد چوہدری مختار گوندل نوں نال لیائے۔ چوہدری مختار گوندل نے آئی جی نوں تعارف کرایا۔ ایہہ ڈاکٹر بچہْ نیں تے مینں حامد وانگوں عزیز نیں تیز تیز چل رہے سن تے کہہ رہے سن۔
کہنے کو چند گام تھا یہ عرصہ حیات
لیکن تمام عمر ہی چلنا پڑا مجھے
چوہدری مختار نے کہیا دنیا بوہت ویکھی اے ہن آخرت دی تیار کرنے آں ماڈل ٹائون تے گارڈن ٹائون دی باجماعت نمازاں تے نمازاں دے وقفے دے دوران واک۔ اک ساتھ روح تے جسم دی غذا، فیر ڈاکٹر اسرار دی شاگردی تے تفسیر القرآن پڑھنا شروع کر دتی۔ داڑھی رکھ لئی۔ کہن لگے عبادت تے ریازت وچ کوئی کسر نہیں چھڈنی۔ داڑھی دے بغیر رب کعبہ، ایس دے محبوب تے ایس دے حبیب ﷺ دے ساہمنے شرمندگی نہ ہوئے۔ چوہدری مختار گوندل مرحوم نے کم و بیش 40 سال پلس دی سروس کیتی۔ ایہناں دے پتر حامد مختار گوندل مرحوم ڈی آئی جی پولیس ریٹائرہوئے۔ باپ دے نقش قدم اُتے چلے۔ کرپشن تے رزق حرام توں نفرت سی۔ نقد، بینک بیلنس، کوٹھی، اثاثہ حیات، اراضی پلاٹ دے بغیر ای خالی ہتھ واپس گھر آ گئے۔ اوہ ای پنڈ دے پکے مکان تے خاندانی اراضی کل اثاثہ نیں۔ خداوند کریم ایہناں نوں جزائے خیر دیوے۔ خالد مختار گوندل ، میجر امین مختار تے سلیم مختار گوندل رفیقاں دے شفیق نیں۔ ایس پی رضوان نوں کہیا میں نانا توں نواسہ تیکر نبھا دتی اے۔
چلدے چلدے چوہدری مختار تے نہیں تھکے ایہناں دے گردے تھک گئے۔ وڈے وڈے ڈاکٹراں نال ایہناں دے مراسم سن۔ حامد، خالد ، سلیم،آمین،عمر،رضوان کے ساتھ ڈاکٹر خالد سیف اللہ،ڈاکٹرظفراللہ چوہدری ،پروفیسر ڈاکٹر جواد ساجد خان سب اشک بارسن، تے اوہ 2 فروری 1997 خالق حقیقی نال جا ملے سن۔ ایہناں نوں آسودہ خاک ہوئے 23 ورہے ہو چکے نیں پر انج لگدا اے کہ کل دی ای گل اے جدوں ایہناں نال ملاقاتاں ہوندیاں سن۔
نشان مرد مومن باتو گوئم
چوں مرگ آیدتبسم برلب ادست
مرد مومن نوں جدوں موت آندی اے اوہ مسکراندا اے۔ محبوب نال ملاقات دی خوشی ہوندی اے، اسیں سب رو رہے سی۔
مجھے اس کی چپ نے رلادیا
جسے گفتگو میں کمال تھا